31.8 C
Phnom Penh

នគរបាល​ឆ្មក់ចូល​ផ្ទះ​​ប្តីប្រពន្ធពីរនាក់​សង្គ្រោះ​កុមារ​ដើរ​លក់​ផ្លែឈើ​ជាង​២០នាក់​

ដោយ ឌឹ ខេមបូឌា ដេលី

បទវិភាគ

យោង​តាមនគរ​បាល​បាន​ឲ្យ​ដឹង​ថា កម្មករ​កុមារ​ជាង​២០​នាក់​​ត្រូវ​បាន​ចាប់​ខ្លួន​ក្នុង​រាជ​​​ធានី​​​​ភ្នំពេញ​កាលពី​ម្សិលមិញ បន្ទាប់ពី​​អាជ្ញាធរ​ ប្រឆាំង​ការ​ជួញដូរ​មនុស្ស​បាន​ចាប់​ខ្លួន​ប្ដី​ប្រពន្ធ​ពីរ​នាក់​ដែល​បាន​បង្ខំ​កុមារ​ទាំង​នេះ​ឲ្យ​ធ្វើ​​ការ​ជា​អ្នក​លក់​ផ្លែឈើ​ជា​ថ្នូរ​នឹង​ការ​​​ចំណាយ​ប្រាក់​ទៅ​ឲ្យ​ក្រុម​គ្រួសារ​របស់​ពួកគេ​។

លោក ឯម សារាវុធ អធិការ​នគរ​បាល​ខណ្ឌ​​​​បាន​មាន​ប្រសាសន៍​ថា​ ​មន្ត្រី​មក​ពី​នាយក​ដ្ឋាន​ប្រឆាំង​ការ​ជួញដូរ​មនុស្ស​ក្រសួង​មហាផ្ទៃ សហការ​ជាមួយ​​នគរ​បាល​មូលដ្ឋាន​​បាន​ឆ្មក់​ចូល​​ផ្ទះ​របស់​ប្ដី​ប្រពន្ធ​នេះ​​នៅ​ក្នុង​សង្កាត់​ច្បារអំពៅ​២ ខណ្ឌ​ច្បារអំពៅ ទីដែល​ពួកគេ​បាន​រក​ឃើញ​កុមារ​២២​នាក់​​ដែល​ត្រូវ​បាន​ឃុំខ្លួន​ក្នុង​កន្លែង​ដែល​មាន​មនុស្ស​ណែន​​ណាន់​​តាន់តាប់​។

លោក​បាន​មាន​ប្រសាសន៍​ថា “​នៅ​ព្រឹក​នេះ នគរ​បាល​​​នៅនាយកដ្ឋាន​​ប្រឆាំង​ការ​ជួញដូរ​មនុស្ស និង​នគរ​បាល​​ខណ្ឌ​បាន​ចាប់​ខ្លួន​ជន​សង្ស័យ​ពីរ​នាក់​ដែល​​បាន​កេវប្រវ័ញ្ច​​ពល​កម្ម​កុមារ​។ យើង​បាន​រក​​ឃើញ​កុមារ​២២​ នាក់​នៅ​ក្នុង​ផ្ទះដែល​កំពុង​ដេក​លង់លក់​​ ពីព្រោះ​ពួកគេ​នឿយ​ហត់​អស់​កម្លាំង​ពីការ​ដើរ​​លក់​​​នៅ​តាម​ផ្លូវ​កាលពី​យប់មិញ​”។

លោក​ សារាវុធ ​បាន​​ថ្លែង​ថា កុមារ​ទាំង​២២​នាក់​នេះ​ត្រូវ​បាន​បង្ខំ​ឲ្យ​ធ្វើ​ជា​អ្នក​លក់​ផ្លែឈើ​នៅ​តាម​បៀហ្គាឌិន​ និង​​ភោជនីយ​​​ដ្ឋាន​​នានា​ក្នុង​រាជធានី​​បន្ទាប់ពី​ឈ្មួញ​កណ្ដាល​បាន​ព្រម​ព្រៀង​ជាមួយ​ឪពុក​ម្ដាយ​របស់​ពួកគេ​ដែល​ទទួល​បាន​ប្រាក់ពី​ជន​សង្ស័យ​​​ទាំងនេះ​​ជា​ថ្នូរ​នឹង​​ការ​ឲ្យ​កូន​ៗ​របស់​ពួក​គេ​ធ្វើ​ការ​ងារ​។ លោក​បាន​មាន​ប្រសាសន៍​ថា “​មុន​ពេល​កុមារ​ទាំង​នេះ​ត្រូវ​បាន​បញ្ជូន​ទៅ​ឲ្យ​ជន​សង្ស័យ​ទាំង​ពីរ​នាក់នេះ​ ​មេខ្យល់​​បាន​​ធ្វើ​កិច្ច​សន្យា​​​​ជាមួយ​ឪពុក​ម្ដាយរបស់​ពួកគេ​​។

អធិការ​នគរ​បាល​រូប​នេះ​បាន​ថ្លែង​ថា ជន​សង្ស័យ​​ទាំង​ពីរ​នាក់​​​ត្រូវ​បាន​​សាកសួរ​កាលពី​ល្ងាច​ម្សិលមិញ​នៅ​ទីស្នាក់​ការ​​កណ្ដាល​​​នៃ​នាយកដ្ឋាន​​ប្រឆាំង​ការ​ជួញដូរ​មនុស្ស​​។

លោកស្រី ណា នាង អនុប្រធាន​នាយក​​​ដ្ឋាន​នេះ​បាន​បង្ហាញ​អត្តសញ្ញាណ​​ប្ដី​ប្រពន្ធ​ទាំង​ពីរ​នាក់​នេះ​ថា ឈ្មោះ ខេន វណ្ឌី អាយុ​៣០ និង​ប្ដី​​របស់​គាត់​ឈ្មោះ ជា សាឌី អាយុ​២៨​ឆ្នាំ។ លោក​បាន​​​​បន្ថែម​ថា ​ពួកគេ​នឹង​ត្រូវ​​ឃុំខ្លួន​មួយ​យប់​​ ហើយនឹង​​​ត្រូវ​​​​សាកសួរ​បន្ថែម​ នៅ​ថ្ងៃ​នេះ។

លោកស្រី​បាន​ថ្លែង​ថា “​មុន​​ឈាន​ដល់​​ការចាប់​ខ្លួន​ពួកគេ នគរ​បាល​​បាន​តាមដាន​ប្ដី​ប្រពន្ធ​នេះ​ជា​យូរ​មក​ហើយ។ យើង​មានការ​សង្ស័យ​លើ​ពួកគេ​។យើង​​បាន​ចាប់​ផ្ដើម​ធ្វើការ​ស៊ើប​អង្កេត​ ពីព្រោះ​ក្នុង​ពេល​កន្លង​មក​​យើង​មិន​ដែល​ឃើញ​មាន​កុមារ​ច្រើន​​​បែបនេះ​​ដើរ​លក់​ដូច្នេះ​ទេ ​យើង​ចាប់​ផ្ដើម​ឆ្ងល់​​​ថា​តើ​ហេតុ​អ្វី​បាន​​​ជា​មាន​កុមារ​​ច្រើន​យ៉ាង​​​នេះ​​​​”។

​​លោក​ស្រី ណា នាង បាន​ថ្លែង​ថា នគរ​បាល​បាន​រក​ឃើញ​ផ្ទះ​នេះ​​តាម​រយៈ​ការ​ដើរ​តាម​កុមារ​ទាំង​នេះត្រឡប់​មក​ផ្ទះ​​បន្ទាប់ពី​​ធ្វើ​ការងារ​​។ អ្នកស្រី​បាន​ថ្លែង​ថា អ្នក​ថែរក្សា​ពួកគេ​ប្រឈម​នឹង​ការ​ចោទ​ប្រកាន់​ពីបទ​​ដាក់​អនីតិជន​​ឲ្យ​ស្ថិត​ក្នុង​លក្ខខណ្ឌ​ការ​ងារ​​​បណ្ដាល​ឲ្យ​ខូច​ដល់​សុខភាព​​តាម​មាត្រា​៣៣៩​​​​នៃ​ក្រម​ព្រហ្មទណ្ឌ ដែល​​ត្រូវ​​ផ្ដន្ទា​​​ទោស​​​​ដាក់​ពន្ធនាគារ​​អតិបរមា៥ឆ្នាំ និង​ពិន័យ​​​​ជា​ប្រាក់​រហូត​ដល់​១០.០០០.០០០​​​លាន​រៀល​។

លោក យូ សុភ័ក្ត្រ ដែលបាន​ទៅ​ជាមួយ​នគរ​បាល​អំឡុង​ការ​ឆ្មក់​ចូល​​ក្នុង​នាម​ជា​អ្នក​តំណាង​​មន្ទីរ​សង្គមកិច្ច​រាជធានី​ បាន​មាន​ប្រសាសន៍​បន្ថែម​​​ថា ផ្ទះ​របស់​ប្ដី​ប្រពន្ធ​នេះ​មាន​ ទីធ្លា​ធំ​ទូលាយ​ ប៉ុន្តែ​​ពេញ​ទៅ​ដោយ​ទំនិញ​​សម្រាប់​​ឲ្យ​​កុមារ​​ទាំង​នេះ​ដើេរ​លក់​​​​ ដោយ​ពួកគេ​មាន ពេល​ដេក​តិច​តួច​ប៉ុណ្ណោះ​។

លោក​បាន​ថ្លែង​ថា “​ខ្ញុំ​ឃើញ​ថា ផ្ទះ​នេះ​ងងឹត​ឈឹង​ ហើយ​មិន​មាន​ខ្យល់​អាកាស​​ចេញចូល​​ដើម្បី​ឲ្យ​កុមារ​ទាំង​នេះ​ដក​ដង្ហើម​​បាន​ស្រួល​ឡើយ​”។ លោក​បាន​បន្ថែម​ថា កុមារ​រងគ្រោះ​ទាំង​នេះ​មាន​​អាយុ​ចន្លោះ​ពី​៦​ឆ្នាំ​ដល់​១៧​ឆ្នាំ ហើយ​ថា ​គ្មាន​នរណា​ម្នាក់​​ក្នុង​ចំណោម​ពួកគេ​​​​រស់​នៅ​ភ្នំពេញ​ឡើយ​។

លោក​ សុភ័ក្ត្រ បាន​ថ្លែង​ថា កុមារ​ទាំង​នេះ​បាន​ប្រាប់​លោក​ថា ​ចំនួន​ម៉ោង​ដែល​ពួកគេ​តម្រូវ​ឲ្យ​ធ្វើ​ការ​​​​អាស្រ័យ​លើ​ចំនួន​ទឹក​ប្រាក់​ដែល​ឪពុក​ម្ដាយ​របស់​ពួកគេ​ទទួល​បាន​ពី​ប្ដី​ប្រពន្ធ​ទាំង​ពីរ​នាក់​នេះ​ ដោយ​កុមារ​មួយ​ចំនួន​អះអាង​ថា ពួកគេ​បាន​ធ្វើ​ការ​​រយៈ​ពេល​ជាង​២​ខែ​​មក​ហើយ​។

លោក​បាន​ថ្លែង​ថា “​នៅ​ម៉ោង​ប្រហែល​៤ល្ងាច​រៀង​រាល់​ថ្ងៃ ជន​សង្ស័យ​​ទាំង​នេះ​បាន​​យក​ម៉ូតូ​ឌុប​កុមារ​​ទាំង​នេះ​ទៅ​តាម​ភោជ​​​នីយដ្ឋាន​​​នានា ទីដែល​ពួកគេ​បាន​ដើរ​លក់​ផ្លែ​ឈើ​រហូត​ដល់​​ម៉ោង​​៥ទៀប​ភ្លឺ ​នៅ​ពេល​​​នោះ​​ពួកគេ​យក​ម៉ូតូ​មក​ឌុប​កុមារ​ទាំង​នេះ​ទៅ​ផ្ទះ​​វិញ​”។

លោក​ ម៉ៃ ណូលីន (Mike Nowlin) ​នាយក​រង​ប្រចាំ​ប្រទេស​​នៃ​អង្គការ​ Hagar International បាន​មាន​ប្រសាសន៍​ថា បើ​ទោះ​ណា​ជាការ​ឆ្មក់​ចូល​នេះ​មានការ​ប្រសើរ​ឡើង​ពាក់​ព័ន្ធ​គោល​នយោបាយ​កន្លង​មក​របស់​អាជ្ញាធរ​ក្នុង​ការ​ដើរ​ប្រមូល​អ្នក​លក់​នៅ​តាម​ផ្លូវ ហើយ​​បញ្ជូន​ពួកគេ​ទៅ​មណ្ឌល​សង្គមកិច្ច​រាជធានី​ក៏ដោយ ក៏​​​ជីវភាព​រស់​នៅ​របស់​ក្រុម​គ្រួសារ​កុមារ​ទាំង​នេះ​នៅ​តែបន្ត​ធ្វើ​ឲ្យពួកគេ​​ងាយ​រងគ្រោះ​ចំពោះ​ការ​រំលោភ​បំពាន​ដែរ​។

លោក​បាន​​ថ្លែង​ថា “​​​ប្រសិន​​​បើ​​​ពួក​​​គេ​​​មាន​​​​​ចំណូល​​ខ្ពស់​​​ ឬ​​មាន​​​លទ្ធភាព​ក្នុង​ការ​ទំនុក​បម្រុង ​គ្រួសារ​​ ពួកគេ​ប្រហែល​ជា​​​មិន​​​សម្រេច​ចិត្ត​​លក់​កូនៗ​របស់ខ្លួន​ឲ្យ​ទៅ​ធ្វើ​ការ​ងារ​​​​បែបនេះ​​​ឡើយ​​​”។ លោក​បាន​បន្ថែម​ថា “​ប៉ុន្តែ​​ការ​មិន​មាន​កម្មវិធី​សុខុមាលភាព​ថ្នាក់​ជាតិ​​​ មិន​មាន​​ដំណោះ​ស្រាយ​ងាយ​ស្រួល​ទេ​។ ទីបំផុត​ វា​ជា​​​​បញ្ហា​សេដ្ឋកិច្ច ហើយ​មនុស្ស​ធ្វើ​ដូច្នេះ​​​ដើម្បី​ចិញ្ចឹម​គ្រួសារ​របស់​ខ្លួន​”៕ សារុន (រាយការណ៍​បន្ថែម​ដោយ Anthony Jensen)​​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស