មន្ត្រីនគរបាលម្នាក់បាននិយាយកាលពីម្សិលមិញថា នគរបាលខេត្តកំពង់ឆ្នាំងបានចាប់ខ្លួនបុរសអាយុ៦៨ឆ្នាំម្នាក់ កាលពីថ្ងៃអង្គារ ដោយសង្ស័យថា បុរសរូបនេះបានចាប់រំលោភក្មេងស្រីអាយុ៨ឆ្នាំម្នាក់កាលពីខែកក្កដា។
លោក ស្រី សូដា នាយរងការិយាល័យនគរបាលព្រហ្មទណ្ឌកម្រិតធ្ងន់ខេត្តបានមានប្រសាសន៍ថា បុរសឈ្មោះ អ៊ួត ភឿន ជាកសិករម្នាក់រស់នៅក្នុងឃុំពន្លៃ ស្រុកបរិបូណ៌ត្រូវបានចាប់ខ្លួននៅម៉ោងប្រហែល៣និង៣០នាទីរសៀលថ្ងៃអង្គារ បន្ទាប់ពីឪពុកម្តាយក្មេងស្រីរងគ្រោះបានដាក់ពាក្យបណ្តឹងទៅអាជ្ញាធរនៅព្រឹកថ្ងៃនោះ។
លោក សូដា បានថ្លែងថា អ៊ួត ភឿន ប្រឈមនឹងការចោទប្រកាន់ពីបទរំលោភក្មេងស្រីរូបនេះនៅផ្ទះរបស់ខ្លួនកាលពីខែកក្កដា បន្ទាប់ពីបានល្បួងនាងឲ្យចេញពីផ្ទះតាយាយរបស់នាងដែលនៅជាប់នោះ ខណៈដែលឪពុកម្តាយរបស់នាងបានចេញទៅធ្វើការនៅខេត្តស្ទឹងត្រែង។
លោកបានថ្លែងថា “ខណៈដែលឪពុកម្តាយ ក្មេងស្រីរូបនេះចេញទៅធ្វើការនៅខេត្តផ្សេង ជនសង្ស័យបានហៅក្មេងស្រីរូបនេះឲ្យមកលេងផ្ទះរបស់ខ្លួន ដែលស្ថិតនៅក្បែរផ្ទះរបស់យាយនាង។ ជនសង្ស័យរូបនេះបានយកនាងទៅរំលោភនៅលើគ្រែរបស់ខ្លួន”។
នាយរងការិយាល័យរូបនេះបានមានប្រសាសន៍ថា ករណីនេះទើបតែបានដឹងបន្ទាប់ពីឪពុកម្តាយក្មេងស្រីរូបនេះត្រឡប់មកផ្ទះវិញកាលពីសប្តាហ៍មុនតែប៉ុណ្ណោះ ហើយបានឃើញកូនស្រីរបស់ខ្លួនមានសភាពស្លេកស្លាំង បន្ទាប់មកកត់សម្គាល់ឃើញថា នាងបានរងរបួសត្រង់ប្រដាប់ភេទទៀងផង។ នៅពេលត្រូវបានសួរអំពីស្នាមរបួសនោះ ក្មេងស្រីរូបនេះបានប្រាប់ឪពុកម្តាយរបស់នាងពីអ្វីដែលបានកើតឡើង។
លោក សូដា បានមានប្រសាសន៍ថា អ៊ួត ភឿន សារភាពថា បានរំលោភក្មេងស្រីរូបនេះមិនយូរប៉ុន្មានបន្ទាប់ពីត្រូវបានចាប់ខ្លួន ហើយនឹងត្រូវបញ្ជូនទៅសាលាដំបូងខេត្តកំពង់ឆ្នាំងនៅថ្ងៃេនះ។
លោកបានថ្លែងថា “គាត់បាននិយាយថា គាត់បានរំលោភក្មេងស្រីរូបនេះ ពីព្រោះគាត់ទប់អារម្មណ៍មិនបាននៅពេលគាត់ឃើញក្មេងស្រីរូបនេះនៅម្នាក់ឯង។ ក្មេងស្រីរងគ្រោះ បាននិយាយថា ជនសង្ស័យរូបនេះបានរំលោភនាងជាច្រើនដង ប៉ុន្តែ ជនសង្ស័យអះអាងថា គាត់បានរំលោភនាងតែម្តងប៉ុណ្ណោះ”។
យោងតាមលោក ហួត លឹមហ៊ាង នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានឲ្យដឹងថា នៅក្នុងករណីដាច់ដោយឡែកមួយទៀត ណែម ប៊ុនណាង អាយុ២០ឆ្នាំ ជាអតីតសង្ឃដែលត្រូវបានចាប់ផ្សឹកពាក់ព័ន្ធការរំលោភក្មេងស្រីអាយុ១៤ឆ្នាំនៅក្នុងស្រុកព្រែកប្រសព្វខេត្តក្រចេះកាលពីថ្ងៃអាទិត្យនោះ ត្រូវបានចោទប្រកាន់រួចហើយ ពីបទរំលោភអនីតិជន ហើយក៏ត្រូវបញ្ជូនទៅពន្ធនាគារហើយដែរ។
លោក ដួង ស៊ីវុត្ថា នាយការិយាល័យនគរបាលព្រហ្មទណ្ឌកម្រិតធ្ងន់ខេត្តមានប្រសាសន៍ថា ចំណែកនៅក្នុងខេត្តស្ទឹងត្រែងឯណោះវិញ សឹុម សារី អាយុ៣០ឆ្នាំជាកម្មករ ធ្វើចម្ការម្នាក់ ត្រូវបានចោទប្រកាន់កាលពីម្សិលមិញពាក់ព័ន្ធការរំលោភបូកស្ត្រីអាយុ២០ឆ្នាំម្នាក់នៅក្នុងចម្ការដំឡូងកាលពីសប្តាហ៍មុន៕សារុន