28.3 C
Phnom Penh

ប៉ូលិស​ចាប់​ខ្លួន​និង​ដោះលែង​សកម្មជន​វិញ​នៅ​ខេត្ត​កោះកុង

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​សៅរ៍ ប៉ូលិស​ខេត្ត​កោះកុង​បាន​ចាប់​ខ្លួន​និង​ដោះលែង​សកម្មជន​ម្នាក់​វិញ ដែល​សកម្មជន​រូប​នេះ​បាន​ជួយ​គ្រួសារ​ជាច្រើន​រៀបចំ​ការ​បិទ​ផ្លូវ​ប្រឆាំង​ក្រុមហ៊ុន​ចិន​មួយ ដែល​ពួកគាត់​ចោទ​ថា បាន​លួច​ប្លន់​ដី​ស្រែ​ចម្ការ​របស់​ពួកគាត់។

ប្រជា​ពលរដ្ឋ​យ៉ាង​ហោច​ណាស់​១០០​នាក់​ចាប់​តាំង​ពី​ថ្ងៃ​សុក្រ​បាន​បិទ​ផ្លូវ​មួយ​ដែល​ឆ្ពោះ​ទៅ​តំបន់​ទេសចរណ៍​ទំហំ​៤៥.០០០​ហិកតា​តម្លៃ​៣,៨​ពាន់​លាន​ដុល្លារ ដែល​ក្រុមហ៊ុន Union Development Group របស់​ប្រទេស​ចិន​កំពុង​ធ្វើ​នៅ​កណ្តាល​ឧទ្យាន​ជាតិ​បទុម​សាគរ​របស់​ខេត្ត​នេះ។ ប្រជាពលរដ្ឋ​ប្រហែល​១.០០០​គ្រួសារ​ត្រូវ​បាន​បណ្តេញ​ចេញ​រួច​ជា​ស្រេច​ហើយ ដើម្បី​បើក​ផ្លូវ​ឲ្យ​គម្រោង​នេះ និង​យ៉ាង​ហោច​ណាស់​១០០​គ្រួសារ​ទៀត​កំពុង​ទាមទារ​សំណង​សមរម្យ​សម្រាប់​ដី​ស្រែ​ចម្ការ ដែល​ពួកគេ​បាន​បាត់បង់។

លោក ម៉ក់ សុវណ្ណារ៉ា នាយរង​​ប៉ូលិស​ព្រហ្មទណ្ឌ​កម្រិត​ស្រាល​ខេត្ត បាន​និយាយ​ថា ប៉ូលិស​និង​កម្លាំង​រាជ​អាវុធហត្ថ​ប្រហែល​៥០​នាក់​ត្រូវ​បាន​បញ្ជូន​ទៅ​កន្លែង​កើត​ហេតុ​នៅ​ម៉ោង​ប្រហែល​៦ព្រឹក​ថ្ងៃសៅរ៍ ដើម្បី​បំបែក​ការ​ដាក់​របាំង​ផ្លូវ​ ហើយ​ថា សកម្មជន សុទ្ធ ពិសិដ្ឋ ត្រូវ​បាន​នាំ​ខ្លួន​មក​កន្លែង​ប៉ូលិស​ ព្រោះតែ​ព្យាយាម​ឃាត់​ក្រុម​មន្ត្រី​មិន​ឲ្យ​អនុវត្ត​បទបញ្ជា​របស់​ពួកគេ។

លោក​បាន​និយាយ​ថា “យើង​បាន​ដាក់​ពង្រាយ​ប៉ូលិស​និង​កម្លាំង​រាជ​អាវុធហត្ថ​ប្រហែល​៥០នាក់​ដើម្បី​ផ្តល់​សន្តិសុខ​សម្រាប់​ក្រុមហ៊ុន ពីព្រោះ​យើង​ខ្លាច​អ្នក​តវ៉ា​បំផ្លាញ​ទ្រព្យ​សម្បត្តិ​របស់​ក្រុមហ៊ុន”។

លោក​បាន​និយាយ​ថា ចំពោះ​លោក​ ពិសិដ្ឋ​ “យើង​មិន​បាន​ចាប់​ខ្លួន​បុរសនេះ​ទេ។ យើង​គ្រាន់តែ​នាំ​ខ្លួន​គាត់​មក​សាកសួរ​ ពីព្រោះ​គាត់​បាន​រារាំង​សមត្ថកិច្ច​របស់ខ្ញុំ​មិន​ឲ្យ​បំពេញ​កិច្ចការ​របស់​ពួកគេ។ ប៉ុន្តែ ខ្ញុំ​បាន​ឲ្យ​គាត់​ត្រឡប់​ទៅ​ផ្ទះ​វិញ​នៅ​ថ្ងៃ​ដដែល​នោះ”។

លោក ពិសិដ្ឋ មន្ត្រី​នៅ​ក្រុម​ការងារ​សិទ្ធិមនុស្ស​កម្ពុជា បាន​និយាយ​ថា មនុស្ស​ប្រហែល​១៥០នាក់​បាន​បិទ​ផ្លូវ ដើម្បី​ទាមទារ​ឲ្យ​ប្រគល់​ដី​ស្រែ​ចម្ការ​របស់​ពួកគេ​មក​វិញ និង​ខឹង​ខ្លាំង​ដោយសារ​តែ​លិខិត​មួយ​ច្បាប់​នា​ពេល​ថ្មីៗនេះ​ដែល​រដ្ឋមន្ត្រី​ក្រសួង​បរិស្ថាន​លោក​ សាយ សំអាល បាន​បញ្ជូន​ទៅ​លោក​នាយក​រដ្ឋមន្ត្រី ហ៊ុន សែន​ ដោយ​ហៅ​ពួកគាត់​ថា “ក្រុម​ប្រឆាំង”។

លោក ពិសិដ្ឋ បាន​និយាយ​ថា ប៉ូលិស​បាន​មក​ដល់​មាន​ទាំង​ដំបង​និង​ដំបង​ឆក់​ផង ហើយ​បាន​គ្រវី​ដំបង​គំរាម​កំហែង​ក្រុម​អ្នក​តវ៉ា។

លោក​បាន​និយាយ​ថា “ពួកគេ​បាន​ចាប់​ខ្លួន​ខ្ញុំ​នៅ​ពេល​ដែល​ខ្ញុំ​បាន​ព្យាយាម​ឃាត់​ពួកគេ​មិន​ឲ្យ​ប្រើ​ហិង្សា​លើ​ក្រុម​អ្នក​តវ៉ា”។

សកម្មជន​រូប​នេះ​បាន​និយាយ​ថា គេ​បាន​ដោះលែង​រូប​គាត់​នៅ​ម៉ោង​ប្រហែល​៣​រសៀល បន្ទាប់ពី​គាត់​បាន​ចុះហត្ថលេខា​លើ​លិខិត​មួយ​ដែល​សន្យា​ថា នឹង​មិន​បិទ​ផ្លូវ ឬ​ដឹកនាំ​ការ​តវ៉ា​ទៀត ជា​ការ​សន្យា​ដែល​គាត់​បាន​និយាយ​ថា គាត់​គ្មានចិត្ត​ធ្វើ​តាម​នោះ​ទេ។

លោក ស្រ៊ុន ដារិទ្ធ នាយរង​ខុទ្ទកាល័យ​ក្រសួង​បរិស្ថាន​បាន​និយាយ​ថា លោក​ សំអាល មិន​មាន​ន័យ​ចោទ​ក្រុម​អ្នក​តវ៉ា​ថា ធ្វើ​ការ​ឲ្យ​បក្ស​ប្រឆាំង​ទេ៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស