34 C
Phnom Penh

ក្រសួង​ព័ត៌មាន​ហាម​​​​មិន​​​ឲ្យ​​​ចាក់​​​កម្ម​​​វិធី​​ភាព​យន្ត​បរទេស​​អំឡុង​ពេល​មាន​អ្នក​ទស្សនា​ច្រើន​

ដោយ ឌឹ ខេមបូឌា ដេលី

បទវិភាគ

ក្នុង​ការ​ប្រឹង​ប្រែង​ចុង​ក្រោយ​របស់​ខ្លួន​​ដើម្បី​លើក​ស្ទួយ​​ឧស្សាហកម្ម​​កម្សាន្ត​ក្នុង​ស្រុក ​ក្រសួងព័ត៌មាន​​​កាលពី​ថ្ងៃ​សុក្រ​​បាន​បញ្ជា​ឲ្យ​ស្ថានីយ​ទូរទស្សន៍​ចាក់​ផ្សាយ​តែ​​រឿង​​ផលិត​ដោយ​​ផលិត​ករ​ខ្មែរ​​​អំឡុង​ពេល​មាន​អ្នក​ទស្សនា​ច្រើន​នេះ ដោយ​ទុក​ពេល​ឲ្យ​ក្រុមហ៊ុន​​រហូត​ដល់​ថ្ងៃ​ទី១ ខែ​វិច្ឆិកា ដើម្បី​អនុវត្ត​។

នៅ​ក្នុង​​សន្និសីទ​កាសែត​មួយ​​នៅ​ក្រសួង​នេះ ​​លោក ខៀវ កាញ៉ារិទ្ធ រដ្ឋមន្ត្រី​ក្រសួង​​ព័ត៌មាន​​ បាន​មាន​ប្រសាសន៍​ថា ​​ស្ថានីយ​ទូរទស្សន៍​ក្នុង​ស្រុក​​ទាំង​១៧​របស់​​ប្រទេស​​បាន​ចាក់​ផ្សាយ​ខ្សែភាពយន្ត​បរទេស​យ៉ាង​ច្រើន​លើស​លុប​​​នៅ​តាម​កញ្ចក់​ទូរទស្សន៍ ហើយ​ថា “​ពេល​វេលា​ដ៏​មាន​តម្លៃ​” នេះ​​ពី​ម៉ោង​៧ ដល់​ម៉ោង​៩​យប់​ ជា​ពេល​ដែល​ប្រជាជន​កម្ពុជា​​ច្រើន​​បំផុត​​បើក​ទូរទស្សន៍​របស់​ខ្លួន​នោះ គួរ​តែ​ទុក​សម្រាប់​កម្មវិធី​កម្សាន្ត​ផលិត​ក្នុង​ស្រុក​។

លោក​បាន​មាន​ប្រសាសន៍​ថា ” យើង​ស្នើ​ឲ្យ​ស្ថានីយ​ទូរទស្សន៍​​ទាំង​អស់​ ពីម៉ោង​៧​ដល់​ម៉ោង​៩យប់​ ត្រូវ​បញ្ចាំង​តែ​ខ្សែ​​​ភាព​យន្ត​ និង​ផលិត​កម្ម​​​ក្នុង​ស្រុក​ប៉ុណ្ណោះ​ ដើម្បី​លើក​ស្ទួយ​វប្បធម៌ និង​អត្តសញ្ញាណ​ជាតិ​ខ្មែរ​របស់​យើង​សម្រាប់​មោទនភាព​ជាតិ​យើង​”។ លោក​បាន​ពន្យល់​ថា បម្រាម​នេះ​នឹង​បម្រើ​ដល់​ស្នាដៃ​នៃ​ផលិតករ​ខ្មែរ​ និង​ធ្វើ​ឲ្យ​ឧស្សាហកម្ម​ក្នុង​ស្រុក​រីក​ចម្រើន​។

សេចក្ដី​បង្គាប់​ដែល​ចេញ​កាលពី​ថ្ងៃ​សុក្រ​និយាយ​ថា ម្ចាស់​ស្ថានីយ​ទូរទស្សន៍​មាន​ពេល​រហូត​ដល់​ថ្ងៃ​ទី១ ខែ​វិច្ឆិកា ដើម្បី​អនុវត្ត​តាម​បទបញ្ជា​នេះ​ និង​ព្រមាន​ថា ក្រុម​ហ៊ុន​ណា​ដែល​មិន​អនុវត្ត​តាម​ នឹង​ត្រូវ​ដក​ហូត​អាជ្ញាប័ណ្ណ​។

លោក កាញា៉រិទ្ធ បាន​មាន​ប្រសាសន៍​ថា “​ប្រសិន​បើ​គេ​មិន​បញ្ចាំង​ខ្សែភាព​យន្ត​ខ្មែរ គេ​អាច​បញ្ចាំង​កម្មវិធី​កីឡា​ [កម្ពុជា​] ឬ​ប្រដាល់​ខ្មែរ​ ឬ​ការ​សម្ដែង​នានា​ដោយ​សិល្បករ​សិល្បការិនី​របស់​យើង​”។

លោក​បាន​បន្ថែម​ថា នៅ​ពេល​លោក​បាន​ធ្វើ​ជា​​រដ្ឋមន្ត្រី​ក្រសួង​ព័ត៌មាន​ដំបូង​​នៅ​ឆ្នាំ​១៩៩៣ លោក​បាន​ព្យាយាម​កម្រិត​ការ​ផ្សាយ​កម្មវិធី​បរទេស​មក​នៅ​ត្រឹម​៤០​ភាគរយ​នៃ​មាតិកា​​​ព័ត៌មាន​ទូរទស្សន៍ទាំង​អស់​ ប៉ុន្តែ​ថា ឧស្សាហកម្ម​កម្សាន្ត​ក្នុង​ស្រុក​មាន​តិ​ចពេក​នៅ​ពេល​នោះ​មិន​អាច​ឲ្យ​ការ​ផ្ដើម​គំនិត​នេះ​ធ្វើ​ទៅ​បាន​ទេ។

លោក​ សោម ឆាយ៉ា នាយករង​ស្ថានីយ​ទូរទស្សន៍​ PNN​ ជា​ស្ថានីយ​ទូរទស្សន៍​មួយ​ដែល​បើក​ដោយ​លោក លី យ៉ុងផាត់ សមាជិក​ព្រឹទ្ធសភា​គណបក្ស​កាន់​អំណាច​​កាលពី​ខែ​កក្កដា បាន​និយាយ​ថា ការ​​ប៉ុនប៉ង​ថ្មី​នេះ​របស់​ក្រសួង​ដើម្បី​លើក​ស្ទួយ​ផលិត​កម្ម​ក្នុង​ស្រុក​ នឹង​បង្ហាញ​ថា​មិន​អាច​ចាក់​​​ផ្សាយ​​​​ស្មើ​គ្នា​ យ៉ាង​ហោច​ណាស់​ចំពោះ​ស្ថានីយ​របស់​លោក​ដែរ​។

លោក​បាន​សួរ​បែប​វោហារសាស្ត្រ​ថា “​ តើ​អ្វី​ជា​គុណភាព​នៃ​​ផលិត​កម្ម​ខ្មែរ​? ហើយ​ប្រទេស​កម្ពុជា​អាច​ផលិត​បាន​គ្រប់គ្រាន់​ដើម្បី​បញ្ចាំង​រយៈ​ពេល​២​ម៉ោង​​នៅ​តាម​គ្រប់​ស្ថានីយ​ទូរទស្សន៍​​ឬទេ​?”។

លោក ឆាយ៉ា បាន​និយាយ​ថា ទូរទស្សន៍ PNN ​បាន​ជាប់​កិច្ច​សន្យា​រយៈ​ពេល​១​ឆ្នាំ​ជាមួយ​ស្ថានីយ​ទូរទស្សន៍​ថៃ​មួយ​​ដើម្បី​ផ្សាយ​ភាព​យន្ត​ថៃ​​​អំឡុង​ពេល​មាន​មនុស្ស​មើល​ច្រើន​នេះ​។

លោក​បាន​និយាយ​ថា “​យើង​​នឹង​ស្នើ​ឲ្យ​ក្រសួង​ព័ត៌មាន​អនុញ្ញាត​ឲ្យ​យើង​ផ្សាយ​ខ្សែភាព​យន្ត​ខ្មែរ​ពី​ម៉ោង​​៧​យប់​ដល់​ម៉ោង​​៨យប់​ ហើយ​ផ្សាយ​​ខ្សែភាព​យន្ត​បរទេស​ពី​ម៉ោង​៨​យប់​ដល់​ម៉ោង​៩​យប់​”៕ និត​​​​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស