កាលពីម្សិលមិញ លោក ស ខេង រដ្ឋមន្ត្រីក្រសួងមហាផ្ទៃ បាននិយាយការពារការរឹតបន្តឹងលើសេរីភាពបញ្ចេញមតិនៅកម្ពុជា ដោយលើកឡើងពីការចាប់ខ្លួនមនុស្សពីរនាក់ក្នុងពេលថ្មីៗពាក់ព័ន្ធនឹងការបង្ហោះសារតាមហ្វេសប៊ុក និងអ្វីដែលលោកអះអាងថាជាផែនការមិនបានសម្រេចរបស់គណបក្សសង្គ្រោះជាតិ ដែលមានបំណងដុតរូបតំណាង លោកនាយករដ្ឋមន្ត្រី ហ៊ុន សែន ។
ពេលថ្លែងស្តីពីប្រព័ន្ធសន្តិសុខនៅសិក្ខាសាលាមួយក្នុងរាជធានីភ្នំពេញ លោក ស ខេង បានគូសបញ្ជាក់ពីការចាប់ខ្លួនបុរសម្នាក់ក្នុងពេលថ្មីៗ ដែលអំពាវនាវឲ្យធ្វើ “បដិវត្តន៍ពណ៌” តាមបណ្ដាញទំនាក់ទំនងសង្គម និងបុរសម្នាក់ទៀតដែលគំរាមសម្លាប់បណ្ឌិតដ៏លេចធ្លោមួយរូប ដែលសិក្សាស្រាវជ្រាវអំពីព្រំដែនកម្ពុជា-វៀតណាមកាលពីពេល ថ្មីៗនេះ។
រដ្ឋមន្ត្រីក្រសួងមហាផ្ទៃរូបនេះបានលើកឡើងទៀតថា រដ្ឋាភិបាលបានលើកកម្ពស់សិទ្ធិដែលមានចែងនៅក្នុងរដ្ឋធម្មនុញ្ញស្ដីពីការបញ្ចេញមតិ និងការជួបជុំគ្នា ប៉ុន្តែបានរឹតបន្តឹងនៅពេលការប្រើប្រាស់សិទ្ធិទាំងនោះ “បានរំលោភបំពានលើសិទ្ធិ និងកិត្តិយស របស់អ្នកដទៃ”។
ដោយសំដៅលើការចាប់ខ្លួនបុរសម្នាក់ឈ្មោះ គង់ រ៉ាយ៉ា អាយុ២៥ឆ្នាំ ដែលអំពាវនាវឲ្យគេចូលរួមក្នុងការធ្វើបដិវត្តន៍ពណ៌ជាមួយខ្លួនតាមហ្វេសប៊ុកកាលពីខែមុន លោក ស ខេង បានមានប្រសាសន៍ថា “ចំពោះបដិវត្តន៍ ពណ៌ វានឹងធ្វើឲ្យមានការបង្ហូរឈាម ហើយ បំផ្លាញសន្តិសុខជាតិ សន្តិភាព អាយុជីវិត និងទ្រព្យសម្បត្តិរបស់ពលរដ្ឋ”។
ហើយនៅពេលសំដៅដល់ការចាប់ខ្លួនបុរសម្នាក់ទៀតឈ្មោះ ផង់ សីហា អាយុ២៧ឆ្នាំ ដែលគំរាម “បាញ់ក្បាល” លោក សុខ ទូច តាមហ្វេសប៊ុកកាលពីដើមខែនេះ លោក ស ខេង បានមានប្រសាសន៍ថា “ប្រសិនបើមានការគំរាមកំហែងដល់អាយុជីវិត ហើយគ្មានវិធានការពី “អាជ្ញាធរ” ដើម្បីរារាំងវាទេ វាគឺកំហុសឆ្គង”។
លោកបានមានប្រសាសន៍បន្ថែមទៀតថា “ប្រសិនបើអាជ្ញាធរមិនចាត់វិធានការទេ វាមានន័យថា អាជ្ញាធរគ្មានការទទួលខុសត្រូវ។ អ្នករិះគន់និយាយថា វាគឺជាសិទ្ធិសេរីភាពនៃការបញ្ចេញមតិ។ ហេតុដូច្នេះ ទុកឲ្យអ្នកជំនាញផ្នែកច្បាប់ និងក្រសួងយុត្តិធម៌វិនិច្ឆ័យទៅ”។
លោក ស ខេង ក៏បាននិយាយពីពេលមួយ ដែលលោកលើកឡើងថា រដ្ឋាភិបាលដឹងថា គណបក្សសង្គ្រោះជាតិមានផែនការបង្កើត និងបំផ្លាញរូបតំណាងរបស់លោក ហ៊ុន សែន ផងដែរ។
ដោយមិនបានផ្ដល់កាលបរិច្ឆេទជាក់លាក់នៃផែនការនោះ លោក ស ខេង បានមានប្រសាសន៍ថា “នៅថ្ងៃនោះ ពួកគេបានរៀបផែនការព្យួររូបតំណាង ហើយអូសតាមផ្លូវសាធារណៈ និងដុតរូបនោះចោលនៅពេលរសៀល”។
រដ្ឋមន្ត្រីក្រសួងមហាផ្ទៃរូបនេះបានលើកឡើងថា លោកបានទាក់ទងទៅលោក វីលៀម ថូដ ឯកអគ្គរដ្ឋទូតសហរដ្ឋអាមេរិកឲ្យជួយបញ្ជូនសារទៅលោក សម រង្ស៊ី មេដឹកនាំគណបក្សប្រឆាំងថា ទង្វើបែបនេះនឹងគ្មានការអត់ឱនឲ្យទេ។
លោក ស ខេង បានមានប្រសាសន៍ថា “កម្ពុជាមិនទាន់ឈានដល់វប្បធម៌នោះនៅឡើយទេ។ លោក [វីលៀម ថូដ] បានជួយសម្របសម្រួលបញ្ហានេះ ហើយបន្ទាប់មកភាគីរបស់យើងមិនចាត់វិធានការទេ ហើយបានដកកម្លាំងមកវិញ”។
ស្ថានទូតអាមេរិកបានបដិសេធមិនធ្វើអត្ថាធិប្បាយឡើយលើការអះអាងរបស់លោក ស ខេង។
លោក សម រង្ស៊ី ប្រធានគណបក្សសង្គ្រោះជាតិ បានលើកឡើងថា សេនារីយ៉ូដែលរដ្ឋមន្ត្រីក្រសួងមហាផ្ទៃរូបនេះបានលើកឡើងគ្មានហេតុផលទាល់តែសោះ។
នៅពេលត្រូវបានសួរថាតើគណបក្សសង្គ្រោះជាតិធ្លាប់មានផែនការដុតរូបតំណាងរបស់លោក ហ៊ុន សែន ដែរឬទេ លោក សម រង្ស៊ី បានមានប្រសាសន៍ថា “មិនធ្លាប់មានទេ។ វាឆ្កួតៗគួរឲ្យអស់សំណើច។ ខ្ញុំគិតថា ពួកគាត់[មេដឹកនាំគណបក្សប្រជាជនកម្ពុជា] អស់អីធ្វើ បែរជាមកចោទប្រកាន់គណបក្សសង្គ្រោះជាតិ និងអ្នកគាំទ្របក្សសង្គ្រោះជាតិថា បានព្យាយាមធ្វើរឿងនេះរឿងនោះទៅវិញ”៕ ស៊ុយឈាង (រាយការណ៍បន្ថែមដោយ Colin Meyn)