29 C
Phnom Penh

​​​ប្រទេស​កម្ពុជា​ត្រៀម​ពិនិត្យ​មើល​​​​ជន​ភៀសខ្លួន​បន្ថែមទៀត​ដែល​អូស្ត្រាលី​ឃុំ​ខ្លួន​​នៅលើ​កោះ​ណូរូ

ដោយ ឌឹ ខេមបូឌា ដេលី

បទវិភាគ

ទីប្រឹក្សា​ម្នាក់​​របស់​លោក​នាយក​រដ្ឋមន្ត្រី ហ៊ុន សែន បាន​មាន​ប្រសាសន៍​បន្ទាប់​ពី​លោក​​​​នាយក​រដ្ឋ​មន្ត្រី​បាន​ជួប​​ពិភាក្សា​ជាមួយ​លោក ភីធើ ដាត់ធិន (Peter Dutton) រដ្ឋ​មន្ត្រី​​ក្រសួង​​​​អន្តោ​ប្រវេសន៍​អូស្ត្រាលី​ ដែល​បាន​មក​បំពេញ​ទស្សន​​​កិច្ច​កាល​ពី​ម្សិល​មិញ​ថា ប្រទេស​កម្ពុជា​ត្រៀម​​​​ចាប់​ផ្ដើម​ពិនិត្យ​មើល​ជន​ភៀស​ខ្លួន​​បន្ថែម​ទៀត​​​ដែល​ប្រទេស​អូស្ត្រាលី​​សង្ឃឹម​ថា នឹង​មក​តាំង​​​ទីលំនៅ​នៅ​ទីនេះ​ពី​​ប្រទេស​ដែន​កោះ​ណូរូ​​ក្រោម​កិច្ច​ព្រមព្រៀ​ងដ៏ចម្រូង​ចម្រាស​រវាង​ប្រទេស​ទាំង​ពីរ។

cam-photo-dutton-sovannaraដំណើរ​ទស្សនកិច្ច​​របស់​លោក​ ដាត់ធិន ធ្វើ​ឡើង​​ដោយគ្មានការ​ប្រកាស​​​ និង​ធ្វើ​ឡើង​បន្ទាប់​ពី​​​ប្រព័ន្ធ​ផ្សព្វ​ផ្សាយ​រាយ​ការណ៍ព្រោង​ព្រាត​​ថា កិច្ចព្រមព្រៀង​នេះ​​ប្រហែល​ជា​ជិត​បរា​ជ័យ​បន្ទាប់ពី​ប្រទេស​កម្ពុជា​​បាន​លើក​ឡើង​ថា ខ្លួន​​នឹង​មិន​ទទួល​យក​ជន​ភៀស​ខ្លួន​ណា​ម្នាក់​​​បន្ថែម​​ទៀត​ឡើយ លុះ​ណា​តែ​ជន​ភៀសខ្លួន​​បួន​នាក់​ដំបូង​ដែល​បាន​មក​ដល់​កាលពី​ខែ​មិថុនា ​ត្រូវ​បាន​​បញ្ចូលទៅ​ក្នុង​សង្គម​​​ពេញ​លេញ​​សិន​។

ក៏មាន​ការ​លើកឡើង​​​កាលពី​សប្ដាហ៍​មុន​ដែរ​ថា ជន​​ភៀស​ខ្លួន​ម្នាក់​ក្នុង​ចំណោម​​ជន​ភៀស​ខ្លួន​បួន​នាក់​ដំបូង​ គឺ​បុរស​ជនជាតិ​រ៉ូហុីងយ៉ា​ដែល​បាន​ភៀស​ខ្លួន​​ពី​ប្រទេស​ភូមា ដោយ​សង្ឃឹម​ថា នឹង​បាន​ទៅ​ដល់​ប្រទេស​អូស្ត្រាលី​នោះ បាន​ស្នើ​​សុំ​ត្រឡប់​ទៅ​​ស្រុក​កំណើត​វិញ​។

លោក ស្រី ថាំរុង្គ ទីប្រឹក្សា​លោក ហ៊ុន សែន បាន​មាន​ប្រសាសន៍​ថា ដំណើរ​ការ​តាំង​​​​​ទីលំនៅ​​ដល់​ជន​ភៀសខ្លួន​បួន​នាក់​ដំបូង​ដែល​ស្ថិត​នៅ​​ក្នុង​កន្លែងស្ងប់​​​​ស្ងាត់​​បិទ​របង​ជិត​នៅ​ជាយ​រាជធានី​ភ្នំពេញ​នោះ បាន​ធ្វើ​ឲ្យ​ដំណើរ​ការ​នេះ​ជាប់​គាំង​។

លោក ថាំរុង្គ បាន​ថ្លែង​ទៅ​កាន់​អ្នក​យក​ព័ត៌មាន​ថា ”​យើង​ចង់​ឲ្យ​ប្រទេស​អូស្ត្រាលី​បញ្ជូន​អ្នក​ស្ម័គ្រ​ចិត្ត​មក​បន្ថែម​ទៀត។ ប៉ុន្តែ​យើង​កំពុង​ប្រឈម​ការ​លំបាក​ក្នុង​ការ​នាំ​​​ពួកគេ​បន្ថែម​ទៀត​មក​ទីនេះដោយ​​​សារ​​​​​​ការ​បញ្ចូល​​ជន​ភៀស​ខ្លួន​បួន​នាក់​ដំបូងទៅក្នុង​សង្គម​​នោះ ពួក​​​គាត់​​​​មិន​ទាន់​អាច​និយាយ​ភាសា​ ខ្មែរ​បាន​នៅ​ឡើយ​”។

​តាម​កិច្ច​ព្រមព្រៀង​នេះ ប្រទេស​កម្ពុជា​​បាន​ចុះ​​ហត្ថលេខា​ជាមួយ​ប្រទេស​អូស្ត្រាលី​កាលពី​១ឆ្នាំ​មុន ទទួល​យក​​ជន​ភៀស​ខ្លួន​ក្នុង​ចំនួន​មិន​បញ្ជាក់​​ដែល​ប្រទេស​អូស្ត្រាលី​កំពុង​ឃុំខ្លួន​​នៅ​លើ​កោះ​ណូរូ​ ជាថ្នូរ​នឹង​ជំនួយ​ជា​ប្រាក់​​៤០លាន​ដុល្លារ​អូស្ត្រាលី (២៨,១​លាន​ដុល្លារ​) ជន​ភៀស​​ខ្លួន​ទាំង​នោះ​នឹង​មិន​ទាន់​ចាក​ចេញពី​កន្លែង​ស្នាក់​នៅ​បណ្ដោះ​អាសន្ន​របស់​ខ្លួន​ក្នុង​រាជ​ធានី​ភ្នំពេញ​​ទេ រហូត​ទាល់​តែ​​ពួកគេ​​ចេះ​ភាសា​​ខ្មែរ​ល្មម​អាចយល់​គ្នាបាន​ក្នុងការ​ទំនាក់​ទំនង​ការ​ងារ​​។

កិច្ច​ព្រម​ព្រៀង​នេះ​មិន​បាន​បញ្ជាក់​ថា តើ​ក្រុម​ដំបូង​នេះ​​គួរ​ត្រូវ​តាំង​ទីលំនៅ​មុន​ជន​ភៀស​​​ខ្លួន​​​បន្ថែម​ទៀត​មក​ដល់​ឬយ៉ាង​​ណា​នោះ​ឡើយ ​ប៉ុន្តែ​ទុក​ឲ្យ​កម្ពុជា​ជា​អ្នក​កំណត់​។

អង្គការ​សិទ្ធិ​ជន​ភៀសខ្លួន​​ ដោយ​មាន​​ទំនាក់​​​ទំនង​ជាមួយកោះ​ណូរូ​បាន​លើក​ឡើង​ថា ជន​​ភៀសខ្លួន​តិ​ចតួច​បាន​មក​ដល់​ប្រទេស​កម្ពុជា ពីព្រោះ​គ្មាន​នរណាម្នាក់​ក្នុង​ចំណោម​ពួកគេ​ចង់​មក​ទេ ហើយ​ថា ជន​ភៀសខ្លួន​​បួន​នាក់​ដែល​បាន​ដល់​កាលពី​ខែមិថុនា បាន​ទទួល​​យក​​​សំណើ​នេះ​​​បន្ទាប់ពី​ត្រូវ​បាន​​​ភូត​កុហក​​អំពី​ជីវភាព​នៅ​ទីនេះ និង​​ការ​​សន្យា​​ផ្ដល់​ប្រាក់​​​រាប់​ពាន់​ដុល្លារ​។

បើ​​ទោះ​ជាមាន​ការ​វិវឌ្ឍ​តិច​តួច​ក៏ដោយ ក៏​លោក​ ថាំរុង្គ បាន​អះអាង​ថា កិច្ចព្រម​ព្រៀង​​​​​​​នេះ​នៅ​មាន​សុពលភាព​នៅ​ឡើយ ហើយ​ថា ​​ជន​ភៀស​ខ្លួន​បន្ថែម​ទៀត​នឹង​មក​ដល់​ជា​បន្ត​បន្ទាប់​។

លោក​បាន​ថ្លែង​ថា “​យើង​ចង់​ឲ្យ​ប្រទេស​អូស្ត្រាលី​បញ្ជូនជន​ភៀស​ខ្លួន​​បន្ថែម​ទៀត​មក​ប្រទេស​កម្ពុជា​ ហើយ​​គេ​អាច​បញ្ជូន​មក​ជា​​ក្រុម​​​មាន​គ្នា​​​ពី​បួន​​ទៅ​ប្រាំនាក់ក៏បាន​។ យើង​នឹង​បញ្ជូន​មន្ត្រី​​របស់​យើង​ពី​ក្រសួង​មហាផ្ទៃ​ទៅ​កោះ​ណូរូ​​ ដើម្បី​សម្ភាស​ជន​ភៀសខ្លួន​ស្ម័គ្រ​​ចិត្ត​មុន​ពេល​នាំពួកគេ​​មក​ប្រទេស​កម្ពុជា​”។ លោក ថាំរុង្គ មិន​បាន​និយាយ​ថា តើ​គណៈ​ប្រតិភូ​​​នឹង​ធ្វើ​​ដំណើរ​ទៅ​នៅ​ពេល​ណា​នោះ​ឡើយ។ ​​​

លោក ដាត់ធិន ក​៏​បាន​ជួប​ពិភាក្សា​ជាមួយ​លោក ស ខេង រដ្ឋមន្ត្រី​ក្រសួង​មហាផ្ទៃ ដែល​​ទទួល​បន្ទុក​​ខាង​ភាគី​កម្ពុជា​នៃ​កិច្ច​​ព្រម​ព្រៀង​នេះ​នាព្រឹកនោះ​ផងដែរ។

លោក ខៀវ សុភ័គ អ្នកនាំពាក្យ​ក្រសួង​មហាផ្ទៃ​បានមាន​ប្រសាសន៍​ថា លោក​មិន​បាន​​​​​​ចូល​រួម​ក្នុង​ជំនួប​នោះ​ទេ ដូច្នេះ​លោក​មិន​​​​ដឹង​ថា តើ​​ពួកគាត់​ពិភាក្សា​ពី​អ្វី​ឡើយ។ ក្រុម​មន្ត្រី​នៅ​នាយក​ដ្ឋាន​អន្តោប្រវេសន៍​​​ក្រសួង​មហា​ផ្ទៃ​ក៏​បាន​​ឲ្យ​ដឹង​ផង​ដែរ​ថា ពួកគេ​​មិន​ដឹង​អំពី​ជំនួប​របស់​លោក ស ខេង​ ឡើយ​។

ទាំង​ការិយាល័យ​របស់​លោក ដាត់ធិន និង​​​ស្ថានទូត​អូស្ត្រាលី​ប្រចាំ​រាជធានី​ភ្នំពេញ​មិន​បាន​ឆ្លើយ​តប​ចំពោះ​សំណើ​សុំអត្ថាធិប្បាយ​ឡើយ។ នៅ​ក្នុង​ការ​សម្ភាស​ជាមួយ​ទីភ្នាក់​ងារ​​​​ព័ត៌មាន​​រ៉យទ័រ​កាលពី​ចុង​ខែ​មុន អំឡុង​ពេល​នោះ​​ឧត្ដម​សេនីយ៍ ខៀវ សុភ័គ បាន​ថ្លែង​ទៅ​កាន់​​ប្រព័ន្ធ​ផ្សព្វ​ផ្សាយ​ក្នុង​ស្រុក​ថា ប្រទេស​កម្ពុជា​ “មិន​មាន​គម្រោង​នាំ​យកជន​ភៀសខ្លួន​បន្ថែម​” នោះ ​លោក​ ដាត់ធិន បាន​​លើក​ឡើង​​ថា​ ជន​ភៀសខ្លួន​បន្ថែម​ទៀត​ត្រៀម​ខ្លួន​ធ្វើ​ដំណើរ​មក​។

លោក​​ត្រូវ​បាន​​គេ​ដកស្រង់​សម្ដី​នៅ​ពេល​​​នោះ​ថា ”​មាន​ជន​ភៀសខ្លួន​ផ្សេង​​ទៀត​នៅ​លើ​កោះ​ណូរូ​ឥឡូវ​នេះ​ត្រៀម​​ខ្លួន​​មក​កាន់​ប្រទេស​កម្ពុជា ហើយ​យើង​កំពុង​​​ធ្វើ​ការ​​លម្អិត​​​​ពី​រឿង​នេះ​ជាមួយ​មន្ត្រីទាំងនោះ​​”។

កិច្ចព្រមព្រៀង​​រវាង​ប្រទេស​អូស្ត្រាលី និង​​​កម្ពុជា គឺ​ជា​ផ្នែក​មួយ​នៃ​ការ​ខិត​ខំប្រឹង​ប្រែង​ដើម្បីបន្ទុចបង្អាក់​​​​​​ក្រុម​​​អ្នក​ស្វែង​រក​សិទ្ធិ​ជ្រក   ​កោន​កុំ​ឲ្យ​ព្យាយាម​ទៅ​​កាន់​​ប្រទេស​របស់​ខ្លួន​។ អង្គការ​សិទ្ធិ​មនុស្ស និង​​សមាជិក​​សភា​គណ​​​បក្ស​ប្រឆាំង​នៅ​ក្នុង​ប្រទេស​ទាំង​ពីរ​​បាន​ចោទ​​​​ប្រកាន់​ប្រទេស​អូស្ត្រាលី​ថា បាន​​​​​​បំពាន​កាតព្វ​​​កិច្ច​អន្តរជាតិ​ ហើយ​បាន​រិះ​គន់​​កិច្ច​ព្រម​​ព្រៀង​​​​​​បញ្ជូន​ជន​ភៀសខ្លួន​​នៅ​លើ​កោះ​ណូរូ​​ទៅ​​​កាន់​ ប្រទេស​​មួយ​ក្នុង​ចំណោម​ប្រទេស​ក្រីក្រ និង​ពុក​រលួយ​បំផុត​ក្នុង​តំបន់​”៕ ​សារុន

(រាយការណ៍​បន្ថែម​ដោយ Zsombor Peter)​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស