31 C
Phnom Penh

លទ្ធផល​នៃ​​​ការ​​​ប្រឡង​បាក់ឌុប​នៅ​ឆ្នាំនេះ សិស្សប្រឡង​ជាប់​​៥៦ភាគរយ​​

ដោយ ឌឹ ខេមបូឌា ដេលី

បទវិភាគ

ឡាយ មា៉ឡែនពណ្ណរាយ  អាយុ​១៧​ឆ្នាំ ​មាន ​​​​​ក្ដី​រំភើប​ឥត​ឧបមា​​ បន្ទាប់ពីដឹង​ថា កញ្ញា​ប្រឡង​ជាប់​បាក់ឌុប​ទូទាំង​​ប្រទេស​ កាលពី​ថ្ងៃ​សៅរ៍​។

បើ​ទោះ​ជា​កញ្ញា​សិក្សា​រហូត​ដល់​ម៉ោង​១១​​​​រាល់​យប់​ក្នុង​រយៈ​ពេល​ប៉ុន្មាន​សប្ដាហ៍​មុន​​​​ដល់​ថ្ងៃប្រឡង​​ និង​​ភ្ញាក់​ឡើងនៅ​​៥ម៉ោង​ក្រោយ​មក​ដើម្បី​បន្ត​រៀន​ទៀត​ក៏​ដោយ ក៏​ ម៉ាឡែន​ពណ្ណរាយ បាន​និយាយ​ថា កញ្ញាក៏​​បាន​ស្ដាប់​ចម្រៀង​​ផង​ដែរ​។

cam-photo-front-jens1​​មិន​​​យូរ​​​ប៉ុន្មាន​​​បន្ទាប់​ពី​ការ​ប្រកាស​លទ្ធ​​​ផល​តាម​ឧគ្ឃោសនសព្ទនៅវិទ្យាល័យ​បាក់​​​ទូក​ក្នុង​រាជធានី​ភ្នំពេញ​ កាលពី​រសៀល​ថ្ងៃ​សៅរ៍ កញ្ញា​បាន​និយាយថា ”​ខ្ញុំ​បារម្ភ​ថា ខ្ញុំ​​​មិន​ទទួល​បាន​និទ្ទេស​ល្អ​ទេ  ប៉ុន្តែ​នៅពេល​ខ្ញុំឮ​ថា  ខ្ញុំ​ទទួល​បាន​និទ្ទេស​B នោះ ខ្ញុំ​រំភើប​​ជា​ខ្លាំង​”។

ដោយ​មាន​សិស្ស​ចំនួន​៨៣.៣៤១​​នាក់​​ប្រឡង​កាលពី​ថ្ងៃទី​២៤ និង​២៥ ខែ​សីហា ម៉ាឡែនពណ្ណរាយ ​ស្ថិត​ក្នុង​​ចំណោម​សិស្ស​៤៦.៥៦០​នាក់​​ ឬ​ស្មើ​៥៥,៨៧​ភាគរយ​ ដែល​​ បាន​ដឹង​កាលពី​ចុង​សប្ដាហ៍​ថា ខ្លួន​ប្រឡង​ជាប់ដោយធ្វើ​ឲ្យ​ពួកគេ​មានស​ិទ្ធិ​ចុះ​ឈ្មោះ​ចូល​រៀន​នៅ​តាម​សាកលវិទ្យាល័យ​រដ្ឋ​។

​បន្ទាប់ពី​ក្រសួង​អប់រំ​​បាន​អនុវត្ត​កំណែ​​​ទម្រង់​កាលពី​ឆ្នាំ​មុន ដើម្បី​លុប​បំបាត់​ការ​លួច​ចម្លង និង​ការ​សូកប៉ាន់​ដែល​បាន​ញាំញី​ការ​ប្រឡង​កន្លង​មក​ អត្រាប្រឡង​ជាប់​បាន​ថយ​ចុះ​មក​៤០,៦៧​​ភាគរយ​​។ អត្រា​នោះ​​សម្រេច​បាន​បន្ទាប់ពី​មាន​ការ​ប្រឡង​លើក​ទី២​ ដើម្បី​​បន្ថែម​លើ​​អត្រាប្រឡងជាប់​​លើក​ដំបូង​ដែល​មានចំនួន​​​តែ​​​​២៥,៥​ភាគរយ​​​ប៉ុណ្ណោះ ជា​ អត្រា​ទាប​បំផុត​ចាប់​តាំង​ពី​ឆ្នាំ​១៩៩៤​មក​។

យោងតាម​សេចក្តីប្រកាស​របស់ក្រសួង​អប់រំ​បានឲ្យ​ដឹង​ថា នៅ​ឆ្នាំ​នេះ សិស្ស​១០៨​នាក់​​ទទួល​បាន​និទ្ទេស​ A ដោយ​មាន​​ពិន្ទុ​៩០​ភាគរយ ឬ​ខ្ពស់​ជាង​នេះ​ គឺ​កើន​ឡើង​​ច្រើន​​​ជាង​​​កាលពី​ឆ្នាំ​ដែល​មាន​​តែ​១១​នាក់​។

សិស្ស​១.០៨៥​​នាក់​ទៀត​​ទទួល​បាន​និទ្ទេស​B ចំណែក​៣.២៩២​នាក់ ​ទទួល​បាន​និទ្ទេស​C ៦.០៩៣​នាក់​​ទទួល​បាន​និទ្ទេស​D និង​៣៥.៩៨២​នាក់​​ទទួល​បាន​និទ្ទេស​​E ជា​និទ្ទេស​ទាប​បំផុត​ដែល​ត្រឹម​តែ​មួយ​ជាប់​ប៉ុណ្ណោះ​។

ម៉ាន់ កូតា អាយុ​១៧​​ឆ្នាំ ដែល​រៀន​នៅ​វិទ្យាល័យ​បាក់ទូក​​​មាន​ពិន្ទុ​ខ្ពស់​បំផុត​ទូទាំង​ប្រទេស​នៅ​ឆ្នាំ​នេះ​ ដោយ​ទទួលបាន​​​១០០​ភាគរយ​។ សិស្ស​រូប​នេះ​បាន​និយាយ​ថា ខ្លួន​​ទទួល​បាន​ការ​ផ្ដល់​អាហារូបករណ៍​ពី​សាកល​វិទ្យាល័យ​នានា​រួច​ហើយ​។

សិស្ស​រូប​នេះ​បាននិយាយ​តាមទូរស័ព្ទ​កាលពី​ម្សិលមិញ​ថា ​​”​ខ្ញុំ​សប្បាយ​ចិត្ត​ណាស់​ដែល​​​​ទទួល​បាន​លទ្ធផលបែប​​នេះ។ ខ្ញុំ​រំពឹង​ថា ​ទទួល​បាន​និទ្ទេស​D ឬ C ឯណោះ​ ប៉ុន្តែ​នៅ​ ពេល​ខ្ញុំ​បាន​ឃើញ​លទ្ធផល​ថា​ខ្ញុំ​ទទួល​បាន​និទ្ទេស​ A ដែល​ជា​​​ពិន្ទុ​ខ្ពស់​បំផុត​នោះ ធ្វើ​ឲ្យ​ខ្ញុំ​សប្បាយ​ចិត្ត​យ៉ាង​ខ្លាំង”​។សិស្សរូបនេះ​បាន បន្ថែម​ថា ”ខ្ញុំ​គិត​ថា ការ​ប្រឡង​នៅ​ឆ្នាំ​នេះ​ គឺ​ស្រួល​ជាងការ​ប្រឡង​​ឆ្នាំ​មុន​”។

ទោះ​យ៉ាង​ណា លោក ហង់ ជួន ណារ៉ុន រដ្ឋមន្ត្រី​ក្រសួង​អប់រំ​បាន​មាន​ប្រសាសន៍​ថា អត្រា​ប្រឡង​ជាប់​ខ្ពស់​នៅ​ឆ្នាំ​នេះ​​គឺ​ដោយ​សារ​ការ​ប្រឹង​ប្រែង​របស់​សិស្ស​ថ្នាក់​ទី១២​នៅទូ​ទាំង​ប្រទេស​ មិន​​​មែន​​​ដោយ​​​សារ​​​​ការ​ផ្លាស់​ប្ដូរ​ខ្លឹម សារ​នៃ​វិញ្ញាសា​ប្រឡង​ទេ។

លោក​បាន​មាន​ប្រសាសន៍​ថា ”​មនុស្ស​គ្រប់​គ្នា​និយាយ​ថា  ប្រសិន​បើ​សិស្ស​​ប្រឡង​ជាប់ កាន់​តែ​ច្រើន ប្រហែល​ជា​យើង​បាន​បន្ទាប​​​​បទដ្ឋាន​។ ប៉ុន្តែ​យើង​មិន​បាន​បន្ទាប​បទដ្ឋាន​ទេ គឺ​​​​​​សិស្ស​ទាំង​អស់គ្នា​​ប្រឹង​ប្រែង​រៀនសូត្រ”។

​​​​​ ការ​ប្រឹង​ប្រែងរៀន​មិន​ទាន់​គ្រប់​​​គ្រាន​​​់​​​ទេ ព្រោះ​​​​ស្ទើរ​តែ​៤៥​ភាគរយ​នៃ​បេក្ខជន​ទាំង​​​អស់​​​​ប្រឡង​ធ្លាក់។

នៅ​វិទ្យាល័យ​ព្រះស៊ីសុវត្ថិ ក្នុង​រាជធានី​ភ្នំពេញ​​កាលពី​ថ្ងៃ​សៅរ៍ សិស្ស​ស្រី​បួន​នាក់​បាន​និយាយ​លួង​លោម​គ្នា​ទៅវិញ​ទៅ​មក បន្ទាប់ពី​ដឹង​ថា​ពួកគេ​ទាំង​អស់​គ្នា​ប្រឡង​ធ្លាក់​។ សិស្ស​ម្នាក់​បាន​ទ្រោប​ក្បាល​របស់​ខ្លួន​លើ​ស្មា​របស់​មិត្ត​ភក្ដិ​ ដោយ​មាន​ទឹក​ភ្នែក​ហូរ​កាត់​​ផែន​ ថ្ពាល់​ទៀត​ផង​។ កញ្ញា​បាន​និយាយ​ថា កញ្ញា​មិន​ដឹង​​​​ថា ខ្លួន​​​ខុស​​​កន្លែង​​​ណា​​​ទេ​​​​។

ដោយ​បដិសេធ​មិន​ប្រាប់​ឈ្មោះ សិស្ស​រូប​នេះ​បាន​និយាយ​ថា “​ខ្ញុំ​មិន​ដឹង​ថា ហេតុ​អ្វី​បាន​ជា​ខ្ញុំ​ប្រឡង​ធ្លាក់​ឡើយ​។ មុន​ពេល​ប្រឡង​ ខ្ញុំ​រៀន​គ្មាន​ឈប់​ទេ​។លំហាត់​ក៏​មិន​សូវ​ពិបាក​ដែរ”។

ដោយ​លើក​ឡើង​ថា ​ក្រដាស​កិច្ចការ​របស់​​ នាង​ត្រូវ​បាន​ដាក់​ពិន្ទុ​មិន​ត្រឹម​ត្រូវ​ មុន​ពេល​ងាក​​ទៅ​ឱប​មិត្ត​រួម​ថ្នាក់​របស់​ខ្លួន​ កញ្ញា​បាន​​បន្ថែម​ថា “​សិស្ស​មួយ​ចំនួន​ធ្វើ​មិន​បាន​​ល្អ​ដូច​ខ្ញុំ​ផង​ ប៉ុន្តែ​ពួកគេ​​បែរ​ជា​ជាប់​ដោយ​​មាន​ពិន្ទុុ​ល្អ​ជាង​ខ្ញុំ​។ ហេតុ​អ្វី​បាន​ជា​ខ្ញុំ​មិន​ជាប់​”​។

លោក ហង់ ជួន ណារ៉ុន បាន​មាន​ប្រសាសន៍​ ថា ក្រសួង​​របស់​លោក​​មិន​ទទួល​បាន​ពាក្យ​បណ្ដឹង​ផ្លូវ​ការ​ណាមួយ​អំពី​ដំណើរ​ការ​កំណត់​និទ្ទេស​ឡើយ។ លោក​បាន​មាន​ប្រសាសន៍​ថា   “​ខ្ញុំ​ត្រូវ​បាន​​ទាក់​ទង​តាម​ហ្វេសប៊ុក ប៉ុន្តែ​នៅ​តាម​ហ្វេសប៊ុក​​ខ្ញុំ​មិន​អាច​ធ្វើ​​អ្វី​បាន​ច្រើន​ទេ ពីព្រោះ​​មាន​បញ្ហា​ច្រើន​ណាស់​​។ ខ្ញុំ​គិត​ថា យើង​ត្រូវ​រង់ចាំ​រហូត​ដល់​ពួកគេ​​ដាក់​ពាក្យ​បណ្ដឹង​ផ្លូវ​ការ ហើយ​បន្ទាប់​មក​យើង​អាច​ពិនិត្យ​មើល​បញ្ហា​ទាំង​នោះ​”។

បើ​ទោះ​ណា​ជា​លោក ហង់ ជួន ណារ៉ុន បាន​មាន​ប្រសាសន៍​ថា ​លោក​សប្បាយ​រីក​រាយ​​ជាមួយ​នឹង​លទ្ធផល​នៅ​ឆ្នាំ​នេះ​ក៏ដោយ ក៏​មាន​កិច្ច​ការ​ច្រើន​ទៀត​ដែល​ត្រូវ​ធ្វើ​ដើម្បី​កែលម្អ​ប្រព័ន្ធ​អប់រំ​ថ្នាក់​វិទ្យាល័យ​ដែរ​។

លោក​បាន​​មាន​ប្រសាសន៍​ថា ”​វា​ជា​ការ​ល្អ​ដែល​​​ទទួល​​​បាន​​​លទ្ធផល​​​ដ៏ល្អ​​​ប្រសើរ​​​បែប​​​នេះ​​​សម្រាប់​រយៈ​ពេលតែ​​​​១​ឆ្នាំ ។ ប៉ុន្តែ​វា​មិន​ទាន់​គ្រប់​គ្រាន់​ទេ”៕ សារុន​​​​​​​​      

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស