26.3 C
Phnom Penh

រដ្ឋាភិបាល​តែងតាំង​មន្ត្រី​ស៊ើប​អង្កេត​ការ​សម្លាប់​មេដឹកនាំ​សហជីព

ដោយ ឌឹ ខេមបូឌា ដេលី

បទវិភាគ

យោង​តាម​សេចក្តី​សម្រេច​មួយ​ដែល​ទទួល​បាន​កាលពី​ថ្ងៃ​ច័ន្ទ​បាន​ឲ្យ​ដឹង​ថា ជិត​បី​ខែ​បន្ទាប់ពី​ការ​បង្កើត​គណៈកម្មាធិការ​ថ្មី​មួយ ដើម្បី​ស៊ើប​អង្កេត​ឡើង​វិញ​នូវ​ឃាតកម្ម​លើ​មេដឹកនាំ​សហជីព​សេរី លោក ជា វិជ្ជា លោក ហ៊ី វុទ្ធី និង​លោក រស់ សុវណ្ណារ៉េត សមាជិក​របស់​ខ្លួន​បាន​ទទួល​ការ​តែងតាំង​កាលពី​សប្តាហ៍​មុន។

ការ​ស្លាប់​មេដឹកនាំ​សហជីព​ទាំង​បី​អ្នក ដែល​សុទ្ធ​តែ​ត្រូវ​បាន​បាញ់​ដោយ​ឃាតករ​ជិះ​ម៉ូតូ​ក្នុង​ក្រុង​ភ្នំពេញ​រវាង​ឆ្នាំ​២០០៤​និង​ឆ្នាំ​២០០៧ ត្រូវ​បាន​យក​មក​កាត់​ទោស​រួច​ហើយ។ ទោះជា​យ៉ាង​នេះ​ក្តី ក្រុម​សិទ្ធិ​មនុស្ស​បាន​រិះគន់​ការ​ដោះស្រាយ​ករណី​ទាំង​បី​ដោយ​រដ្ឋាភិបាល ដោយ​បញ្ជាក់​ថា អ្នក​រង​កំហុស​អ្នក​ផ្សេង​ត្រូវ​បាន​គេ​ចាប់​ខ្លួន និង​កាត់​ទោស​ពី​បទ​ឃាតកម្ម​ទាំង​នោះ។

នៅ​ថ្ងៃ​ទី​២៥​ខែ​មិថុនា រដ្ឋាភិបាល​បាន​ប្រកាស​ការ​បង្កើត​គណៈកម្មាធិការ​មួយ​ដើម្បី​ស៊ើប​អង្កេត​ឃាតកម្ម​ទាំង​នេះ​ឡើង​វិញ ហើយ​សេចក្តី​សម្រេច​របស់​នាយករដ្ឋមន្ត្រី​មួយ​ដែល​ចុះ​ហត្ថលេខា​នៅ​ថ្ងៃ​ទី​១៥​កញ្ញា បាន​តែងតាំង​លោក ឯម សំអាន រដ្ឋលេខាធិការ​ក្រសួង​មហាផ្ទៃ ជា​ប្រធាន​របស់​គណៈកម្មាធិការ​នេះ។

លោក មុំ វណ្ណៈ រដ្ឋលេខាធិការ​ក្រសួង​ការងារ និង​លោក ង៉ោ សុវណ្ណ រដ្ឋលេខាធិការ​ក្រសួង​យុត្តិធម៌ ជា​អនុប្រធាន។ លោក នេត សាវឿន អគ្គ​ស្នងការ​នគរបាល​ជាតិ លោក សៅ សុខា មេបញ្ជាការ​កងរាជអាវុធហត្ថ​លើ​ផ្ទៃ​ប្រទេស និង​លោក ប៉ា សុជាតិវង្ស អភិបាល​ក្រុង​ភ្នំពេញ ជា​សមាជិក។

លោក អេង ហ៊ី អ្នកនាំពាក្យ​កង​រាជ​អាវុធហត្ថ​លើ​ផ្ទៃ​ប្រទេស បាន​និយាយ​ថា លោក​មិន​បាន​ដឹង​ថា​តើ​ការ​សម្លាប់ ដែល​បាន​កើត​ឡើង​ជាង​មួយ​ទសវត្សរ៍​ហើយ​នោះ នឹង​ត្រូវ​ស៊ើប​អង្កេត​របៀប​ណា​ទេ។ លោក​បាន​និយាយ​ថា “រង់ចាំ​មើល​សិន ពីព្រោះ​យើង​ទើប​តែ​បាន​ទទួល​រឿង​នេះ”។

លោក ជិន ម៉ាលីន អ្នកនាំពាក្យ​ក្រសួង​យុត្តិធម៌ បាន​និយាយ​ថា លោក​ជឿ​ថា គណៈកម្មាធិការ​នេះ​នឹង​ធ្វើការ​ប្រមូល​ព័ត៌មាន ដែល​មិន​បាន​បញ្ចេញ​ឲ្យ​ដឹង​ពី​មុន​មក​ដោយ​រដ្ឋាភិបាល។

លោក​បាន​និយាយ​ថា “យើង​បាន​ស៊ើប​អង្កេត​ករណី​ទាំង​នេះ​ហើយ ប៉ុន្តែ​មាន​ព័ត៌មាន​ខ្លះ​ដែល​យើង​មិន​អាច​បញ្ចេញ​ជា​សាធារណៈ​បាន និង​មាន​ភាព​ស្មុគស្មាញ​ជាច្រើន​ក្នុង​ករណី​ទាំង​នោះ ដូច្នេះ​យើង​មិន​បាន​បញ្ចប់​វា​ទេ។ ករណី​ទាំង​នេះ​ស្ថិត​ក្នុង​ដំណើរការ​នីតិ​វិធី​នៅ​ឡើយ”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស