នគរបាលបាននិយាយកាលពីម្សិលមិញថា មនុស្សបួននាក់បានស្លាប់ និងប្រាំនាក់ទៀតរងរបួសក្នុងខណ្ឌពោធិ៍សែនជ័យរាជធានីភ្នំពេញ កាលពីថ្ងៃអាទិត្យ បន្ទាប់ពីមានគ្រោះថ្នាក់ចរាចរណ៍តូចតាចមួយរវាងម៉ូតូពីរគ្រឿង ដែលបានបណ្តាលឲ្យមានការបុកតគ្នាបន្តបន្ទាប់ទៀតរវាងរថយន្តកុងតឺន័រ រថយន្តមួយបាំងកន្លះ និងរថយន្តទំនើបមួយគ្រឿង។
យោងតាមលោក សេង ចាន់ថុន នាយនគរបាលចរាចររាជធានីផ្នែកវាស់វែងគ្រោះថ្នាក់ចរាចរណ៍បានឲ្យដឹងថា គ្រោះថ្នាក់នេះបានកើតឡើងនៅពេលម៉ូតូពីរគ្រឿងដែលបើកបរបញ្ច្រាសទិសគ្នាបានបុកគ្នានៅតាមផ្លូវជាតិលេខ៤ ក្បែរសាលាក្តីខ្មែរក្រហម នៅម៉ោងប្រហែល៦និង៣០នាទីល្ងាចបណ្តាលឲ្យអ្នកបើកបរពីរនាក់រងរបួសស្រាល។
លោក ចាន់ថុន មានប្រសាសន៍ថា ”ពីរបីនាទីបន្ទាប់ពីម៉ូតូទាំងពីរបានបុកគ្នា រថយន្ត កុងតឺន័រមួយគ្រឿងបើកបរក្នុងល្បឿនយ៉ាងលឿន បានវាក់អឺគ្រោះថ្នាក់ចរាចរណ៍នៅខាងមុខ។ រថយន្តនេះបានបួងចង្កូតចូលទៅគន្លងផ្លូវរបស់រថយន្តតូយូ៉តា RAV4 “។
លោកបានមានប្រសាសន៍បន្តថា “រថយន្តកុងតឺន័រនេះបានព្យាយាមបើកគេចកុំឲ្យប៉ះម៉ូតូដែលបុកគ្នានោះ ដោយបើកចូលក្នុងគន្លងផ្លូវម្ខាងទៀត។ខណៈដែលរថយន្តកុងតឺន័រនេះព្យាយាមបើកគេចទៅគន្លងផ្លូវម្ខាងទៀតនោះវាបានជ្រុលទៅបុករថយន្តមួយគ្រឿង ទៀតដែលបើកក្នុងទិសដៅបញ្ច្រាសគ្នា”។
លោកបានបន្តថា “រថយន្តកុងតឺន័របានបុករថយន្ត RAV4 បណ្តាលឲ្យអ្នកបើកបររថយន្ត RAV4 ស្លាប់ ហើយអ្នករួមដំណើរម្នាក់ទៀតដែលជិះនៅកៅអីខាងមុខ ក៏ស្លាប់ដែរ។ ចំណែកអ្នករួមដំណើរពីរនាក់ទៀតបានរងរបួស”។
នាយផ្នែករូបនេះបានឲ្យដឹងទៀតថា ពេលនោះ មានមនុស្សពីរនាក់ទៀតដែលធ្វើដំណើរតាមម៉ូតូមួយគ្រឿងទៀត ក៏បានជ្រុលទៅបុកផ្នែកខាងក្រោយរថយន្តតូយ៉ូតាដែរ មុនពេលរថយន្តមួយបាំងកន្លះមួយគ្រឿងផ្សេងទៀតបានជ្រុលទៅ បុកពួកគេ។
លោកបានមានប្រសាសន៍ថា “អ្នកជិះម៉ូតូបានរងរបួសធ្ងន់ ហើយនៅពេលបញ្ជូនទៅដល់មន្ទីរពេទ្យគ្រូពេទ្យបានប្រាប់ថា ពួកគេទាំងពីរនាក់ស្លាប់បាត់ទៅហើយ”។
លោក ចាន់ថុន បានថ្លែងថា អ្នកបើកបររថយន្តកុងតឺន័រ ដែលបានបើកចូលគន្លងផ្លូវគេបានរត់គេចខ្លួនពីកន្លែងកើតហេតុ ហើយថា មនុស្សប្រាំនាក់ដែលនៅរស់ពីគ្រោះថ្នាក់នោះ ត្រូវបានបញ្ជូនទៅព្យាបាលនៅមន្ទីរពេទ្យក្នុងរាជធានីភ្នំពេញ៕សារុន