38 C
Phnom Penh

ក្រសួង​​​កសិកម្ម​​​ដាក់​​​ចេញ​​​ផែនការ​​​ទប់​​​ស្កាត់​​​ជំងឺជ្រូក​​​ត្រចៀក​​​ខៀវ​​​

ដោយ ឌឹ ខេមបូឌា ដេលី

បទវិភាគ

មន្ត្រី​​​ម្នាក់​​​បាន​​​និយាយ​​​កាល​​​ពី​​​ម្សិលមិញ​​​ថា ពេទ្យ​​​សត្វ​​​ប្រហែល​​​១៣.០០០នាក់​​​នៅ​​​ទូទាំង​​​ប្រទេស​​​​​​ត្រូវ​​​បាន​​​គេ​​​ស្នើ​​​សុំ​​​ឲ្យ​​​ជួយ​​​ពិនិត្យ​​​ការ​​​ដឹក​​​ជញ្ជូន​​​ជ្រូក​​​ ជា​​​ការ​​​ឆ្លើយ​​​តប​​​ទៅ​​​នឹង​​​ការ​​​ផ្ទុះ​​​ឡើង​​​នា​​​ពេល​​​ថ្មី​​​ៗ​​​នូវ​​​ជំងឺ “ជ្រូក​​​ត្រចៀក​​​ខៀវ” ក្នុង​​​ខេត្ត​​​សៀម​​​រាប ដែល​​​បណ្តាល​​​ឲ្យ​​​ងាប់​​​សត្វ​​​ច្រើន​​​ជាង​​​១.០០០ក្បាល​​​។

លោក ឡោ រស្មី អ្នក​​​នាំ​​​ពាក្យ​​​ក្រសួង​​​កសិកម្ម​​​ បាន​​​មាន​​​ប្រសាសន៍​​​ថា សេចក្តី​​​ប្រកាស​​​មួយ​​​ត្រូវ​​​បាន​​​ចេញ​​​កាល​​​ពី​​​ដើម​​​សប្តាហ៍​​​នេះ​​​ ដោយ​​​លម្អិត​​​អំពី​​​វិធាន​​​ការ​​​ដើម្បី​​​ទប់​​​ស្កាត់​​​ជំងឺ​​​នេះ​​​កុំ​​​ឲ្យ​​​រាល​​​ដាល​​​។ លោក​​​បាន​​​ឲ្យ​​​ដឹង​​​ទៀត​​​ថា ករណី​​​ថ្មី​​​ៗ​​​​​​ត្រូវ​​​បាន​​​គេ​​​រក​​​ឃើញ​​​ គឺ​​​ផ្ទុយ​​​ពី​​​ការ​​​អះ​​​អាង​​​ដែល​​​ធ្វើ​​​ឡើង​​​ដោយ​​​លោក ឃឹម ប៊ុនសុង​​​​​​ អភិបាល​​​ខេត្ត​​​សៀម​​​រាប​​​កាល​​​ពី​​​ថ្ងៃ​​​អង្គារ ដែល​​​ថា ការ​​​ឆ្លង​​​ជំងឺ​​​ត្រូវទប់​​​ស្កាត់​​​បាន​​​ទាំង​​​ស្រុង​​​។

លោក​​​ រស្មី បាន​​​មាន​​​ប្រសាសន៍​​​ថា “ក្រសួង​​​កសិកម្ម​​​មាន​​​ពេទ្យ​​​សត្វ​​​ប្រហែល​​​១៣.០០០​​​នាក់​​​ មាន​​​នៅ​​​គ្រប់​​​ភូមិ​​​​​​ក្នុង​​​ប្រទេស​​​ ដើម្បី​​​ពិនិត្យ​​​ការ​​​ដឹក​​​ជញ្ជូន និង​​​ការ​​​លក់​​​ជ្រូក​​​  ធ្វើ​​​ឲ្យ​​​ប្រាកដ​​​ថា ​​​មាន​​​ការ​​​បាញ់​​​ថ្នាំ​​​សម្លាប់​​​មេរោគ​​​ និង​​​ការ​​​ចាក់​​​ថ្នាំ​​​ជ្រូក​​​ ព្យាបាល​​​ជ្រូក​​​ឈឺ និង​​​អប់​​​រំ​​​អ្នក​​​ភូមិ​​​ឲ្យ​​​ចូល​​​រួម​​​ក្នុង​​​ការ​​​ពិនិត្យ​​​រហូត​​​ដល់​​​ដើម​​​ខែ​​​តុលា”។

លោកបាន​​​បន្ថែម​​​ថា “ប្រសិន​​​បើ​​​យើង​​​មិន​​​​​​មាន​​​វិធានការ​​​បន្ថែម​​​ទេ​​​នោះ​​​ ការ​​​ផ្ទុះ​​​និង​​​ការ​​​រាល​​​ដាល​​​ជំងឺ​​​​​​អាច​​​កើត​​​ឡើង​​​ជា​​​ថ្មី​​​ទៀត​​​”។

លោក​​​បាន​​​មាន​​​ប្រសាសន៍​​​ថា ក្នុង​​​ពេល​​​ប៉ុន្មាន​​​ថ្ងៃ​​​ថ្មី​​​ៗ​​​នេះ​​​ ជ្រូក​​​១០​​​ក្បាល​​​បាន​​​ងាប់​​​ដោយ​​​សារ​​​ជំងឺ​​​នេះ​​​ក្នុង​​​ខេត្ត​​​សៀមរាប​​​ ហើយ​​​ការ​​​ឆ្លង​​​ជំងឺ​​​ក៏​​​ត្រូវ​​​បាន​​​រក​​​ឃើញ​​​ក្នុង​​​ខេត្ត​​​កំពង់​​​ចាម​​​ និង​​​ខេត្ត​​​ស្វាយ​​​រៀង​​​ដែរ​​​។

សេចក្តី​​​ប្រកាស​​​ក៏​​​តម្រូវ​​​ឲ្យ​​​ប្រជា​​​ពល​​​រដ្ឋ​​​ជូន​​​ព័ត៌​​​មាន​​​ដល់​​​ពេទ្យ​​​សត្វ ប្រសិន​​​បើ​​​ពួក​​​គេ​​​មាន​​​ផែន​​​ការ​​​ចិញ្ចឹម​​​ជ្រូក​​​ក្នុង​​​តំបន់​​​ដែល​​​កើត​​​មាន​ជំងឺ​​​។ ក្រសួង​​​កសិកម្ម​​​បាន​​​ចេញ​​​សេចក្តី​​​ប្រកាស​​​ព័ត៌មាន​​​មួយ​​​កាល​​​ពី​​​ថ្ងៃ​​​អង្គារ ដោយ​​​ហាម​​​ប្រាម​​​ការ​​​នាំ​​​ជ្រូក​​​ចូល​​​ពី​​​ប្រទេស​​​ផ្សេង​​​ទៀត​​​ដោយ​​​គ្មាន​​​ការ​​​អនុញ្ញាត​​​។

លោក​​​ គោសុ៊ម សារឿត អភិបាល​​​ខេត្ត​​​បន្ទាយ​​​មាន​​​ជ័យ​​​បាន​​​មាន​​​ប្រសាសន៍​​​ថា មន្ត្រី​​​របស់​​​លោក​​​​​​បាន​​​និង​​​កំពុង​​​ពិនិត្យ​​​ជ្រូក​​​ដែល​​​នាំ​​​ចូល​​​ក្នុង​​​ខេត្ត​​​នេះ​​​ពី​​​ប្រទេស​​​ថៃ​​​​​​ និង​​​ខេត្ត​​​សៀមរាប​​​ចាប់តាំង​​​ពី​​​ពាក់​​​កណ្តាល​​​ខែ​​​សីហា​​​មក​​​។

លោក​​​ សារឿត បាន​​​មាន​​​ប្រសាសន៍​​​ថា “យើង​​​ត្រូវ​​​អនុវត្ត​​​ការ​​​ត្រួត​​​ពិនិត្យ​​​តឹង​​​រុឹង​​​ជាង​​​មុន​​​​​​លើ​​​សត្វ​​​ជ្រូក​​​ បន្ទាប់​​​ពី​​​មន្ត្រី​​​ខេត្ត​​​របស់​​​យើង​​​បាន​​​យល់​​​ព្រម​​​ធ្វើ​​​សហការ​​​ជា​​​មួយ​​​មន្ត្រី​​​សុខភាព​​​សត្វ​​​ក្នុង​​​ខេត្ត​​​ផ្សេង​​​ទៀត​​​ និង​​​ក្នុង​​​ប្រទេស​​​ថៃ​​​”។

លោក​​​បាន​​​មាន​​​ប្រសាសន៍​​​ទៀត​​​ថា “ខ្ញុំ​​​បាន​​​ណែ​​​នាំ​​​មន្ត្រី​​​របស់​​​ខ្ញុំ​​​ឲ្យ​​​ពិនិត្យ​​​ការ​​​នាំ​​​ជ្រូក​​​ចូល​​​ពី​​​ខេត្ត​​​សៀម​​​រាប​​​ ហើយ​​​ប្រសិន​​​បើ​​​ពួក​​​គេ​​​រក​​​ឃើញ​​​ជ្រូក​​​ចូល​​​ ពួក​​​គេ​​​ត្រូវ​​ស្នើ​​​សុំ​​​អ្នក​​​​​​នាំ​​​ចូល​​​​​​ឲ្យ​​​យក​​​ជ្រូក​​​ទាំង​​​នោះ​​​​​​ត្រឡប់​​​ទៅវិញ​​​ដើម្បី​​​បាញ់​​​ថ្នាំ​​​សម្លាប់​​​មេរោគ​​​ ឬ​​​ចាក់​​​ថ្នាំ​​​បង្ការ​​​”៕និត​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស