26 C
Phnom Penh

សកម្មជន​​​គណបក្ស​​​សង្គ្រោះជាតិ​​​ជាប់​​​ពន្ធនាគារ​​​រយៈ​​​ពេល​​​២​​​ឆ្នាំ ​​​បន្ថែម​​​ទៀត​​​ពាក់​​​ព័ន្ធ​​​នឹង​​​ការ​​​តវ៉ា​​​

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិល​​​មិញ ​​​លោក ​​​អ៊ុក ​​​ពេជ្រ​​​សំណាង សកម្មជន​​​បក្ស​​​ប្រឆាំង​​​ដែល​​​កំពុង​​​ជាប់់​​​ពន្ធនាគារ​​​បាន​​​អំពាវ​​​នាវ​​​ឲ្យ​​​សហគមន៍​​​អន្តរជាតិ​​​​​​ថ្កោល​​​ទោស​​​ប្រព័ន្ធ​​​តុលាការ​​​កម្ពុជា​​​បន្ទាប់​​​ពី​​​លោក​​​ត្រូវ​​​បាន​​​ផ្តន្ទាទោស​​​ឲ្យជាប់​​​ពន្ធនាគារ​​​២​​​ឆ្នាំ​​​បន្ថែម​​​ទៀត​​​ពីបទ​​​បង្ក​​​អំពើ​​​ហិង្សា​​ដោយ​​​ចេតនា​​​ និង​​​រារាំង​​​មន្ត្រី​​​សាធារណៈ​​​ ​​​ទោ​​ះ​​​បីជា​​​គ្មាន​​​ភ័ស្តុ​​​តាង​​​ដាក់​​​បន្ទុក​​​លើ​​​រូប​​​លោក​​​ក៏​​​ដោយ​​​។

លោក អ៊ុក​​​​​​ ពេជ្រ​​​សំណាង សកម្មជន​​​កំពុង​​​ជាប់​​​ពន្ធនាគារ​​​ត្រូវ​​​នគរ​​​បាល​​​ក្រៀក​​​ចូល​​​ក្នុង​​​សាលា​​​ដំបូង​​​រាជធានីភ្នំពេញ កាល​​​ពីម្សិលមិញ។ លោក​​​ត្រូវ​​​បាន​​​ផ្តន្ទាទោស​​​ឲ្យជាប់​​​ពន្ធនាគាររយៈ​​​ពេល​​​​​​២​​​ឆ្នាំ​​​បន្ថែម​​​ទៀត​​​។ រូបថតៈ Jens Welding Ollgaard /The Cambodia Daily
លោក អ៊ុក​​​​​​ ពេជ្រ​​​សំណាង សកម្មជន​​​កំពុង​​​ជាប់​​​ពន្ធនាគារ​​​ត្រូវ​​​នគរ​​​បាល​​​ក្រៀក​​​ចូល​​​ក្នុង​​​សាលា​​​ដំបូង​​​រាជធានីភ្នំពេញ កាល​​​ពីម្សិលមិញ។ លោក​​​ត្រូវ​​​បាន​​​ផ្តន្ទាទោស​​​ឲ្យជាប់​​​ពន្ធនាគាររយៈ​​​ពេល​​​​​​២​​​ឆ្នាំ​​​បន្ថែម​​​ទៀត​​​។ រូបថតៈ Jens Welding Ollgaard /The Cambodia Daily

លោក​​​ អ៊ុក​​​ ពេជ្រសំណាង ដែលកំពុង​​​​​​អនុវត្ត​​​ទោស​​​ជាប់​​​ពន្ធនាគារ​​​រយៈ​​​ពេល​​​៧​​​ឆ្នាំ​​​​​​ស្រាប់​​​​​​ពីបទ​​​ “ចូល​​​រួម​​​កុបកម្ម​​​”  ពាក់​​​ព័ន្ធ​​​ការ​​​តវ៉ា​​​ដ៏​​​ហិង្សា​​​មួយ​​​ក្បែរ​​​ទី​​​លាន​​​ប្រជា​​​ធិបតេយ្យ​​​កាល​​​ពីខែ​​​កក្កដា​​​ ឆ្នាំ​​​២០១៤​​​ ត្រូវ​​​បាន​​​រក​​​ឃើញ​​​ថា មាន​​​ពិរុទ្ធ​​​ភាព​​​ ដោយ​​​សារ​​​ជាប់​​​ទាក់​​​ទិន​​​នឹង​​​ការ​​​តវ៉ា​​​កាល​​​ពី​​​​​​ថ្ងៃ​​​ទី​​២០ខែ​​​តុលា ​​​ដែល​​​នៅ​​​ពេល​​​នោះ​​​លោក​​​បាន​​​បើក​​​រ៉ឺម៉ក​​​ម៉ូតូ​​​របស់​​​ខ្លួន​​​បុក​​​ទម្លាយ​​​របាំង​​​ដែក​​​។

អំឡុង​​​ពេល​​​បើក​​​សវនាការ​​​ជំនុំជម្រះ​​​ក្តី​​​សន្តិសុខ​​​ប្រាំ​​​នាក់​​​ដែល​​​រង​​​របួស​​​អំឡុង​​​ការ​​​តវ៉ា​​​បាន​​​ផ្តល់សក្ខីកម្ម​ថា ពួក​​​គេ​​​មិន​​​បាន​​​ឃើញ​​​លោក អ៊ុក ពេជ្រសំណាង ចូល​​​រួម​​​នៅ​​​ក្នុង​​​ការ​​​បង្ក​​​អំពើ​​​ហិង្សា​​​ឡើយ​​​ ប៉ុន្តែ ជឿ​​​ថា គាត់​​​ជា​អ្នក​​​​ត្រូវ​​​ទទួល​​​ខុស​​​ត្រូវ​​​ចំពោះ​​​បញ្ហា​​​នេះ​​​។​​​ ចៅក្រម​​​ អឹុម វណ្ណៈ បាន​​​ប្រាប់​​​តុលាការ​​​កាល​​​ពី​​​ម្សិលមិញ​​​ថា ការ​​​ផ្តន្ទាទោស​​​នេះ​​​វា​​​គ្រប់​​​គ្រាន់​​​ហើយ​​​។

ចៅក្រម​​​ អឹុម វណ្ណៈ បាន​​​ប្រកាស​​​ថា ​​​”សាលា​​​ ដំបូង​​​រាជធានីភ្នំពេញ​​​សម្រេច​​​ ១ឲ្យ​​​លោក អ៊ុក ពេជ្រសំណាង រួច​​​ពីការ​​​ចោទ​​​ប្រកាន់​​​ពីបទ​​​ធ្វើ​​​ឲ្យ​​​ខូច​​​ខាត​​​​ទ្រព្យ​​​សម្បត្តិ​​​ សាធារណៈ​​​ដោយ​​​មាន​​​ស្ថាន​​​ទម្ងន់​​​ទោស​​​ និង​​​ពីបទ​​​ចូល​​​រួម​​​សមាគម​​​ទុច្ច​​​រិត​​​។ ២ [តុលាការ] ​​​បាន​​​ផ្តន្ទាទោស​​​ លោក អ៊ុក​​​ ពេជ្រសំណាង ​​​ឲ្យជាប់​​​ពន្ធនាគារ​​​២ឆ្នាំ​​​ និង​​​ពិន័យ​​​ជា​​​ប្រាក់​​​៤​​​លាន​​​រៀល​​​ ក្រោម​​​ការ​​​ចោទ​​​ប្រកាន់​​​ពីបទ​​​បង្ក​​​អំពើ​​​ហិង្សា​​​ដោយ​​​ចេតនា​​​​​​ ដោយ​​​មាន​​​ស្ថាន​​​ទម្ងន់​​​ទោស និង​​​​​​រារាំង​​​មន្ត្រី​​​សាធារណៈ”។

ចៅក្រម​​​រូប​​​នេះ​​​ ក៏​​​បាន​​​បង្គាប់​​​ឲ្យ​​​លោក​​​អ៊ុក​​​ ពេជ្រសំណាង បង់​​​ប្រាក់​​​សំណង​​​១០​​​លាន​​​​​​រៀល​​​លើ​​​ថ្លៃ​​​ចំណាយ​​​ក្នុង​​​ការ​​​ព្យាបាល​​​សន្តិ​​​សុខ​​​ដែល​​​រង​​​របួស​​​ និង​​​សម្រាប់​​​សម្ភារ​​​ដែល​​​ខូច​​​ខាត​​​របស់​​​សន្តិសុខ​​​ខណ្ឌ​​​ដូន​​​ពេញផង​​​ដែរ​​​​​​។

បន្ទាប់​​​ពី​​​ការ​​​ប្រកាស​​​សាល​​​ក្រម​​​លោក ​​​អ៊ុក​​​ ពេជ្រ​​​សំណាង បាន​​​ក្រោក​​​ឈរ​​​ឡើង​​​ហើយ​​​ប្រាប់​​​តុលាការ​​​ថា ការ​​​សម្រេច​​​នេះ​​​មិន​​​​​​យុត្តិធម៌​​​ទេ។

ចៅក្រម​​​ អឹុម វណ្ណៈ បាន​​​ឆ្លើយ​​​តប​​​ថា “អ្នក​​​ឯង​​​អាច​​​ប្តឹង​​​ទាស់​​​សាល​​​ក្រម​​​នេះ​​​បាន​​​”។

លោក អ៊ុក ពេជ្រសំណាង បាន​​​ឆ្លើយ​​​តប​​​វិញ​​​ថា “មិន​​​ចាំ​​​បាច់​​​ប្តឹង​​​ឧទ្ធរណ៍​​​ទេ ប៉ុន្តែ ខ្ញុំ​​​គ្រាន់​​​តែ​​​ចង់​​​ប្រាប់​​​តុលាការ​​​ឯង​​​ថា អយុត្តិធម៌​​​ចំពោះ​​​ខ្ញុំ​​​។ ប្រមុខ​​​រដ្ឋាភិបាល​​​របស់​​​អ្នក​​​ឯង​​​ញុះញង់​​​ឲ្យ​​​អ្នក​​​ឯង​​​ចាប់​​​យើង​​​ដាក់​​​ពន្ធនាគារ​​​”។​​​លោក​​​បាន​​​បន្ត​​​ទៀត​​​ថា “តុលាការ​​​ឯង​​​ជា​​​​​​តុលាការ ​​​ឧក្រិដ្ឋ​​​កម្ម​​​។ ខ្ញុំ​​​បាន​​​ប្រាប់​​​សារព័ត៌​​​មាន​​​ជាតិ និង​​​អន្តរ​​​ជាតិ​​​ថា សូម​​​ថ្កោល​​​ទោស​​​រឿង​​​េនះ​​​។ ជា​​​ពិសេស​​​អង្គការ​​​សង្គម​​​​​​ស៊ីវិល និង​​​តំណាង​​​អ្នក​​​ច្បាប់​​​សូម​​​ចាប់​​​អារម្មណ៍​​​ឲ្យ​​​បាន​​​ខ្លាំង​​​។ កុំ​​​ធ្វើ​​​ជា​​​រឿង​​​លែង​​​សើច”។

សាក្សី​​​ដែល​​​គេ​​​ហៅ​​​ឲ្យ​​​មក​​​ផ្តល់​​​សក្ខីកម្ម​​​ អំឡុង​​​ការ​​​បើក​​​សវនាការ​​​​​​ជំនុំជម្រះ​​​ក្តី​​​នេះ​គ្មាន​នរណាម្នាក់​​​​​និយាយ​​​ថា សកម្មជន​​​រូប​​​នេះ​​​បាន​​​ធ្វើ​​​លើស​​​ពី​​​ការ​បើក​​​រ៉ឺម៉ក​​​ម៉ូតូ​​​​របស់​​​ខ្លួន​​​បុក​​​ទម្លុះ​​​របាំង​​​របស់​​​សន្តិសុខ​​​ខណ្ឌ​​​ដូន​​​ពេញ​​ និង​​​ឈរ​​​នៅ​​​លើ​​​រ៉ឺម៉ក​​​ម៉ូតូ​ស្រែក​​​​តាម​​​ឧគ្ឃោសន សព្ទ​​​​​​​​​អំឡុង​​​ការ​​​តវ៉ា​​​ឡើយ​​​។ កាល​​​ពី​​​ថ្ងៃ​​​ទី​​​២៥​​​ ខែ​​​សីហា​​​ ជា​​​ថ្ងៃ​​​ចុង​​​ក្រោយ​​​នៃ​​​ការ​​​​​​ បើក​​​សវនាការ​​​ ជំនុំ​​​ជម្រះ​​​ក្តីសន្តិសុខ​​​ទាំង​​​អស់​​​បាន​​​ប្រាប់​​​តុលាការ​​​យ៉ាង​​​ច្បាស់​​​ថា ពួក​​​គេ​​​មិន​​​បាន​​​ឃើញ​​​លោក អ៊ុក​​​​​​ ពេជ្រ​​​សំណាង ចូល​​​រួម​​​ក្នុង​​​ការ​​​បង្ក​​​អំពើ​​​ហិង្សា​​​ដោយ​​​ផ្ទាល់​​​ភ្នែក​​​នោះ​​​ឡើយ​​​ ប៉ុន្តែ បាន​​​បន្ទោស​​​​​​គាត់​​​ចំពោះ​​​ការ​​​ដែល​ធ្វើ​​​ឲ្យ​​​សន្តិសុខ​​​​​​រង​​​របួស​​​​​ក្រោម​​​ដៃ​​​របស់​​​អ្នក​​​តវ៉ា។

ចៅ​​​ក្រម​​​ អឹុម វណ្ណៈ បាន​​​សួរ​​​សន្តិសុខ​​​ម្នាក់​​​ឈ្មោះ នាង សំមករា​​​ អាយុ​​​២៦​​​ឆ្នាំ [ដែល​​​និយាយ​​​ថា ដៃ​​​ស្តាំ​​​ ដៃ​​​ឆ្វេង និង​​​កជើង​​​របស់​​​ខ្លួន​​​ ​​​រង​​​របួសនោះ​] ​​​ថា “តើ​​​លោក អ៊ុក​​​ ពេជ្រ​​​សំណាង ​​​ មាន​​​បាន​វាយ​​​ដំ​​​អ្នក​​​ទេ?​​​”។​ សន្តិសុខ​​​រូប​​​នេះ​​​បាន​​​ឆ្លើយ​​​ថា “ទេ​​​ គាត់​​​មិន​​​បាន​​​វាយ​​​ដំ​​​ខ្ញុំ​​​ទេ​​​ ប៉ុន្តែ គាត់​បាន​​​ដឹក​​​នាំ​​​ពល​​​រដ្ឋ​​​”។

រូប​​​ភាព​​​វីដេអូ​​​រយៈ​​​ពេល​​​៥នាទ​​ី​​​ស្តីអំពី​​​សកម្មជន​​​អាយុ​​​៥៤​​​ឆ្នាំ​​​រូប​​​នេះ​​​ ឈ​​​រ​​​ស្រែក​​​នៅ​​​លើ​​​រ៉ឺម៉ក​​​ម៉ូតូ​​​របស់ខ្លួន​​​ ក៏​​​ត្រូវ​​​បាន​​​យក​​​មក​​​បង្ហាញ​​​នៅ​​​ចំពោះមុខ​​​តុលាការ​​​ដែរ អំឡុង​​​ការ​​​បើក​​​សវនាការជំនុំជម្រះ​​​​កាល​​​ពី​​​ខែ​​​មុន​​​។

លោក ជូង ជូងី មេធាវី​​​របស់​​​លោក អ៊ុក​​​ពេជ្រ​​​សំណាង​​​ បាន​​​និយាយ​​​តាម​​​ទូរស័ព្ទ​​​បន្ទាប់​​​ពី​​​ការ​​​ប្រកាស​​​សាល​​​ក្រម​​​ថា តាម​​​ពិត​​​ទៅ​​​កូនក្តី​​​របស់​​​លោក​​​ទេ ដែល​​​រង​​​របួស​​​អំឡុង​​​ពេល​​​តវ៉ា​​​ ក្រោម​​​ដៃ​​​របស់​​​សន្តិសុខ​​​។ លោក​​​បាន​​​មាន​​​ប្រសាសន៍​​​ថា “ការ​​​សម្រេច​​​​​​នេះ​​​ប្រាស់​​​ ចាក​​​នឹង​​​ភាព​​​យុត្តិធម៌។ តុលាការ​​​គួរ​​​តែ​​​រក​​​ឲ្យ​​​ឃើញ​​​អ្នក​​​ដែល​​​វាយ​​​ដំ​​​ និង​​​ធ្វើ​​​ឲ្យ​​​គាត់​​​របួស​​​បែក​​​ក្បាល ហើយ​​​ដាក់ទោស​​​ទណ្ឌ​​​​ពួកគេ​​​​​​​​ប៉ុន្តែ ​​​​​​គេ​​​បាន​​​ដាក់​​​ទោស​​​ទណ្ឌ​​​អ្នក​​​ដែល​​​ត្រូវ​​​គេ​​​វាយ​​​ដំ​​​ឲ្យ​​​រង​​​របួស​​​បែក​​​ក្បាល​​​ទៅ​​​វិញ​​​”។ ​​​លោក​​​បាន​​​ថ្លែង​​​បន្ថែម​​​ថា “សូម្បី​​​តែ​​​សន្តិសុខ​​​ក៏បាន​​​និយាយដែរ​​​​ថា ពួក​​​គេ​​​មិន​​​បាន​​​ឃើញ​​​ លោក អ៊ុក​​​ ពេជ្រ​​​សំណាង​​​ វាយ​​​ដំ​​​សន្តិសុខ​​​​ឡើយ​​​។ ដូច្នេះ​​​តុលាការ​​​បាន​​​ផ្តន្ទា​​​ទោស​​​គាត់​​​ ដោយ​​​គ្មាន​​​សាក្សី ឬ​​​ភ័ស្តុ​​​តាង​​​ដែល​​​​​​បញ្ជាក់​​​ថា គាត់​​​បាន​​​បង្ក​​​អំពើ​​​ហិង្សា​​​”។

ដោយ​​​អង្គុយ​​​នៅ​​​លើ​​​បង់​​​មួយ​​​ក្រៅ​​​បន្ទប់ សវនាការ អ្នកស្រី ទិត្យ ណារិន អាយុ​​​៤៨​​​ឆ្នាំ​​​ដែល​​​ជា​​​ប្រពន្ធ​​​របស់​​​ លោក អ៊ុក​​​ ពេជ្រ​​​សំណាង​​​​​​បាន​​​លើក​​​ឡើង​​​ថា ទោះ​​​បី​​​ជា​​​ប្តី របស់​​​អ្នក​​​​​​ស្រី​​​បាន​​​និយាយ​​​អ្វី​​​នៅ​​​ក្នុង​​​បន្ទប់​​​សវនាការ​​​ក៏​​​​ដោយ​​​ ក៏​​​អ្នក​​​ស្រី​​​​​​នឹង​​​ប្រាប់​​​លោក ជូង ជូងី ឲ្យ​​​ប្តឹងទាស់​​​នឹង​​​ការ​​​ផ្តន្ទា​​​ទោស​​​នេះដែរ។

​​​អ្នក​​​ស្រី​​​បាន​​​និយាយ​​​ថា “ថ្ងៃ​​​ស្អែក​​​ ខ្ញុំ​​​នឹង​​​ទាក់​​​ទង​​​មេធាវី​​​ដើម្បី​​​ពិភាក្សា​​​អំពី​​​បញ្ហា​​​នេះ ​​​ហើយ​​​យើង​​​នឹង​​​ប្តឹង​​​ទាស់​​​ការ​​​សម្រេច​​​េនះ​​​”។ អ្នក​​​ស្រី​​​បាន​​​បន្ថែម​​​ថា គ្រួសារ​​​របស់​​​អ្នក​​​ស្រី​​​គ្មាន​​​លទ្ធភាព​​​​​បង់​​​ប្រាក់​​​ពិន័យ​​​ ឬ​​​សំណង​​​​ជំងឺ​​​ចិត្ត​​​ឡើយ​។

អ្នក​​​ស្រី​​​បាន​​​និយាយ​​​ទៀត​ថា “តើ​​​ខ្ញុំ​​​មាន​​​លទ្ធភាពបង់​​​យ៉ាង​​​ម៉េច​​​ទៅ បើ​​​ពេល​​​នេះ​​​ខ្ញុំ​​​កំពុង​​​ក្រ​​​ស្រាប់​​​ទៅ​​​ហើយ​​​នោះ។ កូន​​​ប្រុស​​​ច្បង​​​របស់​​​ខ្ញុំ​​​ទើប​​​តែ​​​ស្លាប់ ហើយ​​​ឪពុក​​​របស់​​​គេ​​​ក៏​​​ជាប់​​​គុក​​​ទៀត​​​។​​​របស់​​​រ​​ប​​​រ​ទាំង​​​អស់​​​របស់​​​ខ្ញុំ​​​ដូច​​​ជា​​​មេក្រូ​​​ និង​​​រ៉ឺម៉ក​​​ម៉ូតូ​​​​សុទ្ធ​​​តែ​​​ខូច​​​ខាត​​​អស់​​​ហើយ​​​ ហើយ​​​គ្មាន​​​នរណា​​​រក​​​ដំណោះ​​​ស្រាយ​​​ឲ្យ​​​ទេ​​​”៕ ស៊ុយឈាង​​​​​​

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស