នគរបាលបានឲ្យដឹងកាលពីម្សិលមិញថា កម្មករកាត់ដេរជាង៧០នាក់នៅក្នុងខេត្តស្វាយរៀងបានរងរបួសកាលពីល្ងាចថ្ងៃពុធ ក្នុងនោះមានបួននាក់បានរងរបួសធ្ងន់នៅពេលរថយន្តពីរគ្រឿង ដែលដឹកកម្មករទាំងនេះត្រឡប់ពីធ្វើការមកផ្ទះវិញ បានបុកគ្នាអំឡុងពេលមានភ្លៀងធ្លាក់ខ្លាំង។
លោក កែវ គួង អធិការនគរបាលក្រុងបាវិតបាននិយាយថា ហេតុការណ៍នេះកើតឡើងនៅតាមបណ្ដោយផ្លូវជាតិលេខ១ ក្នុងឃុំច្រកម្ទេសនៅម៉ោងប្រហែល៧យប់ ហើយក្នុងនោះមានកម្មករកាត់ដេរ៧៥នាក់មកពីតំបន់សេដ្ឋកិច្ចពិសេស តាយ សេង និង ម៉ានហាតាន់។
លោក បានលើកឡើងថា “រថយន្តធុនតូចបានឈប់នៅចិញ្ចើមផ្លូវផ្នែកខាងស្ដាំបន្ទាប់ពីបើកចេញពីតំបន់សេដ្ឋកិច្ចពិសេស ហើយរថយន្តធុនធំបានបុកពីក្រោយដោយបណ្ដាលឲ្យកម្មករ៧៥នាក់រងរបួស។ កងកម្លាំងរបស់យើងបានទៅដល់ទាន់ពេលវេលា ហើយបានបញ្ជូនជនរងគ្រោះទៅមន្ទីរពេទ្យជីភូភ្លាមៗ”។
លោកបានឲ្យដឹងទៀតថា អ្នកបើកបររថយន្តទាំងពីរគ្រឿងនេះបានរត់គេចខ្លួនពីកន្លែងកើតហេតុបន្ទាប់ពីហេតុការណ៍នេះកើតឡើងរួច។
លោកបានថ្លែងថា “ឥឡូវនេះយើងកំពុងតែតាមស្វែងរកអ្នកបើកបរ។ យើងស្គាល់អត្តសញ្ញាណរបស់ពួកគេហើយ ហើយយើងនឹងចាប់ពួកគេមកផ្ដន្ទាទោស”។
លោក ប្រាក់ សម្បត្តិ ប្រធានមន្ទីរពេទ្យជីភូ ក្នុងក្រុងបាវិត បានលើកឡើងថា កម្មករ៧១នាក់ គ្រាន់តែរងរបួសស្រាលប៉ុណ្ណោះ ហើយត្រូវបានព្យាបាលនៅក្នុងមន្ទីរពេទ្យរបស់លោក រីឯស្ត្រីបួននាក់ទៀតរងរបួសធ្ងន់ យើង បានបញ្ជូនពួកគាត់ទៅមន្ទីរពេទ្យបង្អែកខេត្ត។
លោកបានមានប្រសាសន៍ថា “យើងបានបញ្ជូនជនរងគ្រោះទាំងបួននាក់ទៅមន្ទីរពេទ្យបង្អែកខេត្តកាលពីយប់ម្សិលមិញ ព្រោះពួកគាត់រងរបួសក្បាល”។
រីឯលោក ចាន់ តារា ប្រធានមន្ទីរពេទ្យបង្អែកខេត្តបានលើកឡើងថា ក្រៅពីរងរបួសក្បាល ស្ត្រីម្នាក់ក្នុងចំណោមស្ត្រីទាំងបួននាក់នេះបានរងរបួសម្រាមដៃស្តាំទាំងអស់យ៉ាងធ្ងន់ធ្ងរ រីឯម្នាក់ទៀតបាក់ជើង និងអ្នកទី៣បាក់ឆ្អឹងជំនីរ។
លោកមានប្រសាសន៍ថា ”ជនរងគ្រោះទាំងបួនកំពុងត្រូវបានព្យាបាលនៅមន្ទីរពេទ្យរបស់យើង។ ខ្ញុំគិតថា ពួកគាត់មិនអីទេ ព្រោះរងរបួសមិនសូវធ្ងន់ធ្ងរឡើយ។បេឡាជាតិរបបសន្តិសុខសង្គមនឹងចេញថ្លៃព្យាបាលទាំងអស់ឲ្យកម្មករ ព្រោះពួកគាត់ជួបគ្រោះថ្នាក់ពេលធ្វើការ”៕ ស៊ុយឈាង