នគរបាលខេត្តតាកែវបានឲ្យដឹងកាលពីម្សិលមិញថា បុរសម្នាក់បានសម្លាប់ខ្លួនឯងបន្ទាប់ពីសម្លាប់ប្រពន្ធ កាលពីថ្ងៃអាទិត្យ អំឡុងពេលមានការឈ្លោះប្រកែកគ្នានៅពេលបុរសរូបនេះត្រឡប់មកពីមើលប្រដាល់ វិញទាំងស្រវឹងអំឡុងពេលយប់។
លោក សែម ស៊ុន នាយប៉ុស្តិ៍ឃុំអង្គប្រាសាទ ក្នុងស្រុកគិរីវង់ បានឲ្យដឹងកាលពីម្សិលមិញថា បុរសជាប្តីឈ្មោះ ស្រេង រ៉ា អាយុ៤៣ឆ្នាំបានត្រឡប់ទៅតង់ដែលគ្រួសាររបស់គាត់បានរស់នៅជាបណ្ដោះអាសន្នក្នុងរោងចិញ្ចឹម ទានៅម៉ោងប្រហែល១០យប់ ក្រោយពេលត្រឡប់មកពីមើលប្រដាល់នៅហាងកាហ្វេមួយកន្លែងក្បែរនោះ។
លោក បានឲ្យដឹងទៀតថា កូនស្រីអាយុ១៤ឆ្នាំរបស់ប្ដីប្រពន្ធទាំងពីរនាក់នេះបានប្រាប់នគរបាលថា ម្ដាយរបស់នាងឈ្មោះ សាំង ពៅ ដែលមានអាយុ៤៣ឆ្នាំដែរនោះ បានចាប់ផ្ដើមឈ្លោះប្រកែកគ្នាជាមួយឪពុករបស់នាង ដោយបន្ទោសគាត់ថាមិនដែលជួយធ្វើការងារសោះ ហើយថា ពួកគាត់ទាំងពីរតែងតែឈ្លោះប្រកែកគ្នា។
លោកបានមានប្រសាសន៍ថា “ប្រពន្ធប្រហែលជាចាក់ភ្លៅប្ដីរបស់ខ្លួនមុន ហើយបន្ទាប់មកបុរសជាប្ដីបានឆក់យកកាំបិតអារកប្រពន្ធរបស់ខ្លួនតែម្ដង”។
នាយប៉ុស្តិ៍រូបនេះបានឲ្យដឹងបន្តទៀតថា កូនស្រីអាយុ១៤ឆ្នាំម្នាក់នេះបានរត់ទៅហៅអ្នកជិតខាងម្នាក់ឲ្យជួយ ហើយថា នៅពេលអ្នកជិតខាងនោះបានទៅដល់ឃើញ ស្រេង រ៉ា កំពុងកាន់កាំបិត ហើយប្រពន្ធរបស់គាត់ហូរឈាមតាមបំពង់កជោកដី ប៉ុន្តែនៅរស់នៅឡើយ។
បន្ទាប់មកអ្នកជិតខាងម្នាក់នេះបានរត់ទៅហៅអ្នកភូមិផ្សេងទៀត ប៉ុន្តែនៅពេល គាត់ត្រឡប់មកវិញជាមួយអ្នកភូមិមួយក្រុម បុរសជាប្ដីរូបនេះបានដេកស្លាប់នៅក្រៅតង់ ហើយប្រពន្ធរបស់គាត់ក៏ស្លាប់បាត់ហើយដែរ។ “គាត់សម្លាប់ខ្លួនឯង ខណៈអ្នកជិតខាងរត់ទៅហៅអ្នកភូមិផ្សេងទៀតឲ្យមកជួយ។ ប្រពន្ធរបស់គាត់ចាក់គាត់ចំភ្លៅពីរកាំបិត ប៉ុន្តែគាត់គ្រាន់តែរបួសប៉ុណ្ណោះមិនទាន់ស្លាប់ទេ។ក្រោយមកគាត់បានចាក់ពោះខ្លួនឯងនៅខាងក្រៅតង់”។
លោក សែម ស៊ុន បានមានប្រសាសន៍ទៀតថា ស្រេង រ៉ា បានហៅឲ្យអ្នកជិតខាងដែលទៅដល់កន្លែងកើតហេតុដំបូងគេឲ្យជួយប្រពន្ធរបស់ខ្លួន ហើយលោកសង្ស័យថា គាត់សម្លាប់ខ្លួនឯងបន្ទាប់ពីប្រពន្ធគាត់ដាច់ខ្យល់ស្លាប់។ ប្ដីប្រពន្ធទាំងពីនាក់នេះក៏មានកូនស្រីពីរនាក់ទៀតផងដែរ ម្នាក់អាយុប្រហែល១ឆ្នាំ និងម្នាក់ទៀតអាយុ១៧ឆ្នាំ ដែលបានចេញទៅរកការងារធ្វើ ហើយ ថា បងស្រីរបស់ស្ត្រីរងគ្រោះ ត្រូវទទួលបន្ទុក ចិញ្ចឹមបីបាច់កូនដែលនៅក្មេងៗនៅឡើយទាំងពីរនាក់នេះ[ម្នាក់អាយុប្រហែល១ឆ្នាំនិងម្នាក់ទៀតអាយុ១៤ឆ្នាំ]៕ ស៊ុយឈាង