អ្នកនាំពាក្យលោកនាយករដ្ឋមន្ត្រីបានឲ្យដឹងថា កាលពីម្សិលមិញ លោកនាយករដ្ឋមន្ត្រី ហ៊ុន សែន បានជួបពិភាក្សាជាមួយលោក ស្រី រ៉ូណា ស្មីត (Rhona Smith) អ្នករាយការណ៍ ពិសេសថ្មីរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាដោយស្នើឲ្យអ្នករាយការណ៍ពិសេសរូបនេះផ្តោតការខិតខំប្រឹងប្រែងរបស់ខ្លួនលើការរើសអើងជាតិសាសន៍។
បន្ទាប់ពីកិច្ចប្រជុំពិភាក្សារយៈពេល១ ម៉ោងនៅឯអគារការិយាល័យរបស់លោក ហ៊ុន សែន ក្នុងរាជធានីភ្នំពេញ លោក អៀង សុផាល្លែត ជំនួយការផ្ទាល់របស់លោកនាយក រដ្ឋមន្ត្រីបានលើកឡើងថា លោក ហ៊ុន សែន និងលោកស្រី រ៉ូណា ស្មីត បានពិភាក្សាអំពីតួនាទីរបស់លោកស្រី និងវិធីដែលរដ្ឋាភិបាលនិងអ្នករាយការណ៍ពិសេសរូបនេះអាចធ្វើការជាមួយគ្នា ដើម្បីដោះស្រាយស្ថានភាពសិទ្ធិមនុស្សនៅកម្ពុជា។
លោក អៀង សុផាល្លែត បានលើកឡើង ទៀតថា អំឡុងកិច្ចប្រជុំពិភាក្សា លោក ហ៊ុន សែន បានចាត់ទុកសិទ្ធិមនុស្សថា ជា “សិទ្ធិរស់រានមានជីវិត សិទ្ធិទទួលបានការអប់រំ និងសិទ្ធិទទួលបានអាហារគ្រប់គ្រាន់” និងបានចាត់ទុកការរើសអើងជាតិសាសន៍ថា ជាបញ្ហាដែលលោកស្រី រ៉ូណា ស្មីត គួរដោះស្រាយ។
លោកបានមានប្រសាសន៍ថា ”ជាពិសេស សម្តេចបានស្នើឲ្យលោកស្រីពិនិត្យមើលការរើសអើងជាតិសាសន៍នៅកម្ពុជា”។
ទោះបីជាលោក អៀង សុផាល្លែត មិនរៀបរាប់ច្រើនក៏ដោយ តែអង្គការសិទ្ធិមនុស្ស និងមន្ត្រីរដ្ឋាភិបាលជារឿយៗតែងតែរិះគន់មេដឹកនាំគណបក្សសង្គ្រោះជាតិថា បានប្រើពាក្យរើសអើងចំពោះពលរដ្ឋវៀតណាម។ លោក សុរិយា ស៊ូបេឌី អតីតអ្នករាយការណ៍ពិសេសប្រចាំប្រទេសកម្ពុជាបានលើកឡើងនៅក្នុងរបាយការណ៍មួយកាលពីឆ្នាំមុនថា លោកត្រូវបានគេ “ព្រមាន”ដោយភាសាបែបនេះ។
ទោះជាយ៉ាងណា លោក សម រង្ស៊ី មេដឹកនាំគណបក្សប្រឆាំងបានលើកឡើងថា ការផ្តោតរបស់លោក ហ៊ុន សែន លើការរើសអើងជាតិសាសន៍ គឺជាវិធីសាស្ត្រដើម្បីបង្វែរចំណាប់អារម្មណ៍។
លោកបានមានប្រសាសន៍ថា “មានបទប្បញ្ញត្តិនៅ ក្នុងច្បាប់ដើម្បីទប់ស្កាត់ និងដាក់ទោសទណ្ឌការរើសអើងជាតិសាសន៍ណាមួយរួចហើយ។ ប្រហែលជាគាត់ចង់បង្វែរចំណាប់អារម្មណ៍ពីបញ្ហាត្រូវដោះស្រាយបន្ទាន់ផ្សេងៗដែលត្រូវបានលើកឡើងក្រោយការបង្ក្រាបនិងក្រោយអ្វីដែលយើងបានឃើញក្នុងពេលថ្មីៗមកនេះ”។
កាលពីខែកក្កដា សកម្មជនគណបក្សសង្គ្រោះជាតិចំនួន១១រូបត្រូវបានផ្តន្ទាទោសឲ្យជាប់ពន្ធនាគារចន្លោះពី៧ឆ្នាំទៅ២០ឆ្នាំពីបទកុបកម្ម ខណៈលោក ហុង សុខហួរ សមាជិកព្រឹទ្ធសភាគណបក្សប្រឆាំងត្រូវបានចាប់ខ្លួនកាលពីខែសីហា ពីបទក្លែងឯកសារសាធារណៈ និងញុះញង់ជុំវិញការបង្ហាញសន្ធិ សញ្ញា ព្រំដែនក្លែងក្លាយនៅក្នុងវីដេអូឃ្លីបមួយដែលបង្ហោះតាមហ្វេសប៊ុក។
លោក សម រង្ស៊ី បានលើកឡើងថា លោក នៅមិនទាន់ទទួលបានដំណឹងពីការិយាល័យរបស់លោកស្រី រ៉ូណា ស្មីត នៅឡើយទេថាតើលោកអាចមានឱកាសជួបពិភាក្សាជាមួយអ្នករាយការណ៍ពិសេសនេះ ឬយ៉ាងណាប៉ុន្តែថា ប្រសិនបើលោកបានជួបពិភាក្សា ជាមួយលោកស្រី រ៉ូណា ស្មីត មែននោះលោកនឹងផ្តោតលើសេរីភាពក្នុងការបញ្ចេញមតិ។
បច្ចុប្បន្នលោកស្រី រ៉ូណា ស្មីត កំពុងបំពេញការងារជាលើកដំបូងនៅកម្ពុជា ចាប់តាំងពីលោកស្រីត្រូវបានជ្រើសរើសឲ្យធ្វើជាប្រេសិតសិទ្ធិមនុស្សអង្គការសហប្រជាជាតិកាលពីខែមីនា មក។ ដំណើរបំពេញការងាររបស់លោកស្រី នឹងបញ្ចប់នៅថ្ងៃព្រហស្បតិ៍។
លោកស្រី អូលហ្គា ណាកាចូ (Olga Nakajo) ជំនួយការរបស់អ្នករាយការណ៍ពិសេសរូបនេះបានលើកឡើងថា លោកស្រី រ៉ូណា ស្មីត បានលើកឡើងពីបញ្ហាជាច្រើនជាមួយលោក ហ៊ុន សែន កាលពីម្សិលមិញ រួមទាំងសេរីភាពក្នុងការបញ្ចេញមតិ ដីសម្បទានសេដ្ឋកិច្ច និងតួនាទីនៃការអប់រំ និងសុខភាពនៅក្នុងការលើកកម្ពស់សិទ្ធិមនុស្សផងដែរ។
លោកស្រីបានបន្ថែមថា លោកស្រី រ៉ូណាស្មីត គ្រោងជួបជាមួយមន្ត្រីរដ្ឋាភិបាលមួយចំនួនផ្សេងទៀតនៅសប្តាហ៍នេះ រួមទាំងលោកឧបនាយករដ្ឋមន្ត្រី សុខ អាន លោក ស ខេង រដ្ឋមន្ត្រីក្រសួងមហាផ្ទៃ និងលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ផងដែរ។
អ្នករាយការណ៍ពិសេសរូបនេះគ្រោងធ្វើសេចក្តីរាយការណ៍ស្តីអំពីស្ថានភាពសិទ្ធិមនុស្សនៅកម្ពុជាជូនសម័យប្រជុំលើកទី៣០របស់ក្រុមប្រឹក្សាសិទ្ធិមនុស្សអង្គការសហប្រជាជាតិនៅចុងខែនេះ៕ ស៊ុយឈាង