30 C
Phnom Penh

លោក ហ៊ុន សែន​​​ មិន​​​ចង់​​​ឲ្យ​​​មាន​​​ការ​​​យក​​​ពន្ធ​​​ត្រួត​​​គ្នា​​​ពី​​​​គ្រូ​​​បរទេស​​​

ដោយ ឌឹ ខេមបូឌា ដេលី

បទវិភាគ

កាល​​​ពី​​​ថ្ងៃ​​​សៅរ៍ លោក​​​នាយក​​​រដ្ឋ​​​មន្ត្រី  ហ៊ុន​​​សែន បាន​​​​​​លើក​​​ឡើង​​​ថា លោក​​​ចង់​​​​​​បញ្ឈប់​ការ​ តម្រូវ​ឲ្យ​គ្រូ​​​បង្រៀន​​​បរទេស​​​​​​បង់​​​ពន្ធ​​​​​​ទាំង​​​នៅ​​​ក្នុង​​​ប្រទេស​​​កម្ពុជា​​​ និង​​​ប្រទេស​​​ដើម​​​កំណើត​​​របស់​​​ពួក​​​គេ​​​ដើម្បី​​​ទាក់​​​ទាញ​​​​​​សាស្ត្រាចារ្យ​​​ដែល​​​​​មាន​​​ជំនាញ​​​ខ្ពស់​​​មក​​​ធ្វើ​​​ការ​​​នៅ​​​ទី​​​នេះ​​​។

ថ្លែង​​​នៅ​​​ក្នុង​​​ពិធី​​​សម្ពោធ​​​ដាក់​​​ឲ្យ​​​ដំណើរ​​​ការ​​​ជា​​​ផ្លូវ​​​ការ​​​សាលា​​​អន្តរ​​​ជាតិ​​​ភ្នំពេញ ​(ISPP) ​ក្នុង​​​ខណ្ឌ​​​មាន​​​ជ័យ​​​ លោក ហ៊ុន សែន បាន​​​លើក​​​​​ឡើង​​​ថា ក្រសួងសេដ្ឋ​​​កិច្ច​​​ និង​​​ហិរញ្ញវត្ថុ បាន​​​ស្នើ​​​​​ដល់​បណ្តា​ប្រទេស​​​​​ផ្សេង​​​ៗ​​​ឲ្យ​​​បញ្ចប់​​​ការ​​យក​ “ពន្ធ​​​ត្រួត​​​គ្នា​​​” បែប​​​នេះ​​​។

លោក​នាយក​រដ្ឋមន្ត្រី ហ៊ុន សែន ​ក្នុង​ពិធី​​កាត់​ខ្សែបូ​សម្ពោធ​ដាក់​ឲ្យ​ប្រើ​ប្រាស់​ជា​ផ្លូវ​ការ​នូវ​​អគារ​ថ្មី​នៃ​​សាលា​អន្តរជាតិភ្នំពេញ (ISPP)​ នៅ​ក្នុង​ខណ្ឌ​មាន​ជ័យ រាជធានី​ភ្នំពេញ កាលពី​ថ្ងៃ​សៅរ៍។ រូបថតៈ កែម សុវណ្ណារ៉ា
លោក​នាយក​រដ្ឋមន្ត្រី ហ៊ុន សែន ​ក្នុង​ពិធី​​កាត់​ខ្សែបូ​សម្ពោធ​ដាក់​ឲ្យ​ប្រើ​ប្រាស់​ជា​ផ្លូវ​ការ​នូវ​​អគារ​ថ្មី​នៃ​​សាលា​អន្តរជាតិភ្នំពេញ (ISPP)​ នៅ​ក្នុង​ខណ្ឌ​មាន​ជ័យ រាជធានី​ភ្នំពេញ កាលពី​ថ្ងៃ​សៅរ៍។ រូបថតៈ កែម សុវណ្ណារ៉ា

បណ្តា​​​ប្រទេស​​​នានា​​​ជារឿយៗ​តែង​​​តែ​​​ចរចា​​​​​សន្ធិសញ្ញា​​​ទ្វេ​​​ភាគី​​​​ដោយ​​​ឲ្យ​​​​​​ក្រុមហ៊ុន​​​បង់​​​ពន្ធ​​​​​​ក្នុង​​​ប្រទេស​​​តែ​​​មួយ​​​ប៉ុណ្ណោះ​​​ ហើយ​​​លោក​​​​​នាយក​​​រដ្ឋ​​​មន្ត្រី​​​​​​បាន​​​ស្នើ​​​ឲ្យ​​​មានការ​បញ្ចូល​ការ​​​យក​​​ពន្ធ​​​លើប្រាក់​ចំណូល​​​ពី​​​គ្រូ​​​បង្រៀន​​​​​​​នៅ​​​ក្នុង​​​​​កិច្ច​​​ព្រម​​​ព្រៀង​​​បែ​​ប​​​នេះ​​​នា​​​ពេល​​​អនាគត​​​។

លោក​​​ ហ៊ុន សែន ​​​មាន​​​ប្រសាសន៍​​​ថា ”ការ​​​​​ចរចា​​​ក៏​​​​​​ត្រូវ​​​ដាក់​​​អ្នក​​​ស្រាវ​​​ជ្រាវ​​​​​ និង​​​សាស្ត្រា​​​ចារ្យ​​​ទៅ​​​ក្នុង​​​បញ្ហា​​​ការ​​​មិន​​​យក​​​ពន្ធ​​​ត្រួត​​​គ្នា​​​នេះ​​​គឺ​​​ប្រធាន​បទ​មួយ​ក្នុង​ចំណោម​​ប្រធាន​បទ​​​​ដើម្បី​​​ទាក់ទាញ​​​សាស្ត្រា​​​ចារ្យ​​​និង​​​អ្នក​​​ស្រាវ​​​ជ្រាវ​​​​​ល្អ​​​មក​​​កាន់​​​កម្ពុជា​​​”។

ប៉ុន្តែ លោក​​​បាន​​​លើក​​​ឡើង​​​ថា ការ​​​ព្យាយាម​​​​​​ក្នុង​​​ពេល​​​ថ្មី​​​ៗ​​​ដើម្បី​​​បញ្ចុះ​​​បញ្ចូល​​​បណ្តា​​​ប្រទេស​​​​​​នានា​​​ឲ្យ​​​ឈប់​​​យក​​​ពន្ធ​​​ពី​​​គ្រូបង្រៀន​​​ដែល​​​មក​​​ប្រទេស​​​កម្ពុជា​​​ មាន​​​ការ​​​លំបាក​​​។

លោក​​​បាន​​​មាន​​​ប្រសាសន៍​​​បន្ថែម​​​ថា ​”សង្ឃឹម​​​​​ថា ប្រទេស​​​អ្នក​​​មាន​​​កំុយក​​​ពន្ធ​​សាស្ត្រាចារ្យ​ទាំងហ្នឹង​​​ ទុក​​​ឲ្យ​​​សាស្ត្រាចារ្យ​​​​ទាំងហ្នឹង​បង់​​​ពន្ធ​មក​​​កម្ពុជា​​​ ព្រោះ​​​កម្ពុជា​​​ក្រ​​​។ ប្រទេស​​​អ្នក​​​មាន​​​​​​ស្វិត​​​ណាស់​​​ គាត​់​ចង់​​​ឲ្យ​​​សាស្ត្រាចារ្យ​​​ទាំង​​​ហ្នឹង​​​​​​​បង់​​​ពន្ធ​​​​ទៅប្រទេស​​របស់​គាត់​​​​​​​​​​ ប៉ុន្តែ គាត់​មក​សុំ​លើក​លែង​ប្រាក់ពន្ធនៅស្រុកខ្មែរ​​​​”។

លោក​​​ ហង់ ជួន ណារ៉ុន រដ្ឋ​​​មន្ត្រី​​​ក្រសួ​​​ង​អប់​​​រំ ​យុវជន​​​ និង​​​កីឡា​​​បាន​​​លើក​​​ឡើង​​​ថា ​សំណើ​​​របស់​​​លោក ហ៊ុន សែន គឺ​​​គ្រាន​​​់​​​តែ​​​ជា​​​ការ​​​ស្នើ​​​សម្រាប់​​​ការ​​​ចរចា​​​នៅ​​​ពេល​​​អនាគត​​​​​​​ប៉ុណ្ណោះ​​​ហើយ​​​ថា រដ្ឋាភិបាល​​​នឹង​​​មិន​​​លុប​​​ចោល​​​ការ​​​យក​​​ពន្ធ​​​លើប្រាក់​ចំណូល​​​ពីគ្រូបង្រៀន​​​បរទេស​​​​​​ដោយ​​​ឯកតោ​​​ភាគី​​​​​ឡើយ​​​។

លោក​​​បាន​​​មាន​​​ប្រសាសន៍​​​ថា ”ជា​​​ធម្មតា​​​​​​ កិច្ច​​​​ព្រម​​​ព្រៀង​​​ពន្ធ​​​ត្រួត​​​គ្នា​​​មាន​​​ត្រឹម​​​តែ​​​ការ​​​យក​​​ពន្ធ​​​អាជីវកម្ម​​​ប៉ុណ្ណោះ​​​ ប៉ុន្តែ នេះ​​​វា​​​មាន​​​ន័យ​​​ថា ប្រសិន​​​បើ​​​​​​យើង​​​ចុះ​​​កិច្ច​​​ព្រម​​​ព្រៀង​​​ពន្ធ​​​ត្រួត​​​គ្នា​​​នា​​​ពេល​​​អនាគត​​​ វា​​​នឹង​​​មិន​​​គ្រាន់​​​តែ​​​រួម​​​បញ្ចូល​​​​​​​​​​​​ពន្ធ​​​អាជីវកម្ម​​​ទេ​​​ ប៉ុន្តែ ថែម​​​ទាំង​​​ពន្ធ​​លើប្រាក់​​​ចំណូល​​​ផ្ទាល់​​​ខ្លួន​​​ផង​​​ដែរ​​​”។

លោក​​​​​​មាន​​​ប្រសាសន៍​​​បន្ថែម​​​ថា ”​​​វា​មាន​​​តែ​​​​នៅ​​​ក្នុង​​​កិច្ច​​​ព្រម​​​ព្រៀង​​​ពន្ធ​​​ត្រួត​​​​​​គ្នា​​​​​​ប៉ុណ្ណោះ។ ​វាមាន​​​ន័យ​​​ថា ប្រសិនបើ​គ្រូបង្រៀន​​​បង់​​​ពន្ធ​​​នៅ​​​ក្នុង​​​ប្រទេស​​​របស់​ពួក​​​គាត់​​​ ពួក​​​គាត់​​​នឹង​​​មិន​​​បង់​​​ពន្ធ​​​នៅ​​​​​​​កម្ពុជា​​​​ឡើយ​។ ហើយបើ​ពួកគា​ត់​​​​សម្រេច​​​បង់​​​ពន្ធ​​​នៅ​​​​​កម្ពុជា​​​ អ៊ីចឹង​​​ពួកគាត់​​​​មិន​​​​​​​បង់​​​ពន្ធ​​​នៅ​​​ក្នុង​​​ប្រទេស​​​ដើមកំណើត​​​​​​របស់​​​ខ្លួន​ឡើយ​​​។ វា​​​មិន​​មែនកំពុងតែ​លុបចោលការ​​​​យក​​​ពន្ធ​​​ពី​​​គ្រូបង្រៀន​​​ទេ​​​”។

លោក​​​ស្រី អ៊ុក​​​ ឆាយ៉ាវី ប្រធាន​​​ស្តី​​​ទី​​​សមា​គម​​​​​​គ្រូបង្រៀន​កម្ពុជា​​​ឯករាជ្យ​​​ បាន​​​លើក​​​ឡើង​​​ថា ​ប្រសិនបើ​​​​​​គ្រូបង្រៀន​​​បរទេស​​​មិន​​​តម្រូវ​​​ឲ្យ​​​បង់​​​​ពន្ធ​​​នៅ​​​ក្នុង​​​ប្រទេស​​​កម្ពុជា​​​ទេ អ៊ីចឹង​​​ការ​​​លើក​​​​​​ទឹក​​​ចិត្ត​​​បែប​​​នេះ​​​គួរ​​​តែ​​​​​​ផ្តល់​​​ជូន​​​គ្រូ​​​បង្រៀន​​​ក្នុង​​​ស្រុក​​​ដែល​​​មាន​​​ប្រាក់​​​ខែ​​​ទាប​​​ដែរ​​​។

លោក​​​ស្រីបាន​​​មាន​​​ប្រសាសន៍​​​ថា ”វា​​​មិន​​​យុត្តិធម៌​​​សម្រាប់​​​​​​សាស្ត្រាចារ្យ​​​​​​ និងគ្រូបង្រៀន​​​​​​ក្នុង​​​ស្រុក​​​ដែល​​​មាន​​​ប្រាក​​​់​​​ខែ​​​ទាប​​​ស្រាប់​​​ ហើយ​​​​​ត្រូវ​បង់​​​ពន្ធ​​​ជូន​​​រដ្ឋ​​ទៀត​​​​​​​ ខណៈ​​​​​​សាស្ត្រាចារ្យ​​​​​​បរទេស​​​ទទួល​​​បាន​​​អត្ថប្រយោជន៍​​​ច្រើន​​​ និង​​​មាន​​​ប្រាក់​​​ខែ​​​ខ្ពស់​​​​រាប់​​​ពាន់​​​ដុល្លារ​​​”។

លោក​​​ស្រី​​​បាន​​​មាន​​​ប្រសាសន៍​​​បន្ត​​​ថា ”វា​​​នឹង​​​​​ប៉ះពាល់​​​ដល់​​​ស្មារតី​​​ និង​​​ការ​​​ខិត​​​ខំ​​​ប្រឹង​​​ប្រែង​​​​​​របស់​​​​​​សាស្ត្រាចារ្យ​​​​​​ នៅ​​​ពេល​​​លោក​​​នាយក​​​រដ្ឋ​​​មន្ត្រី​​​មិន​​​យក​​​ពន្ធ​​​ពី​​​គ្រូបង្រៀន​​​បរទេស ព្រោះ​​​គាត់​​​កំពុង​​​ផ្តល់​​​តម្លៃ​​​ដល់​​​គ្រូបង្រៀន​​​បរទេស​​​ជាង​​​​​​សាស្ត្រាចារ្យ​​​​​​​​​នៅក្នុង​​​ប្រទេស​​​​​​របស់​​​គាត់​​​​​​”៕ ស៊ុយឈាង​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស