ស្នងការរងនគរបាលខេត្តកំពង់ឆ្នាំងបានបដិសេធការអះអាងដែលថា លោកបានយកលុយជាង២០០.០០០ដុល្លារ ជាថ្នូរនឹងការឲ្យបេក្ខជនប្រហែល១០០នាក់ប្រឡងជាប់ចូលបម្រើការងារជាមន្ត្រីនគរបាល។
យោងតាមលិខិតមួយច្បាប់ដែលចុះផ្សាយក្នុងគេហទំព័ររបស់អង្គភាពប្រឆាំងអំពើពុករលួយ (ACU) បានឲ្យដឹងថា លោក ស៊ុំ សុជាតិ ស្នងការរងនគរបាលខេត្តទទួលផែនធនធានមនុស្ស ត្រូវបានចោទប្រកាន់ថា បានយកលុយ៣០ដុល្លារពីបេក្ខជនម្នាក់ៗដែលដាក់ពាក្យសុំប្រឡង និងលុយជាង២.០០០ដុល្លារទៀតប្រសិនបើបេក្ខជននោះចង់ប្រឡងជាប់។
លិខិតគ្មានចុះកាលបរិច្ឆេទនេះមានខ្លឹមសារថា “ លោក ស៊ុំ សុជាតិ ត្រូវបានចោទប្រកាន់ថាបានយកលុយពីបេក្ខជនប្រឡងជាប់ក្របខ័ណ្ឌនគរបាលជាតិនៅស្នងការដ្ឋាននគរបាលខេត្តកំពង់ឆ្នាំងក្នុងឆ្នាំ២០១៤ ចាប់ពីចំនួន២.០០០ដុល្លារទៅ២.៥០០ដុល្លារក្នុងម្នាក់ៗ”។
បន្ថែមពីលើការសូកបា៉ន់នោះ លោក ស៊ុំ សុជាតិ ក៏ត្រូវបានចោទប្រកាន់ផងដែរថា បានប្រើប្រាស់តួនាទីរបស់ខ្លួនជាប្រធានផែនធនធានមនុស្ស បើកយកប្រាក់បៀវត្សរ៍របស់មន្ត្រីនគរបាលខេត្តពីររូបដែលមិនបម្រើការងារ។ លោក ស៊ុំ សុជាតិ មិនអាចទាក់ទងបានទេកាលពីម្សិលមិញ។
ទោះជាយ៉ាងណា លិខិតរបស់ ACU ដែលបានចោទប្រកាន់លោក ស៊ុំ សុជាតិ ក៏រួមមានការឆ្លើយតបដែលស្នងការរងរូបនេះបដិសេធការចោទប្រកាន់ទាំងនោះផងដែរ។
ជាការឆ្លើយតបលោក ស៊ុំ សុជាតិ ថ្លែងថា លោកធ្លាប់បានលក់ពាក្យសុំប្រឡងក្នុងមួយច្បាប់៥.០០០រៀល ហើយបានប្រាក់សរុបចំនួន១.២៥០.០០០រៀលយកទៅឲ្យអគ្គស្នងការដ្ឋាននគរបាលជាតិក្នុងរាជធានីភ្នំពេញ។
លិខិតដដែលនេះបន្តថា ស្នងការរងរូបនេះគ្រាន់តែជាសមាជិកម្នាក់ក្នុងគណៈកម្មការប្រឡងដែលកំណត់ឲ្យបេក្ខជនជាប់-ធ្លាក់ ប៉ុណ្ណោះ។ ក្នុងចំណោមសមាជិកគណៈកម្មការប្រឡងក៏រួមមានអភិបាលរងខេត្តផងដែរ។
លិខិតដដែលនេះមានខ្លឹមសារបន្ថែមទៀតថា “ដូច្នេះ គាត់ពុំអាច ឬពុំបានយកលុយពីបេក្ខជនចំនួន១១៣នាក់ ក្នុងមា្នក់ៗចាប់ពី២.០០០ដុល្លារទៅ២.៥០០ដុល្លារ ជាថ្នូរនឹងការប្រឡងជាប់ដូចព័ត៌មានរាយការណ៍ឡើយ”៕ សារុន