នគរបាលបាននិយាយថា សង្ឃមួយអង្គព្រះជន្ម២០វស្សាត្រូវបានចាប់ខ្លួននៅខេត្តក្រចេះកាលពីម្សិលមិញ បន្ទាប់ពីត្រូវបានផ្សឹកកាលពីថ្ងៃច័ន្ទតាមចោទថា បានលួចចេញ ក្រៅវត្តហើយបានចាប់រំលោភក្មេងស្រីអាយុ១៤ឆ្នាំម្នាក់ដែលសង្ឃអង្គនេះអះអាងថា ខ្លួនស្រឡាញ់។
លោក ហួត លឹមហ៊ាង នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានមានប្រសាសន៍ថា សង្ឃ ណែម ប៊ុនណាង ដែលគង់នៅវត្តតាម៉ៅ ក្នុងស្រុកព្រែកប្រសព្វ ត្រូវបាននគរបាលចាប់ខ្លួនបន្ទាប់ពីមានពាក្យបណ្ដឹងពីម្ដាយក្មេងស្រីរងគ្រោះដែលព្រះសង្ឃអង្គនេះបានចាប់រំលោភកាលពីយប់ថ្ងៃអាទិត្យ។
លោកបានថ្លែងថា ”យើងបានចាប់ខ្លួនសង្ឃដែលត្រូវបានចាប់ផ្សឹករូបនេះផ្អែកតាមពាក្យបណ្ដឹងពីក្រុមគ្រួសារជនរងគ្រោះ។ នៅម៉ោងប្រហែល៩យប់ថ្ងៃអាទិត្យ ជនសង្ស័យរូបនេះបានផ្លាស់ស្បង់ចីវរចេញ ហើយមកចាប់រំលោភក្មេងស្រីរូបនេះនៅផ្ទះរបស់នាងស្ថិតនៅខាងក្រោយវត្ត”។
លោក លឹមហ៊ាង បានថ្លែងថា សង្ឃអង្គនេះបានស្គាល់ក្មេងស្រីរូបនេះ ហើយបានទាក់ទងនាងមុនពេលទៅផ្ទះដែលនាងរស់នៅជាមួយម្ដាយមីង ដើម្បីចង់ដឹងថា នាងនៅផ្ទះតែម្នាក់ឯងមែនឬមិនមែន។
លោក ទួន ណារ៉ា អធិការរងនគរបាលស្រុកបានមានប្រសាសន៍ថា សង្ឃអង្គនេះបានចាប់ក្មេងស្រីរូបនេះរំលោភបន្ទាប់ពីរៀបចំណាត់ជួបនាង។ លោកបានថ្លែងថា ”សង្ឃអង្គនេះប្រាប់ថា ខ្លួនគ្រាន់តែមកលេងតែប៉ុណ្ណោះ ប៉ុន្តែនៅពេលក្មេងស្រីរូបនេះបើកទ្វារ ខ្លួនបានរុញនាងផ្ដួលទៅលើរនាប ហើយបានចាប់រំលោភតែម្ដង។ នៅពេលបងប្អូនជីដូនមួយរបស់ក្មេងស្រីរូបនេះមកដល់ សង្ឃអង្គនេះបានលោតចេញតាមបង្អួច ហើយរត់ទៅកាន់វត្តវិញបាត់។
លោក ណារ៉ា បានថ្លែងថា នគរបាលបានរកឃើញខោខូវប៊យ មួកកាតឹប និងអាវយឺតរបស់សង្ឃអង្គនេះនៅក្បែរផ្ទះក្មេងស្រីរូបនោះ។
ដោយពន្យល់ថា អ្នកទាំងពីរបានជួបគ្នាបន្ទាប់ពីបុណ្យចូលឆ្នាំខ្មែរកាលពីខែមេសា នោះ លោកបានបន្ថែមថា ”ជនសង្ស័យរូបនេះអះអាងថា ខ្លួនមិនបានចាប់រំលោភក្មេង ស្រីរូបនេះទេ ប៉ុន្តែថា ខ្លួនស្រឡាញ់នាង”។
លោក លឹមហា៊ង បានថ្លែងថា ប៊ុនណាង ត្រូវបានផ្សឹកកាលពីថ្ងៃច័ន្ទ មុនពេលនគរបាលចាប់ខ្លួនកាលពីម្សិលមិញ ហើយថា ជននេះនឹងត្រូវបញ្ជូនទៅតុលាការនៅថ្ងៃនេះ ដើម្បីប្រឈមនឹងការចោទប្រកាន់ពីបទរំលោភ។ លោក លឹមហ៊ាង បានពន្យល់ថា “កាលពីម្សិលមិញ មន្ត្រីសង្ឃ និងមន្ត្រីមន្ទីរធម្មការនិងសាសនាខេត្តបានរួមគ្នាផ្សឹកសង្ឃអង្គនេះ។ យើងនឹងបញ្ជូនជននេះទៅសាលា ដំបូងខេត្តនៅថ្ងៃស្អែកដើម្បីធ្វើការចោទប្រកាន់”៕ សារុន