30 C
Phnom Penh

បន្ទាប់ពីការប្រឹងប្រែងផ្នែកការទូត យុទ្ធនាការនៅណូរូបង្កើនឡើង

ដោយ ឌឹ ខេមបូឌា ដេលី

បទវិភាគ

រយៈ​ពេល​មិន​ដល់​​​ពីរ​សប្ដាហ៍ផង​​បន្ទាប់ពី​រដ្ឋមន្ត្រី​ក្រសួង​អន្តោប្រវេសន៍​អូស្ត្រាលី​បាន​ជួប​ជាមួយ​​លោក​នាយក​រដ្ឋមន្ត្រី ហ៊ុន សែន ក្នុង​ក្រុង​ភ្នំពេញ​​ ក្រោយពី​មាន​សេចក្ដី​រាយ​ការណ៍​ព័ត៌មាន​ថា ​កិច្ចព្រមព្រៀងជន​ភៀសខ្លួន​​ដ៏ចម្រូងចម្រាស​បាន​បរាជ័យ​ទៅ​ហើយ​នោះ អ្នក​នាំពាក្យ​​​អង្គការ​មួយ​​ដែល​តាម​ដាន​ករណី​ជន​ភៀសខ្លួន​នៅ​ប្រទេស​​ណូរូ​​បាន​និយាយ​ថា ជន​ស្វែង​រក​សិទ្ធិ​ជ្រក​កោន​​នៅ​ទី​នោះ​​កំពុង​ត្រូវ​គេ​ “​រំខាន​” ជា​ថ្មី​ទៀត​​ ដើម្បី​ឲ្យ​​​តាំង​លំនៅ​ជា​ថ្មី​នៅ​ប្រទេស​កម្ពុជា​។

កាលពី​ថ្ងៃ​ទី​៩ ខែ​កញ្ញា ​ក្រោយ​ពី​មាន​ជំនួប​​​មួយ​រវាង​លោក ភីតធើ ដាត់ធិន និង​លោក ហ៊ុន សែន ទីប្រឹក្សា​ម្នាក់​របស់​លោក​នាយក​រដ្ឋមន្ត្រី​បាន​ប្រកាស​ថា ​ប្រទេស​កម្ពុជា​​បាន​ត្រៀម​ចាប់​ផ្ដើម​​ពិនិត្យ​​អ្នក​ស្វែង​រក​សិទ្ធិ​ជ្រក​កោន​ថែម​ទៀត​​ដែល​​កំពុង​ត្រូវ​ឃុំ​ខ្លួន​ដោយ​ប្រទេស​អូស្ត្រាលី​​លើ​ប្រទេស​ដែន​កោះ​នៅ​មហាសមុទ្រ​បា៉ស៊ីហ្វិក​​ខាង​ត្បូង​។

លោក អៀន រីនថូល ​អ្នក​នាំពាក្យ​​អង្គការ​​សម្ព័ន្ធ​សកម្មភាព​​ជន​ភៀស​ខ្លួន​​​​មាន​មូលដ្ឋាន​នៅ​ទីក្រុង​ស៊ីដនី​ បាន​និយាយ​​កាលពី​ថ្ងៃ​សុក្រ​ថា ​មុន​​ដំណើរ​ទស្សនកិច្ច​គ្រោង​ទុក​​ដោយ​ក្រុម​មន្ត្រី​កម្ពុជា​​ទៅ​ប្រទេស​​ណូរូ​នា​ខែ​ក្រោយ​ ជន​ភៀស​ខ្លួន​លើ​​ប្រទេស​ដែន​កោះ​នេះ​​បាន​ចាប់​ផ្ដើម​ទទួល​​ការ​ហៅទូរស័ព្ទ​ពី​មន្ត្រី​អូស្ត្រាលី​ ដែលព្យាយាម​បញ្ចុះ​បញ្ចូល​ពួកគេ​ឲ្យ​​មក​តាំង​លំនៅ​នៅ​ទីនេះ​។

លោក រីនថូល ​បាន​និយាយ​តាម​រយៈ​​សារ​អេឡិច​ត្រូនិក​ថា “​ចាប់​តាំង​ពី​លោក ដាត់ធិន បាន​​បំពេញ​ទស្សនកិច្ច​​នៅ​ប្រទេស​កម្ពុជា​មក ការ​ហៅ​ទូរស័ព្ទ​​​បញ្ចុះ​បញ្ចូល​​ និង​ការ​​រំខាន​បាន​ចាប់​ផ្ដើម​​​មាន​ជា​ថ្មី​ទៀត​​លើ​កោះ​ណូរូ​ ប៉ុន្តែ​​មិន​មាន​សញ្ញា​ថា​​នរណា​ម្នាក់​​បាន​យល់​ព្រម​​ទៅ​ទេ”។

ដោយ​សំដៅ​​លើ​​​សេចក្ដី​ប្រកាស​ព័ត៌មាន​ពី​មន្ត្រី​​កម្ពុជា​​ដែល​ថា ពួកគេ​​ត្រៀម​​ទទួល​យក​​អ្នក​ស្ម័គ្រ​ចិត្ត​បន្ថែម​ទៀត​​ពី​ណូរូ​នោះ លោក​​បាន​បន្ថែម​ថា “​សេចក្ដី​ប្រកាស​​របស់​ក្រសួង​មហាផ្ទៃ​​​​ហាក់​ដូច​​ជា​មាន​ន័យ​ថា ​មនុស្ស​ច្រើន​នាក់​ទៀត​​បាន​​យល់​ព្រម​មក​​អ៊ីចឹង​ ប៉ុន្តែ​ពួកគេ​​​​សុខចិត្ត​​សម្រប​ខ្លួន​នៅ​ទីនេះ​វិញ​​​”។

​ក្នុង​កិច្ចព្រមព្រៀង​​​ដែល​បាន​ចុះ​ហត្ថលេខា​​​ក្នុង​ពិធី​អបអរ​កាលពី​ខែ​កញ្ញា​​ឆ្នាំ​មុន ដោយ​​លោក ស ខេង រដ្ឋមន្ត្រី​ក្រសួង​មហាផ្ទៃ​​ និង​​លោក ស្កុត ម៉ូរីសុន អតីត​រដ្ឋមន្ត្រី​​ក្រសួង​អន្តោប្រវេសន៍​អូស្ត្រាលី​​ ប្រទេស​កម្ពុជា​​​បាន​យល់​ព្រម​ទទួល​​​ជន​ភៀស​ខ្លួន​​មួយ​ចំនួន​​ដែល​​កំពុង​​​ត្រូវ​ឃុំខ្លួន​ដោយ​ប្រទេស​​អូស្ត្រាលី​។ ប្រទេស​អូស្ត្រាលី​មិន​ព្រម​ផ្ដល់​សិទ្ធិ​ជ្រក​កោន​​ដល់​អ្នក​ដែល​ប៉ុនប៉ង​ទៅ​ដល់​តាម​ទូក​នោះ​ទេ។

កិច្ចព្រមព្រៀង​នោះ​ចែង​ថា ប្រទេស​កម្ពុជា​​នឹង​ទទួល​យក​ជន​ភៀស​ខ្លួន​ដែល​ស្ម័គ្រ​ចិត្ត​​តាំង​លំនៅ​ថ្មី​​ក្នុង​ប្រទេស​កម្ពុជា​ប៉ុណ្ណោះ ​ហើយ​​ប្រទេស​អូស្ត្រាលី​​នឹង​ចំណាយ​​លើ​ការ​តាំង​​លំនៅថ្មី និង​​​ការ​រស់​នៅ​​​ក្នុង​សង្គម​។ ប្រទេស​អូស្ត្រាលី​ក៏​បាន​សន្យា​​​ផ្ដល់​កញ្ចប់​ជំនួយ​​​៤០​លាន​ដុល្លារអូស្ត្រាលី​(ប្រហែល​២៨,៥លាន​ដុល្លារ​​អាមេរិក​) ជា​ផ្នែក​មួយ​នៃ​កិច្ចព្រមព្រៀង​នេះ។

រហូត​មក​ដល​់​ពេល​នេះ ជន​ភៀស​ខ្លួន​តែ​បួន​នាក់​ប៉ុណ្ណោះ​​ គឺ​ជនជាតិ​រ៉ូហុីងយ៉ា​ម្នាក់​មក​ពី​ភូមា និង​​ជនជាតិ​អុីរ៉ង់​បី​នាក់​ បាន​មក​​​ប្រទេស​កម្ពុជា​។ អ្នក​ទាំង​នោះ​ត្រូវ​គេ​ឲ្យ​រស់​នៅ​​​​មួយ​កន្លែង​​ឆ្ងាយ​ពី​​បណ្ដាញ​ព័ត៌មាន​ក្នុង​វីឡា​មួយ​នៅ​ជាយ​ក្រុង​ភ្នំពេញ។

កាលពី​ើដើម​ខែ​នេះ មាន​សេចក្ដី​រាយការណ៍​ថា បុរស​​​រ៉ូហុីងយ៉ា​​​ចង់​ត្រឡប់​ទៅ​ប្រទេស​ភូមា​វិញ​ ដែល​នៅ​ទីនោះ​​ជន​ជាតិ​ភាគ​តិច​មូស្លីម​​បាន​ប្រឈម​ការ​​ធ្វើ​ទុក្ខ​បុក​ម្នេញ​ខ្លាំង​ក្នុង​ពេល​​​ប៉ុន្មាន​ឆ្នាំ​ថ្មីៗ​កន្លង​មក​នេះ​។

ទាក់​ទង​តាម​ទូរស័ព្ទ​​ លោក ខៀវ សុភ័គ ​អ្នក​នាំពាក្យ​ក្រសួង​មហាផ្ទៃ​​​ ដែល​​​​ធ្លាប់​បង្ហើប​ឲ្យ​​​​ដឹង​​ថា​កិច្ច​ព្រមព្រៀង​​​​បាន​បរាជ័យ​កាលពី​ខែ​មុន បន្ទាប់ពី​និយាយ​ថា ​មិន​មាន​គម្រោង​​ទទួល​​យក​ជន​ភៀស​ខ្លួន​​ថែម​ទៀត​ពី​ប្រទេស​ណូរូ​​នោះ បាន​​មាន​ប្រសាសន៍​ថា មិន​ទាន់​មាន​កាល​បរិច្ឆេទ​សម្រាប់​មន្ត្រី​កម្ពុជា​​ទៅ​ទស្សនកិច្ច​ប្រទេស​ណូរូ​​នៅ​ឡើយ​​ទេ​។ លោក​បាន​បន្ថែម​ទៀត​ថា “​ខ្ញុំ​មិន​មាន​​ព័ត៌មាន​ថ្មី​​អំពី​​រឿង​នេះ​​ទេ”៕ និត​​​​​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស