បន្ទាប់ពីត្រួតពិនិត្យដោយអង្គភាពប្រឆាំងអំពើពុករលួយអស់រយៈពេលដ៏យូរ អង្គភាពរដ្ឋចំនួនបីបានរងការចោទប្រកាន់ថាមិនបានធ្វើតាមលក្ខខណ្ឌច្បាប់ក្នុងការផ្តល់កិច្ចសន្យា និងត្រូវបានប្រាប់ឲ្យអនុវត្តតាមលក្ខខណ្ឌ បើពុំនោះទេនឹងត្រូវប្រឈមនឹងការដាក់ទណ្ឌកម្ម។
ក្នុងសេចក្តីប្រកាសបីដោយឡែកពីគ្នាដែលបង្ហោះលើវិបសាយរបស់អង្គភាពប្រឆាំងអំពើពុករលួយ និងចុះថ្ងៃទី៩ខែកញ្ញា អង្គភាពប្រឆាំងអំពើពុករលួយរបស់រដ្ឋាភិបាលបានចោទអគ្គនាយកដ្ឋានប្រៃសណីយ៍នៃក្រសួងទូរគមនាគមន៍កម្ពុជា ទូរគមនាគមន៍កម្ពុជា និងកំពង់ផែស្វយ័តភ្នំពេញថា ជ្រើសរើសអ្នកទទួលកិច្ចសន្យា ដោយមិនអនុវត្តតាមដំណើរការដេញថ្លៃត្រឹមត្រូមួយចំនួន។
ទាក់ទងតាមទូរស័ព្ទ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានមានប្រសាសន៍ថា ការជូនដំណឹងនោះជាការព្រមានមួយដល់អង្គភាពនានាឲ្យកែតម្រូវនីតិវិធីមិនត្រឹមត្រូវទាំងនោះ។
លោកបានមានប្រសាសន៍ថា “អ្វីដែលជាការខ្វះខាតគួរត្រូវតែធ្វើ។ ប្រសិនបើបន្តទៅទៀត យើងនឹងមើលតាមហ្នឹង។ ទោះជាយ៉ាងនេះក្តី អង្គភាពនេះមិនមានសិទ្ធិធ្វើភ្លាមៗនោះទេ”។
អង្គភាពប្រឆាំងអំពើពុករលួយអះអាងថា ស្ថាប័នទាំងបីមានកំហុសផ្នែកលទ្ធកម្ម ដូចជាប្រេងសាំង សម្ភារការិយាល័យ គ្រឿងសង្ហារិម និងឯកសណ្ឋាន អនីត្យានុកូល និងគ្មានតម្លាភាព។
អង្គភាពនេះនិយាយថា ក្រុមហ៊ុនមួយចំនួនដែលឈ្នះការដេញថ្លៃនៅអគ្គនាយកដ្ឋានប្រៃសណីយ៍មិនមានលិខិតអនុញ្ញាតឬវិញ្ញាបនបត្រត្រឹមត្រូវ ក្រុមហ៊ុនខ្លះមិនបានចុះបញ្ជីជាមួយក្រសួងពាណិជ្ជកម្ម ហើយខ្លះទៀតមិនមានលិខិតធានាប្រាក់កក់ចេញដោយអគ្គនាយកដ្ឋានរតនាគារជាតិ។
លោក ស៊ឹម ធី អគ្គនាយកដ្ឋានរដ្ឋបាល បាននិយាយថា លោកមិនបានដឹងថា អង្គភាពប្រឆាំងអំពើពុករលួយបានធ្វើការស៊ើបអង្កេតទេ។
លោកបាននិយាយថា “យើងមិនបានឃើញអង្គភាពប្រឆាំងអំពើពុករលួយ និងមិនបានប្រព្រឹត្តពុករលួយ ដូច្នេះ មិនចាំបាច់ពិនិត្យទេ។ យើងមើលឃើញថា ទូរគមនាគមន៍កម្ពុជាមានអំពើពុករលួយ ដូច្នេះពួកគេគួរពិនិត្យទៅ”។
កាលពីសប្តាហ៍មុន ទូរគមនាគមន៍កម្ពុជា បានព្យួរការងារនាយកម្នាក់ដែលជាប់ចោទថាបានពាក់ព័ន្ធក្នុងការគៃបន្លំប្រាក់២៣០.000ដុល្លារ ក្នុងអំឡុងពេលបីឆ្នាំ ហើយបានសន្យាថា នឹងបញ្ជូនករណីនេះទៅតុលាការ។
លោក ស៊ន វី អ្នកនាំពាក្យ ទូរគមនាគមន៍កម្ពុជា បានបដិសេធមិនធ្វើអត្ថាធិប្បាយលើការចោទដោយអង្គភាពប្រឆាំងអំពើពុករលួយទេ ត្បិតលោកមិនបានដឹងអំពីការចោទទាំងអស់នោះ។
លោក ហេ បាវី អគ្គនាយកកំពង់ផែស្វយ័តភ្នំពេញ បាននិយាយថា លោកជាប់រវល់ណាស់មិនអាចអត្ថាធិប្បាយបានទេ៕ និត