កាលពីម្សិលមិញ សាលាដំបូងខេត្តត្បូងឃ្មុំបានចោទប្រកាន់បុរសម្នាក់ពីបទសម្លាប់ប្រពន្ធរបស់ខ្លួនដែលមានផ្ទៃពោះ បន្ទាប់ពីប្រទះឃើញសាកសពកាលពីព្រឹកថ្ងៃសុក្រ។
លោក ចាន់ ឌុល ប្រធានអង្គភាពនគរបាលយុត្តិធម៌ស្រុកមេមត់ បានមានប្រសាសន៍ថា ជនសង្ស័យ ស៊ា ក្រុល អាយុ២៥ឆ្នាំត្រូវបានចោទប្រកាន់ពីបទសម្លាប់ប្រពន្ធរបស់ខ្លួនឈ្មោះ ពុំ ស្រីមុំ អាយុ២២ឆ្នាំ មានផ្ទៃពោះ៧ខែ ដោយចេតនា។
លោកបានមានប្រសាសន៍ថា “ចៅក្រមស៊ើបសួរបានសម្រេចឃុំខ្លួនជនសង្ស័យរូបនេះបណ្ដោះអាសន្ន ហើយយើងបានបញ្ជូនជននេះទៅពន្ធនាគាររួចហើយ”។
លោក បេង រិទ្ធី នាយប៉ុស្តិ៍ឃុំជាំក្រវៀន បានមានប្រសាសន៍ថា ក្រុមមន្ត្រីបានប្រទះឃើញសាកសពរបស់ស្ត្រីរូបនេះនៅលើគ្រែនៅម៉ោងប្រហែល៧ព្រឹកថ្ងៃសុក្រ បន្ទាប់ពីទទួលបានពាក្យបណ្ដឹងពីអ្នកភូមិ ហើយថា ក្រុមស៊ើបអង្កេតសង្ស័យថា ការសម្លាប់នេះកើតឡើងនៅម៉ោងប្រហែល៤ទៀបភ្លឺ។
លោកបានមានប្រសាសន៍ថា ស៊ា ក្រុល បដិសេធថា ខ្លួនមិនបានសម្លាប់ប្រពន្ធរបស់ខ្លួនទេ ហើយបានអះអាងថា ខ្លួនបានចាកចេញពីផ្ទះនៅម៉ោងប្រហែល៣និង៣០នាទីរំលងអធ្រាត ដើម្បីទៅថែទាំងចម្ការកៅស៊ូតូចមួយរបស់ពួកគេ។
ប៉ុន្តែលោក រិទ្ធី បានមានប្រសាសន៍ថា អ្នកជិតខាងបានប្រាប់មន្ត្រីរបស់លោកថា ពួកគាត់បានឮការឈ្លោះទាស់ទែងគ្នានៅក្នុងផ្ទះម៉ោងប្រហែល៤ទៀបភ្លឺ ហើយថា ក្រោយមកមានមនុស្សចេញពីផ្ទះដោយមានបញ្ចាំងពិលទៀតផង។
លោកបានថ្លែងថា មន្ត្រីរបស់លោកបានដកហូតកាំបិតដែលប្រើសម្រាប់ចៀរជ័រកៅស៊ូដែលស៊ីគ្នាទៅនឹងស្នាមរបួសនៅលើក្បាលរបស់ស្ត្រីជាប្រពន្ធ៕ សារុន