38 C
Phnom Penh

បុរស​ដែល​​អះអាង​ថា​ខ្លួន​​​ជា​មន្ត្រី​​ទីស្ដីការ​​​​ថា ក្មេង​ស្រី​សិស្ស​សាលា​​ដែល​ខ្លួន​ទះ​កំផ្លៀងដូច​កូន​​​របស់​ខ្លួន​

ដោយ ឌឹ ខេមបូឌា ដេលី

បទវិភាគ

បុរស​​ម្នាក់​​ដែល​ត្រូវ​បាន​​ចាប់​ខ្លួន​កាលពី​ខែកក្កដា បន្ទាប់ពី​បាន​បង្ហាញ​មុខ​​នៅ​វិទ្យាល័យ​​​ដែល​កូនស្រី​របស់​ខ្លួន​សិក្សា​​ ហើយ​ទះ​កំផ្លៀង​មិត្ត​រួម​ថ្នាក់​របស់​កូនស្រី​ខ្លួន​​ក្រោយ​ពេល​ក្មេងស្រី​ជំទង់​ទាំង​ពីរ​នាក់​នេះ​​វាយ​តប់​គ្នា ​បាន​ប្រាប់​​សាលា​ដំបូង​រាជធានី​ភ្នំពេញ​ថា ខ្លួន​វាយ​ក្មេងស្រី​រូប​េនះ​ដោយ​សារ​ចាត់​ទុក​នាង ​”ដូច​កូន”​។

លោក ទេព ឃួន អាយុ​៤៩​ឆ្នាំ​ត្រូវ​បាន​ចាប់​ខ្លួន​កាលពី​ថ្ងៃទី​១ ខែ​កក្កដា ហើយ​​​ត្រូវ​បាន​ចោទ​​ប្រកាន់ពី​បទ​បង្ក​អំពើ​ហិង្សា​ដោយ​ចេតនា​ ​ពីរ​ថ្ងៃ​បន្ទាប់​ពី​រូប​ភាព​វីដេអូ​ដែល​បុរស​រូប​នេះ​ទះ​កំផ្លៀង​សិស្ស​ម្នាក់​ឈ្មោះ ញ៉ែម ចាន់ធីតា អាយុ​១៦​ឆ្នាំ នៅ​វិទ្យាល័យ​​ ជា ស៊ីម បឹង​កេងកង ត្រូវ​បាន​បង្ហោះ​ព្រោង​ព្រាត​តាម​ហ្វេសប៊ុក​។

​​បន្ទាប់ពី​​ត្រូវ​បាន​ចាប់​ខ្លួន លោក ទេព ឃួន បាន​ប្រាប់​នគរ​បាល​ថា ខ្លួន​គឺ​ជា​មន្ត្រី​​នៅ​ទីស្ដីការ​គណៈរដ្ឋមន្ត្រី ប៉ុន្តែ​ក្រោយ​មក​​បាន​សារភាព​ថា មិន​មែន​ទេ​ ដោយ​បន្ត​អះអាង​ថា ​ខ្លួន​គឺ​ជា​ប្រធាន​​​អង្គការ​មិន​មែន​រដ្ឋាភិបាល​មួយ​​ឈ្មោះ​​​អង្គការ​អភិវឌ្ឍន៍​ស្ត្រី​ ហើយខ្លួន​​និង​កំពុង​​មាន​​ជំងឺ​សរសៃ​ប្រសាទ​។

អំឡុង​ការ​បើក​សវនាការ​ជំនុំជម្រះ​កាល​ពី​ម្សិលមិញ លោក បាន​សារភាព​ថា ពិត​ជា​បាន​​​ទះកំផ្លៀង​មែន ​ហើយ​និយាយ​ថា គាត់​ចូល​ទៅ​​​បរិវេណ​សាលា​ដោយ​មាន​ការ​អនុញ្ញាត​​ពី​នាយករង​សាលា​​ បន្ទាប់ពី​កូនស្រី​របស់​គាត់​​ប្រាប់​តាម​ទូរស័ព្ទ​​ថា សិស្សស្រី​​ឈ្មោះ​ញ៉ែម ចាន់ធីតា បោច​សក់​នាង​​​ពេល​ឈ្លោះ​​​គ្នា​។

​លោកបាន​ប្រាប់​តុលាការ​ថា នៅ​​ពេល​ទៅ​​​ដល់​​សាលា គាត់​មាន​បំណង​ត្រឹម​តែ​ប្រដៅ​​ក្មេងស្រី​រូប​នេះ​ប៉ុណ្ណោះ ប៉ុន្តែ​​​ មិន​អាច​ទប់​កំហឹង​បាន​នៅ​ពេល​នាង​ស្រែក​ដាក់​គាត់។ លោក​​បាន​លើក​ឡើង​ទៀត​ថា គាត់​​ទះ​កំផ្លៀង​​​​​ក្មេង​ស្រី​រូប​នេះ​ដោយ​សារ​នាង​ជា​មិត្ត​ជិត​ស្និទ្ធ​របស់​កូន​គាត់​ ហើយ​ធ្លាប់​មក​លេង​ផ្ទះ​របស់​គាត់​​ និង​ជួន​កាល​ញ៉ាំ​បាយ​នៅ​ផ្ទះ​​​​គាត់​ក៏​មាន​ដែរ។

លោក​​និយាយ​ថា ”​ខ្ញុំ​​ស្ដី​ប្រដៅ​នាង​ ប៉ុន្តែ​នាង​បាន​​ស្រែក​​ដាក់​ខ្ញុំ ហេតុ​ដូច្នេះ​ហើយ​ទើប​​​ខ្ញុំ​ទះ​​​នាង​​មួយ​កំផ្លៀង ព្រោះ​​ខ្ញុំ​ចាត់​ទុក​នាង​ដូច​កូន​ ដោយ​សារ​នាង​ហៅ​ខ្ញុំ​ថា ប៉ាប៉ា និង​ហៅ​ប្រពន្ធ​របស់​ខ្ញុំ​ថា ម៉ាក់ “។

​ពេល​​ត្រូវ​បាន​សួរ​ដោយ​ចៅក្រម​​ប្រធាន​​​​​​​ក្រុម​ប្រឹក្សា​ជំនុំជម្រះ​​​ លាង សំណាត់ ​ថាតើ​មាន​​កែ​ខ្លួន​ឬ​នៅ​បន្ទាប់ពី​ជាប់​ពន្ធនាគារ​ព្រៃស​ ​​លោក ទេព ឃួន ​បាន​​ឆ្លើយ​ថា “ខ្ញុំ​ដឹង​ខុស​ហើយ ​​ហើយ​​ក៏​ព្រម​ទទួល​កំហុស​ដែរ​ លើក​ក្រោយ​ខ្ញុំ​នឹង​មិន​បណ្ដោយ​ឲ្យ​​​រឿង​​​នេះ​​កើត​ឡើង​ម្ដង​ទៀត​ឡើយ​។ ខ្ញុំ​សោក​ស្ដាយ​យ៉ាង​ខ្លាំង​ដែល​បាន​ធ្វើ​​ខុស​”។

លោក ហាក់ ស៊ីណា មេធាវី​របស់​លោក ទេព ឃួន បាន​លើក​ឡើង​ថា កូនក្ដី​របស់​ខ្ញុំ​​គួរ​តែ​ត្រូវ​បាន​ដោះលែង​ ដោយ​មូលហេតុ​​ថា គាត់​បាន​បង់​ប្រាក់​​៥០០​ដុល្លារ​ឲ្យ​ក្មេងស្រី​រងគ្រោះ​រួច​ហើយ ហើយ​គាត់​​ថែម​ទាំង​មាន​អាយុ​​ច្រើន​ និងមាន​សុខភាព​មិន​ល្អ​ទៀត​។

លោក​ ហាក់ ស៊ីណា បាន​មាន​ប្រសាសន៍​ថា “​កូនក្ដី​របស់​ខ្ញុំ​មាន​អាយុ​ច្រើន​ ហើយ​មាន​ជំងឺ​ទៀត​ ហេតុ​ដូច្នេះ​សូម​ចៅក្រម​បន្ធូរ​បន្ថយ​​​ទោស​ ហើយ​អនុញ្ញាត​ឲ្យ​គាត់​ចេញ​ពី​ពន្ធនា​គារ​​ដើម្បី​ទៅ​ព្យាបាល​​ជំងឺ និង​រក​ប្រាក់​ចិញ្ចឹម​គ្រួសារ​ផង​”។

ចៅក្រម​ លាង សំណាត់ បាន​លើក​ឡើង​​​ទៀត​ថា តុលាការ​នឹង​ប្រកាស​សាលក្រម​នៅ​ថ្ងៃ​ទី២១​ ខែ​កញ្ញា​នេះ​៕ ស៊ុយឈាង​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស