34 C
Phnom Penh

ពលករចំណាកស្រុក​ឃាត់ខ្លួន​ជន​សង្ស័យក្នុងរាជ​ធានី​ពីបទ​​បោកប្រាស់

ដោយ ឌឹ ខេមបូឌា ដេលី

បទវិភាគ

ពលករ​​​មួយ​​​ក្រុម​​​មានគ្នា​​​៩០នាក់​​​បាន​​​ធ្វើ​​​ការ​​​តវ៉ា​​​កាល​​​ពីម្សិលមិញ​​​នៅខាង​​​ក្រៅ​​​ការិ​​​យា​ល័យ​​​ក្រុមហ៊ុន​​​ជ្រើស​​​រើស​​​ពល​​​ករ​​​មួយ​​​ដែល​​​ពួក​គាត់​​​​និយាយ​​​ថា បាន​​​បោះបង់​​​ពួក​​គាត់​​​​​​ចោល​​​នៅច្រក​​​ព្រំដែន​​​កាល​​​ពី​​​ព្រឹក​​​ថ្ងៃ​​​សៅរ៍ ​​​ហើយ​​​បានបោក​​​ប្រាស់​​​ពួក​​​គាត់​​​​​​យក​​​ប្រាក់​​​អស់​​​រាប់​​ពាន់​​​​ដុល្លារ​​​ ​​​បង់​​​ដើម្បីបាន​​​​​​​​ទៅ​​​​ធ្វើ​​​ការ​​​ងារ​​​នៅ​​​ក្នុង​​​ប្រទេស​​​ថៃ​​​។

ក្រុមពលករ​​​​​​លើក​​​ដៃ​​​បង្ហាញ​​​ថា ពួកគាត់​​​ត្រូវ​​​បាន​​​បុគ្គលិក​​​ក្រុមហ៊ុន​​​ជ្រើស​​​រើស​​​ពល​​​ករ​​​ ជិន វណ្ណដា មេនផៅវើរ​​​ បោះ​​​បង់​​​ចោល​​​នៅ​​​ព្រំដែន​​​ថៃ​​​ កាល​​​ពី​​​ថ្ងៃ​​​សៅរ៍។ ពួក​​​គាត់​​​បាន​​​ប្រមូល​​​ផ្តុំ​​គ្នា​​​នៅខាង​​​ក្រៅ​​​ការិយាល័យ​​​ក្រុមហ៊ុន​​​នេះ​​​កាល​​​ពីម្សិលមិញ។ រូបថតៈ Jens Welding Ollgaard/The Cambodia Daily​​​
ក្រុមពលករ​​​​​​លើក​​​ដៃ​​​បង្ហាញ​​​ថា ពួកគាត់​​​ត្រូវ​​​បាន​​​បុគ្គលិក​​​ក្រុមហ៊ុន​​​ជ្រើស​​​រើស​​​ពល​​​ករ​​​ ជិន វណ្ណដា មេនផៅវើរ​​​ បោះ​​​បង់​​​ចោល​​​នៅ​​​ព្រំដែន​​​ថៃ​​​ កាល​​​ពី​​​ថ្ងៃ​​​សៅរ៍។ ពួក​​​គាត់​​​បាន​​​ប្រមូល​​​ផ្តុំ​​គ្នា​​​នៅខាង​​​ក្រៅ​​​ការិយាល័យ​​​ក្រុមហ៊ុន​​​នេះ​​​កាល​​​ពីម្សិលមិញ។ រូបថតៈ Jens Welding Ollgaard/The Cambodia Daily​​​

យោង​​​តាមពលករ​​​អាយុ​​​៣៥ឆ្នាំ​​​ឈ្មោះ ​​​ដូច ភ័ស្ស បាន​​​ឲ្យ​​​ដឹង​​​ថា ពលករ​​​ទាំង​​​អស់​​​ដែល​​​បាន​​​ចុះ​​​ឈ្មោះ​​​ជា​​​មួួ​​យ​​​ក្រុមហ៊ុន​​​ជ្រើ​ស​​​រើស​​​ពល​​​ករ​​​ ជិនវណ្ណដា មេនផៅវើរ (Chin Vanda Manpower) បាន​​​មក​​​ដល់​​​ខាង​​​ក្រៅ​​​ការិយា​​​ល័យ​​​ ​​​ក្រុមហ៊ុន​​​ស្ថិត​​​ក្នុង​​​ខណ្ឌ​​​សែន​​​សុខ​​​កាល​​​ពី​​​ព្រឹក​​​ម្សិល​មិញ បន្ទាប់ពី​​​ពួកគាត់​​​​​​ទាំង​​​៦៣​​​នាក់​​​ត្រូវ​​​បាន​​​យក​មក​ទុក​​​ចោល​​​នៅ​​​ផ្ទះ​​​សំណាក់​​​មួយ​​​នៅ​​​ច្រក​​​ព្រំដែន​​​អន្តរជាតិ​​​ដូង ក្នុង​​​ខេត្ត​​​បាត់​​​ដំបង​​​ដោយ​​​មាន​​​អ្នក​​​សម្រប​​​សម្រួល​​​ឈ្មោះ  សេង  សាឡែន ។

ដូច ភ័ស្ស​ បាន​​​និយាយ​​​ថា “យើង​​​បានរង់​​​ចាំ​​​យ៉ាង​​​យូរ​​​នៅ​​​ព្រំដែន​​​ដោយ​​​គ្មាន​​​ទទួល​​​បាន​​​ដំណឹង​​​ល្អ​អ្វី​​​សោះ​​​ បន្ទាប់​មក​​​ទើ​​​ប​​​យើង​​​ដឹង​​​ថា ក្រុមហ៊ុន​​​បានបោក​​​ប្រាស់​​​ពួក​យើង​​​។ ​​​ខ្ញុំ​​​ដឹង​​​ថា ពួកគេ​​​បោក​​​ប្រាស់​​​ខ្ញុំ ពីព្រោះ​​​ពួក​​​គេ​​​គ្រាន់​​​តែ​​​នាំ​​​ពួកយើង​​​​​ទៅ​​​​ព្រំដែន​​​ដោយ​​​​​​គ្មាន​​​ឯកសារ​​​អ្វី​​​ឡើយ​​​ ហើយ​​​អ្នក​​​តំណាង​​​រូប​​​នេះ​​​បាន​​​​​​ភូត​​​កុហក​​​ ហើយ​​​បន្ទាប់​​​​​​មក​​​បាន​​​គេ​​ច​​​ខ្លួន​​​បាត់​​​”។

កម្មករ​​​ទាំង​​​អស់​​​ដែល​​​បាន​​​និយាយ​​​ថា ​​​ខ្លួន​​​បាន​​​បង់​​​ប្រាក់​​ចន្លោះ ពី​​​២៥០​​​ដុល្លារ​​​ទៅ​​​៤០០​​​​​​ដុល្លារ​​​ដល់​​​ក្រុមហ៊ុន​​​ ដែល​​​គ្រប់​​​គ្រង​​​ដោយ​​​លោក ជិន វណ្ណដា បាន​​​ត្រឡប់​​​មក​​​រាជធានី​​​ភ្នំពេញ​​​វិញ​​​តាម​​​រថយន្ត​​​ក្រុង​​​កាល​​​ពីថ្ងៃ​​​អាទិត្យ​​​ និង​​​ថ្ងៃ​​​ច័ន្ទ បន្ទាប់ពី​​​ពួកគាត់​​​​​​ដឹង​​​ថា លោក សាឡែន មិន​​​បាន​​​ត្រឡប់​​​​​​មក​​​រក​​​ពួក​​​​​​គាត់​​​​​​​។ ក្រុម​​​នេះ​​​បាន​​​មក​​​ដល់​​​ការិយាល័យ​​​ក្រុមហ៊ុន​​​កាល​​​ពីម្សិល​មិញ​​​​​​ ដោយ​ឃើញ​ក្រុម​​​ហ៊ុន​នេះ​ទទេស្អាត ​​​ស្លាក​​​សញ្ញា​​​ក្រុមហ៊ុន​​​ត្រូវ​​​បាន​​​ដោះ​​​ចេញ​បាត់​។

ការហៅ​​​ទូរស័ព្ទ​​​ទៅ​​​កាន់​​​លេខ​​​ក្រុមហ៊ុន​​​កាល​​​ពី​​​ម្សិលមិញ មិនមាន​​​អ្នក​​​ទទួល​​​ទេ​​​។

យោង​តាម​លោក ឆាង ម៉ៅ អាយុ​២៨​​​ឆ្នាំ​​​បាន​ឲ្យ​ដឹង​ថា ទោះ​​​យ៉ាង​​​ណា​​​ ខណៈ​​​ដែល​​​ពលករ​​​ទាំង​​​នោះ​​​បាន​​​ឈរ​​​នៅ​​​ខាង​​​ក្រៅ​​​ការិ​​​យាល័យ​​​ ពួកគាត់​​​​មួយ​​​ចំនួន​​​បាន​​​ប្រទះ​​​ឃើញ​​​លោក សាឡែន កំពុង​​​ជិះ​​​ម៉ូតូ​​​ ហើយ​​​ក៏​បាន​​​ឃាត់​​​ខ្លួន​​​គាត់​​​តែ​​​ម្តង​​​។

លោក​​​បាន​​​និយាយ​​​​​​ថា “ព្រឹក​​​នេះ​​​ យើង​​​បាន​​​ឃើញ​​​លោក សាឡែន ជិះ​​​ម៉ូតូ​​​ដោយ​​​ចៃដន្យ​​​បន្ទាប់​​​មក​​​យើង​​​បាន​​​ចាប់​​​ខ្លួន​​​គាត់​​​តែ​​​ម្តង​​​”។

និយាយ​​​ទៅ​​​កាន់​​​អ្នក​​​យក​​​ព័ត៌មាន​​​ ខណៈ​​​ដែល​​​ពលករ​​​ឈរ​នៅជុំ​​​វិញ​​​ លោក ​​​សាឡែន ​​​បាន​​​បដិសេធ​​​ថា​​​មិន​​​បានបោក​​​ប្រាស់​​​ពួក​​​គាត់​​​ទេ ហើយ​​​បាន​​​អះ​​​អាង​​​ថា   លោក​​​​​​មិន​​​បាន​​​ត្រឡប់​​​ ទៅ​​​ផ្ទះ​​​សំណាក់​​​​​​វិញ​​​ ពីព្រោះ​​​​​​លោក​​​​​​មិន​​​ទទួល​​​បានប្រាក់​​​ពី​​​លោក វណ្ណដា សម្រាប់​​​ចំណាយ​​​ថ្លៃ​​​ទិដ្ឋាការ​​​របស់ពលករ និង​​​ការ​​​ចំណាយ​​​ផ្សេង​​​ៗ​​​ទៀត​​​​​​។

លោក​​​ សាឡែន បាន​​​និយាយ​​​ថា “ចៅ​​​ហ្វាយ​​​​​​របស់​​​ខ្ញុំ​​​​​​និយាយ​​​ថា គាត់​​​នឹង​​​ផ្ទេរ​​​ប្រាក់​​​ឲ្យ​​​ខ្ញុំ​​​​​​ដើម្បី​​​បង់​​​ថ្លៃ​​​ផ្ទះ​​​សំណាក់ និង​​​ថ្លៃ​​​អាហារ​​​សម្រាប់​​​ពលករ​​​​​​ចំណាកស្រុក​​​ទាំង​​​នេះ ​​​ប៉ុន្តែ គាត់​​​ចេះ​​​តែ​​​ពន្យារ​​​ពេល​​​​​​ក្នុងការ​ផ្ទេរ​​​ប្រាក់​​​ឲ្យ​​​ខ្ញុំ។ ខ្ញុំ​​​មិន​​​បាន​​​ត្រឡប់​​​ទៅជួប​​​ពលករ​​​ចំណាក​​​ស្រុកវិញ ដោយ​​​សារ​​​ចៅហ្វាយ​​​របស់​​​ខ្ញុំ​​​មិន​​​បាន​​​ផ្ទេរ​​​ប្រាក់​​​ឲ្យ​​​ខ្ញុំ​​​”។

នៅ​​​ពេល​​​ទាក់​​​ទង​​​កាល​​​ពីរសៀល​​​ម្សិល​​​មិញ​​​ លោក ភ័ស្ស​ បាន​​​និយាយ​​​ថា លោក​​​បាន​​​ដឹក​​​លោក សាឡែន ទៅ​​​នាយក​​​ដ្ឋាន​​​ប្រឆាំង​​​ការ​​​ជួញ​​​ដូរ​​​មនុស្ស​​​ក្រសួង​​​មហាផ្ទៃ ហើយ​​​ថា ពួក​​​គាត់​​​បាន​​​ឃុំ​​​ខ្លួន​បុរស​រូប​​​​នេះ​​​។

គេ​​​មិន​​​អាច​​​ទាក់ទង​​​ក្រុមមន្ត្រី​​​នៅ​​​នាយក​​​ដ្ឋាន​​​នេះ​​​បាន​​​ទេ​​​៕ សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស