32.9 C
Phnom Penh

អ្នកភូមិ​​​រាប់​​​រយ​​​គ្រួសារ​​​ក្នុង​​​ខេត្ត​​​ភាគ​​​ពាយព្យ​​​ត្រូវ​​​បាន​​​ជម្លៀស​​​ពី​​​ទឹក​​​ជំនន់

ដោយ ឌឹ ខេមបូឌា ដេលី

បទវិភាគ

ក្រុម​​​មន្ត្រី​​​បាន​​​និយាយ​​​កាល​​​ពី​​​ម្សិលមិញ​​​ថា អ្នក​​​ភូមិ​​​រាប់​​​រយ​​​គ្រួសារ​​​ត្រូវ​​​បាន​​​ជម្លៀស​​​ចេញ​​​ពី​​​ផ្ទះ​​​សំបែង​​​របស់​​​ខ្លួន​​​នៅ​​​ក្នុង​​​ខេត្ត​​​ប៉ៃលិន កាល​​​ពី​​​ចុង​​​សប្តាហ៍​​​ ខណៈ​​​ដែល​​​ខ្យល់​​​ព្យុះ​​​វ៉ាម​​​កូ (Vamco)​​​ បាន​​​នាំ​​​មក​​​នូវ​​​ភ្លៀង​​​ធ្លាក់​​​យ៉ាងខ្លាំង​​​​​​នៅ​​​​​​តំបន់​​​ភាគ​​​ពាយព្យ​​​ បន្ទាប់​​​ពី​​​​​​បណ្តាលឲ្យ​​​មាន​​​ការ​​​លិច​​​លង់​​យ៉ាង​​​ធ្ងន់ធ្ងរ​​​​​​ក្នុង​​​ខេត្ត​​​កំពត​​​ និង​​​ខេត្ត​​​បាត់​​​ដំបង​​​កាល​​​ពី​​​សប្តាហ៍​​​មុន។

លោក កែវ វី ប្រធាន​​​ខុទ្ទ​​​កាល័យ​​​នៃ​​​គណៈ​​​​​​​​​កម្មា​​​ធិការ​​​ជាតិ​​​គ្រប់​​​គ្រង​​​គ្រោះ​​​មហន្ត​​​រាយ​​​បាន​​​មាន​​​ប្រសាសន៍​​​ថា កាល​​​ពី​​​សប្តាហ៍​​​មុន​​​ខេត្ត​​​ចំនួន​​​ប្រាំ​​​បី​​​បានរងផល​​​​​​ប៉ះពាល់ដោយ​​​ភ្លៀង​​​ធ្លាក់យ៉ាង​​​ខ្លាំង​​​​​​ដោយ​​​​​​ខេត្ត​​​ប៉ៃលិន និង​​​ខេត្ត​​​បាត់​​​ដំបងបាន​​​រង​​​ផល​​​ប៉ះពាល់ពី​​​​​​ខ្យល់​​​ ្យុះ​​​នេះ​​​​​​​​​ធ្ងន់​​​ធ្ងរ​​​ជាង​​​គេ​។

លោក កែវ វី បាន​​​មាន​​​ប្រសាសន៍​​​ថា “នៅ​​​ក្នុង​​​ខេត្ត​​​ប៉ៃលិន​​​ យើ​​​បាន​​​ជម្លៀស​​​ប្រជាជន​​​​​​៤០៧​​​​​​គ្រួសារ ឬ​​​១.៦៥៥​​​នាក់ចេញ​​​​​​ពី​​​ផ្ទះ​​​សំបែង​​​​​​​​​របស់​​​ខ្លួន​​​ចាប់​​​តាំង​​​ពី​​​ថ្ងៃ​​​សៅរ៍មក ហើយ​​​រដ្ឋា​​​ភិបាល​​​បាន​​​ផ្តល់​​​អង្ករ​​​ចំនួន​​​៧​​​តោន​​​ដល់​​​ពួក​​​គាត់​​​”។

លោក គង់ ឌួង ប្រធាន​​​មន្ទីរ​​​ព័ត៌មាន​​​ខេត្ត​​​បាន​​​បន្ទោសថា ​​​ការ​​​លិច​​​លង​​​់​​​នេះបណ្តាល​​​មក​​​ពី​​​ការ​​​បង្ហូរ​​​ទឹក​​​ពី​​​ប្រទេស​​​ថៃ​​​​​​មក​​​កាន់​​​ខេត្ត​​​ភាគ​​​ខាង​​​លិច​​​េនះដែល​​​ក៏​​​បាន​​​ជួប​​​ប្រទះ​​​ភ្លៀង​​​​​​ដ៏​​​ខ្លាំង​​​ដែរ​​​នោះ​​​។

លោក​​​បាន​​​មាន​​​ប្រសាសន៍​​​ថា “ខ្ញុំ​​​គិត​​​ថា ​​​ប្រសិន​​​បើ​​​​​​មិន​​​មាន​​​ការ​​​បង្ហូរ​​​ទឹក​​​យ៉ាង​​​ច្រើន​​​​​​​​​ពី​​​ប្រទេស​​​ថៃ​​​ទេនោះ​​​ប្រហែល​​​ជា​​​មិន​​​មាន​​​ការ​​​លិច​​​លង់​​​ក្នុង​​​ខេត្ត​​​របស់​​​យើង​​​ឡើយ​​​”។

លោក​​​បាន​​​បន្ថែម​​​ថា អាជ្ញាធរ​​​ខេត្ត​​​ និង​​​កាក​​​បាទ​​​ក្រហម​​​កម្ពុជា​​​បាន​​​ផ្តល់​​​ស្បៀង​​​អាហារ និង​​​ទឹក​​​ស្អាត​​​ដល់​​​គ្រួសារ​​​ដែល​​​ត្រូវ​​​បាន​​​ជម្លៀស​​​ទៅ​​​កាន់​​​ទី​​​ទួ​​​ល​​​សុវត្ថិភាព​​​។

យោង​​​តាម​​​លោក កែវ វី បាន​​​ឲ្យដឹង​​​ថា ​​​នៅ​​​​​​​​​ក្នុង​​​ខេត្ត​​​បាត់​​​ដំបង​​​ឯណោះ​​​វិញផ្ទះ​​​៧៥៧​​​ខ្នង​​​ត្រូវ​​​បាន​​​លិច​​​លង់​​​ ភា​​គ​​​ច្រើន​​​ក្នុង​​​ស្រុក​​​កំរៀង​​​​​​ ​​​និង​​​ស្រុក​​​បវេល​​​ ហើយ​​​​​​ដំឡូង​​​ដាំ​​​ដុះ​​​លើ​​​ផ្ទៃ​​​ដី​​​ទំហំ​​​៩.៨៣៩​​​ហិក​​​តា​​​ត្រូវ​​​បាន​​​ខូច​​​ខាត​​​។

លោក ច័ន្ទ សុផល អភិបាល​​​ខេត្ត​​​បាត់​​​បង​​​បាន​​​មាន​​​ប្រសាសន៍​​​ថា អ្នក​​​ភូមិ​​​ប្រហែល​​​៣០០​​​​​​ គ្រួសារ​​​ត្រូវ​​​បាន​​​ជម្លៀស​​ចេញ​​​​​​ក្នុង​​​ខេត្ត​​​របស់​​​លោក ហើយ​​​ថា អាជ្ញាធរ​​​បាន​​​បិទ​​​​​ច្រក​​​ព្រំ​​​ដែន​​​អន្តរ​​​ជាតិ​​​ចំនួន​​​ពីរ​​​នៅ​​​តាម​​​ព្រំដែន​​​ថៃ​​​ជា​​​បណ្តោះ​​​អាសន្ន ដោយ​​​សារ​​​​​​ទឹក​​​មាន​​​កម្ពស់​​​ជាង​​​១​​​ម៉ែត្រ​​​ឯណោះ​​​។

លោក​​​​​​បាន​​​ថ្លែង​​​ថា ​​​”ដោយ​​​សារ​​​ការ​​​ លិច​​​លង់​​​នេះ​​​ យើង​​​បាន​​​បញ្ជា​​​ឲ្យ​​​បិទ​​​ច្រក​​​ព្រំដែន​​​អន្តរជាតិ​​​ចំនួន​​​ពីរ​​​ជា​​​បណ្តោះ​​​អាសន្ន​​​​​​។ ​​​ច្រក​​​ព្រំដែន​​​ទាំង​​​ពីរ​​​នេះ​​​ត្រូវ​​​បាន​​​បើក​​​ឡើង​​​វិញ​​​នៅ​​​ម៉ោង​​​ប្រហែល​​​៧​​​យប់​​​ថ្ងៃ​​​សៅរ៍​​​​​​”។

លោក ច័ន្ទ សុផល ក៏​​​បាន​​​លើក​​​ឡើង​​​ផង​​​ដែរ​​​ថា ស្ត្រី​​​អាយុ​​​៨៣​​​​​​ឆ្នាំ​​​ម្នាក់​​​បាន​​​លង់​​​ទឹក​​​ស្លាប់​​​​​​នៅ​​​ក្នុង​​​ឃុំ​​​អូរ​​​ដំបង​​​១​​​ ស្រុក​​​​​​សង្កែ​​​ កាល​​​ពី​​​ថ្ងៃ​​​សុក្រ​​​។

លោក​​​បាន​​​មាន​​​ប្រសាសន៍​​​ថា “គាត់​​​បាន​​​ស្លាប់​​​ បន្ទាប់​​​ពី​​​​​​ទឹក​​​ឡើង​​​យ៉ាង​​​គំហុក​​​​​​ ខណៈ​​​ដែល​​​គាត់​​​បាន​​​ទៅ​​​បេះ​​​​​​​ត្រកួន​​​នៅ​​​ក្បែរ​​​ផ្ទះ”។

លោក កែវ វី បាន​​​មាន​​​ប្រសាសន៍​​​ថា បើ​​​ទោះ​​​ណា​​​ជា​​​ខ្យល់​​​ព្យុះ​​​វ៉ាមកូ បាន​​​បំផ្លាញ​​​ផ្លូវ​​​នៅ​​​តាម​​​ព្រំដែន​​​ថៃ​​​ក៏​​​ដោយ​​​ ក៏​​​ទឹក​​​ជំនន់​​​នេះ​​​បាន​​​​​​ស្រក​​​ទៅ​​​វិញ​​​មួយ​​​ផ្នែក​​​ធំ​​​ហើយ​​​​​​នៅ​​​តាម​​​ខេត្ត​​​តំបន់​​​ឆ្នេរ​​​ដូចជា​​​ខេត្ត​​​កែប កំពត​​​ ព្រះ​​​សីហនុ ​​​និង​​​ខេត្ត​​​កោះ​​​កុង​​​​​​ជាដើម​​​។ ​​​លោក ​​​កែវ វី បាន​​​​​​ថ្លែង​​​ថា មិន​​​ទាន់​​​មាន​​​ការ​​​ប៉ាន់​​​ប្រមាណ ​​​​​​ពី​​​ការ​​​ខូច​​​ខាត​​​សរុប​​​ដែល​​​បង្កឡើង​​​ដោយ​​​ខ្យល់ ​​​ព្យុះ​​​នេះ​​​ ដែល​​​ក៏​​​បាន​​​​​​ប៉ះពាល់​​​ដល់​​​ខេត្ត​​​ពោធិ៍​​​សាត់ និង​​​ខេត្ត​​​បន្ទាយ​​​មាន​​​ជ័យផងដែរ​​​​​​នៅ​​​ឡើយ​​​ទេ​​​។

លោក​​​បាន​​​ថ្លែង​​​ថា “នៅ​​​ក្នុង​​​ខេត្ត​​​កំពត​​​  ផ្ទះ​​​ចំនួន​​​៤.៣៨១​​​ខ្នង​​​ត្រូវ​​​បាន​​​លិច​​​លង់​​​ ប្រជាជន​​​២១.៦២០នាក់​​​រង​​​ផល​​​ប៉ះពាល់​​​ដោយ​​​ការ​​​លិច​​​លង់​​​នេះ​​​ ហើយ​​​ដី​​​ស្រែ​​​ទំហំ​​​២.២៩១​​​ហិកតា​​​រង​​​ការ​​​ខូច​​​ខាត​​​។ អាជ្ញាធរ​​​បាន​​​ផ្តល់​​​ស្បៀង​​​អាហារ និង​​​ទឹក​​​ស្អាត​​​ដល់​​​ប្រជាជន​​​​​​៣៤៩​​​គ្រួសារ​​​”។

លោក សឹង សយ អាយុ​​​៧០​​​ឆ្នាំ ជា​​​កសិករ​​​ម្នាក់​​​រស់​​​នៅ​​​ក្នុង​​​ស្រុក​​​កំរៀង​​​ ​​​ខេត្ត​​​បាត់​​​ដំបង​​​បាន​​​និយាយ​​​ថា ដំឡូង​​​មី​​​របស់​​​គាត់​​​៧​​​ហិក​​​តា​​​ក្នុង​​​ចំណោម​​​ផ្ទៃ​​​ដី​​​១២​​​ហិក​​​តា​​​ត្រូវ​​​បាន​​​ខូច​​​ខាត​​​ដោយ​​​សារ​​​ការ​​​លិច​​​លង់​​​នេះបី​​​​​​ថ្ងៃ​​​កន្លង​​​មកហើយ​​​​​​។

លោក​​​បាន​​​និយាយ​​​ថា “នៅ​​​ផ្ទះ​​​របស់​​​ខ្ញុំ​​​ ​​​ទឹក​​​លិច​​​រហូត​​​ដល់​​​ត្រឹម​​​ចង្កេះ​​​ឯណោះ ហើយ​​​ចម្ការ​​​ដំឡូង​​​របស់​​​ខ្ញុំ​​​ ទឹក​​​លិចកម្ពស់​​​ប្រហែល​​​​​​២ម៉ែត្រឯណោះ​​​”។

លោក​​​បាន​​​និយាយ​​​ថា “ក្តី​​​សង្ឃឹម​​​របស់​​​ខ្ញុំ​​​ត្រូវ​​​រលាយ​​​អស់​​​ហើយ។​​​តើ​​​ខ្ញុំ​​​ត្រូវ​​​ធ្វើ​​​អ្វី​​​ទៀត​​​នៅ​​​ពេល​​​ក្រោយ​​​?”៕ សារុន​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស