កងរាជអាវុធហត្ថខេត្តកំពង់ឆ្នាំងបានឲ្យដឹងថា ខ្លួនបានរកឃើញឈើគ្រញូងទម្ងន់២៩០គីឡូក្រាមនៅផ្នែកក្រោយនៃរថយន្តស៊េរី ទំនើបមួយគ្រឿងពាក់ស្លាកលេខខេមរភូមិន្ទកាលពីម្សិលមិញ ប៉ុន្តែចាប់មិនបានអ្នកបើកបរដែលគេចខ្លួនតាមរថយន្តមួយគ្រឿងទៀតដែលបើកតាមពីក្រោយឡើយ។
លោក គិត គន្ធា មេបញ្ជាការកងរាជអាវុធហត្ថស្រុកបរិបូរណ៍បានលើកឡើងថា មន្ត្រីរបស់លោកទទួលបានដំណឹងថា មានការដឹកឈើតាមបណ្ដោយផ្លូវជាតិលេខ៥ ហើយបានឃាត់រថយន្តស៊េរីទំនើបនេះឲ្យឈប់នៅប៉ុស្តិ៍ត្រួតពិនិត្យមួយកន្លែងដែលគេដាក់នៅក្នុងឃុំត្រពាំងច័ន្ទ ស្រុកបរិបូរណ៍នេះនៅម៉ោងប្រហែល៧និង៣០នាទីព្រឹក។
លោកបានមានប្រសាសន៍ថា “យើងបានរកឃើញឈើគ្រញូង១៣ដុំដែលមានទម្ងន់សរុប២៩០គីឡូក្រាមនៅក្នុងរថយន្ត។ ហើយឈើទាំងនេះត្រូវបានយកទៅរក្សាទុកនៅខណ្ឌរដ្ឋបាលព្រៃឈើ”។
លោក តឿម តឿយ មន្ត្រីកងរាជអាវុធហត្ថដែលដឹកនាំប្រតិបត្តិការនេះបានលើកឡើងថា មន្ត្រីរបស់លោកទទួលបានដំណឹងពីភ្នាក់ងារសម្ងាត់។
លោកបានមានប្រសាសន៍ថា “យើងទទួលបានដំណឹងពីភ្នាក់ងាររបស់យើងដែលនិយាយថា នឹងមានរថយន្តសង្ស័យដឹកឈើគ្រញូងបីគ្រឿង បើកឆ្លងកាត់ប៉ុស្តិ៍ត្រួតពិនិត្យរបស់ខ្ញុំ”។ ប៉ុន្តែនៅពេលរថយន្តស៊េរីទំនើបនេះបានឈប់ចម្ងាយពីរបីម៉ែត្រពីប៉ុស្តិ៍ត្រួតពិនិត្យ អ្នកបើកបររថយន្តមួយគ្រឿងនេះបានចេញពីរថយន្តរបស់ខ្លួន ហើយលោតចូលរថយន្តមួយគ្រឿងក្នុងចំណោមរថយន្តពីរគ្រឿងដែលបើកតាមក្រោយ ហើយបន្ទាប់មកបើកទម្លុះរបាំងគេចខ្លួនបាត់។
លោកមានប្រសាសន៍បន្តថា ”យើងចាប់ខ្លួនអ្នកបើកបរមិនបានទេ ព្រោះនៅពេលជននេះឈប់រថយន្ត រូបគេបានរត់ឡើងរថយន្តមួយគ្រឿងទៀតដែលបន្ទាប់មកបានបើករត់បាត់។ អ្នកបើកបររូបនេះបានស្រែកជេរប្រមាថយើង ហើយគំរាមបាញ់មន្ត្រីរបស់ខ្ញុំមុនពេលលោតឡើងរថយន្តមួយគ្រឿងទៀត”។
លោកបានបន្ថែមថា មន្ត្រីរបស់លោកមិនអាចដេញតាមបានឡើយ ព្រោះគ្មានរថយន្តសម្រាប់ដេញតាមអំឡុងពេលនោះ។ ហើយរថយន្តស៊េរីទំនើបដែលគេទុកចោលត្រូវបានយកទៅរក្សាទុកនៅទីបញ្ជាការដ្ឋានកងរាជអាវុហត្ថខេត្ត ហើយថា មន្ត្រីរបស់លោកកំពុងស្វែងរកអត្តសញ្ញាណម្ចាស់រថយន្តនេះ។
លោកបន្ថែមទៀតថា គេជឿថាឈើទាំងនេះដឹកចេញពីខេត្តពោធិ៍សាត់ ហើយមានគោលដៅចូលក្នុងរាជធានីភ្នំពេញ៕ ស៊ុយឈាង