កាលពីម្សិលមិញ លោក សុខ ទូច ដែលជាបណ្ឌិតមកពីរាជបណ្ឌិត្យសភាកម្ពុជាបានលើកឡើងថា ក្រុមការងារស្រាវជ្រាវព្រំដែនរបស់លោកបានចាប់ផ្ដើមចុះពិនិត្យផ្ទៀងផ្ទាត់បង្គោលព្រំដែនដែលបោះនៅតាមបណ្ដោយព្រំដែនប្រវែង១.២២៨គីឡូ ម៉ែត្រជាមួយវៀតណាម ដោយបានចុះទៅពិនិត្យមើលបង្គោលព្រំដែនចំនួនប្រាំមួយ ដែលបោះនៅសម័យអាណានិគមចាប់តាំងពីសប្ដាហ៍មុនមក ជាផ្នែកនៃដំណើរការដែលលោកលើកឡើងថា នឹងចំណាយពេល២ឆ្នាំ ។
បន្ទាប់ពីគណបក្សសង្គ្រោះជាតិធ្វើយុទ្ធ នាការកាន់តែខ្លាំងឡើងៗដោយចោទប្រកាន់ រដ្ឋាភិបាលថា បានសមគំនិតនៅក្នុងការឈ្លានពានចូលទឹកដីកម្ពុជាពីសំណាក់វៀតណាម លោកនាយករដ្ឋមន្ត្រី ហ៊ុន សែន បានផ្ដល់ភារកិច្ចឲ្យលោក សុខ ទូច សិក្សាស្រាវជ្រាវលើ បញ្ហានេះកាលពីសប្ដាហ៍មុន។
លោក សុខ ទូច បានមានប្រសាសន៍ថា ”ក្នុង រយៈពេល១០ថ្ងៃនៅព្រំដែន យើងបានពិនិត្យ ផ្ទៀងផ្ទាត់បង្គោលព្រំដែនមួយចំនួនដែលបោះ តាមបណ្ដោយព្រំដែនកម្ពុជា-វៀតណាម។ ជាពិសេសយើងបានរកឃើញបង្គោលព្រំ ដែនយ៉ាងតិចចំនួនប្រាំមួយដែលបោះតាំងពីសម័យអាណានិគមបារាំងមក”។
លោកបានបន្ថែមថា ”ខ្ញុំនឹងរកឲ្យឃើញបង្គោលព្រំដែនទាំងអស់ដែលបោះអំឡុងសម័យអាណានិគមបារាំង ក៏ដូចជាបង្គោលព្រំដែនដែលបោះរហូតមកទល់ពេលនេះដោយរដ្ឋាភិបាល។ ប៉ុន្តែខ្ញុំនឹងមិននិយាយ [ថាតើ] ការបោះនោះត្រឹមត្រូវ ឬមិនត្រឹមត្រូវឡើយ”។
នៅក្នុងកិច្ចសម្ភាសមួយកាលពីថ្ងៃច័ន្ទ លោក សុខ ទូច បានលើកឡើងថា លោកបាន ចាប់ផ្ដើមសិក្សាស្រាវជ្រាវលើកដំបូងនៅក្នុងខែឧសភា ហើយមានគោលដៅចុះពិនិត្យ ផ្ទៀងផ្ទាត់បង្គោលព្រំដែនសរុបទាំងអស់១២៤ ដែលបោះដោយបារាំង ក៏ដូចជាបង្គោលព្រំដែនចំនួន៣១៤ផ្សេងទៀតដែលបោះដោយរដ្ឋាភិបាលរបស់លោក ហ៊ុន សែន។
លោកបានមានប្រសាសន៍ថា ”យើងជាក្រុមស្រាវជ្រាវ ដូច្នេះយើងនឹងប្រមូលផ្តុំលទ្ធផលនៃការស្រាវជ្រាវរបស់យើង ហើយបង្ហាញ សាធារណជន ប្រព័ន្ធផ្សព្វផ្សាយ និងគណបក្សនយោបាយ”។
លោកបានបន្ថែមថា លោកនឹងបង្ហាញលទ្ធផលនៃការស្រាវជ្រាវរយៈពេល២ឆ្នាំ បន្ទាប់ពីបង្គោលព្រំដែនទាំងអស់ត្រូវបានពិនិត្យផ្ទៀងផ្ទាត់រួចរាល់។
លោកបានថ្លែងថា ”លទ្ធផលនៃការស្រាវ ជ្រាវរបស់យើងដូចជានិក្ខេបបទអ៊ីចឹង។ តែ និក្ខេបបទនៅសាកលវិទ្យាល័យនេះនឹងបង្ហាញចំពោះមុខគណៈកម្មាធិការដើម្បីវាយតម្លៃថា តើវាអាចទទួលយកបានឬមិនបាន ហើយថា តើវាមានភ័ស្តុតាងគ្រប់គ្រាន់ដែរឬទេ ខណៈនិក្ខេបបទរបស់ខ្ញុំនឹងត្រូវវាយតម្លៃ ដោយសាធារណជន ប្រព័ន្ធផ្សព្វផ្សាយ រដ្ឋាភិ បាល ក៏ដូចជាគណបក្សនយោបាយដែរ។ សាធារណជនអាចតវ៉ាចំពោះលទ្ធផលនៃការស្រាវជ្រាវរបស់ខ្ញុំបាន ហើយខ្ញុំនឹងផ្ដល់ភ័ស្តុតាងដែលខ្ញុំប្រមូលបានដល់ពួកគាត់។ ចំពោះអ្នកដែលអះអាងថា បាត់ដីកន្លែងនេះ កន្លែងនោះ ពួកគាត់ក៏អាចបង្ហាញភ័ស្តុតាងបានដែរ ហើយយើងនឹងពិភាក្សាវាបន្ថែមទៀត”។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានលើកឡើងថា លោកជឿថាលទ្ធផលនៃការស្រាវជ្រាវរបស់លោក សុខ ទូច នឹងអាចជឿទុកចិត្តបាន ទោះបីជាអ្នកសិក្សាស្រាវជ្រាវរូបនេះបដិសេធមិន អនុញ្ញាតឲ្យតំណាងរាស្ត្រគណបក្សប្រជាជនកម្ពុជា ឬតំណាងរាស្ត្រគណបក្សសង្គ្រោះជាតិអមដំណើរលោកក្នុងអំឡុងរយៈពេល២ឆ្នាំនៃការបំពេញការងារក៏ដោយ។
លោកបានមានប្រសាសន៍ថា “ប្រសិនបើរាជបណ្ឌិត្យសភារកឃើញភាពមិនប្រក្រតីមួយចំនួន ពួកគាត់មានសិទ្ធិដាក់ជូនភាពមិនប្រក្រតីទាំងនោះមករដ្ឋាភិបាល និងគណៈកម្មាធិការព្រំដែនចម្រុះ ហើយថា គណៈកម្មា ធិការនេះអាចពិនិត្យពិច័យថាតើវាពិតឬមិនពិត”។ លោកបានបន្ថែមថា ”រដ្ឋសភានឹងពិនិត្យមើលលទ្ធផលនៃការស្រាវជ្រាវនេះ។ ប៉ុន្តែគម្រោងនេះកំពុងតែបន្តហើយ ដោយរាជ បណ្ឌិត្យសភាធ្វើការផ្អែកតែលើការពិនិត្យផ្ទៀងផ្ទាត់តាមបែបវិទ្យាសាស្ត្រ មិនមែននយោបាយទេ”។
លោក ផៃ ស៊ីផាន បានមានប្រសាសន៍បន្ថែមទៀតថា វាជារឿងធម្មតាទេដែលពល រដ្ឋខ្លះមិនទទួលយកលទ្ធផលនៃការស្រាវ ជ្រាវរបស់លោក សុខ ទូច។
លោកបានថ្លែងថា ”តើមានមនុស្សប៉ុន្មាននាក់គាំទ្រលោក បារ៉ាក់ អូបាម៉ា ប្រធានាធិបតី អាមេរិក? មិនមែនពលរដ្ឋគ្រប់ៗគ្នាគាំទ្រគាត់ឡើយ។ សម្រាប់រដ្ឋាភិបាល យើងនឹងឃើញលទ្ធផលនៃការសិក្សាស្រាវជ្រាវរបស់គាត់ ប៉ុន្តែមិនប្រាកដថា ត្រូវទទួលយកលទ្ធផលនេះទេ”។
នៅក្នុងសុន្ទរកថារយៈពេល៣ម៉ោងពាក់ព័ន្ធបញ្ហាព្រំដែនកាលពីថ្ងៃអង្គារ លោក ហ៊ុន សែន បានលើកឡើងថា លោកគឺជាអ្នកគាំទ្រ មុនគេចំពោះការសិក្សាស្រាវជ្រាវរបស់លោក សុខ ទូច ដែលឈរនៅភាគីខាងរដ្ឋាភិបាលប្រឆាំងការអះអាងរបស់គណបក្សសង្គ្រោះជាតិដែលថា មានការប្រើប្រាស់ផែនទីមិនត្រឹមត្រូវក្នុងការកំណត់ព្រំដែន។
លោក ហ៊ុន សែន បានមានប្រសាសន៍ថា “ខ្ញុំសូមសរសើរឯកឧត្ដម សុខ ទូច ដែលធ្វើការលើបញ្ហាផែនទីដោយឯករាជ្យ និងតម្លាភាព។ រដ្ឋាភិ បាលលើកទឹកចិត្តដល់ការសិក្សាស្រាវជ្រាវនេះ”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានលើកឡើងថា គណបក្សប្រឆាំងមិនចាប់អារម្មណ៍លើការសិក្សាស្រាវ ជ្រាវរបស់លោក សុខ ទូច ឡើយ។ គណបក្សប្រឆាំងមានតំណាងរាស្ត្រផ្ទាល់ខ្លួនដែលអាចចុះទៅពិនិត្យផ្ទៀងផ្ទាត់ព្រំដែនបាន ហើយលោកបានបដិសេធមិនធ្វើអត្ថាធិប្បាយ ថា តើគណបក្សរបស់លោកនឹងទទួលយកលទ្ធផលនៃការស្រាវជ្រាវនេះឬយ៉ាងណា។
លោកបានមានប្រសាសន៍ថា “យើងមិនចង់ពាក់ព័ន្ធនៅក្នុងអ្វីដែលគាត់បានធ្វើទេ។ យើងមានក្រុមតំណាងរាស្ត្រផ្ទាល់ខ្លួនហើយ។ មានការឆ្លើយតបអវិជ្ជមានជាច្រើនពីពលរដ្ឋ និងអ្នកអង្កេតការណ៍ ចំពោះអ្វីដែលគាត់កំពុងធ្វើ ហេតុដូច្នេះយើងមិនចង់ធ្វើអត្ថាធិប្បាយទេ”៕ ស៊ុយឈាង