26 C
Phnom Penh

ស្ត្រី​ម្នាក់​ក្នុង​ជំនួញ​ដី​ត្រូវ​ចាប់​ខ្លួន​ព្រោះ​មូលប្បទាន​ប័ត្រ​ក្លែងក្លាយ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​ថា ស្ត្រី​ជំនួញ​ម្នាក់​និង​ជា​ភរិយា​របស់​ឧត្តមសេនីយ៍​យោធា ដែល​ត្រូវ​បាន​ចាប់​ខ្លួន នៅ​ពេល​ស្ត្រី​រូប​នេះ​ចូល​ហាង​លក់​ផ្លែ​ឈើ​មួយ​កន្លែង​ក្នុង​ក្រុង​ភ្នំពេញ​កាលពី​ថ្ងៃ​សៅរ៍ ទទួល​បាន​ការ​ដោះលែង​ឲ្យ​នៅ​ក្រៅ​ឃុំ​ក្នុង​ខេត្ត​កំពង់ធំ​កាលពី​ថ្ងៃ​អាទិត្យ បន្ទាប់ពី​បាន​បង់​ប្រាក់​ធានា​៥០.០០០​ដុល្លារ។

យោង​តាម​លោក ជា ពឿន នាយ​ការិយាល័យ​នគរបាល​ព្រហ្មទណ្ឌ​កម្រិត​ធ្ងន់​ខេត្ត​បាន​និយាយ​ថា អ្នក​ស្រី ម៉ែន សោភ័ណ អាយុ​៣៥​ឆ្នាំ រង​ការ​ប្តឹង​ផ្តល់​ពី​សំណាក់​ប្រជាជន​រាប់​រយ​គ្រួសារ​ក្នុង​ស្រុក​បារាយ ខេត្ត​កំពង់​ធំ ដែល​អះអាង​ថា អ្នក​ស្រី​មិន​បាន​បង់​ប្រាក់​ឲ្យ​ពួកគាត់​សម្រាប់​ថ្លៃ​ដី​ប្រហែល​២០០​ហិកតា ដែល​អ្នក​ស្រី​បាន​ព្រមព្រៀង​ទិញ​ក្នុង​ឆ្នាំ​២០១៤។

លោក​បាន​និយាយ​ថា ការ​ចាប់​ខ្លួន​កាលពី​ថ្ងៃ​សៅរ៍​គឺ​ផ្អែក​លើ​បណ្តឹង​មួយ​របស់​តំណាង​គ្រួសារ​ជាច្រើន​ទាក់ទិន​នឹង​សែក​ក្លែងក្លាយ​៥០.០០០​ដុល្លារ ដែល​ចេញ​ដោយ​អ្នក​ស្រី សោភ័ណ ដែល​បាន​បង់​ប្រហែល​១០​ភាគរយ​នៃ​ប្រាក់​សន្យា​បង់​ប្រហែល​៣០០.០០០​ដុល្លារ​សម្រាប់​ថ្លៃ​ដី មុន​ពេល​បញ្ឈប់​កិច្ចសន្យា។

លោក​បាន​និយាយ​ថា “យើង​បាន​ឃើញ​ស្ត្រី​រូប​នេះ​ដើរ​ចូល​ហាង​លក់​ផ្លែ​ឈើ​នៅ​ម៉ោង​ប្រហែល​៤​និង​៣០​នាទី​ល្ងាច ហើយ​យើង​បាន​អាន​ដីកា​តុលាការ​ឲ្យ​ស្ត្រី​នេះ​ស្តាប់។ បន្ទាប់មក​យើង​បាន​នាំ​គាត់​មក​ខេត្ត​កំពង់ធំ​នា​ថ្ងៃ​ដដែល​នោះ”។

លោក​បាន​ឲ្យ​ដឹង​ទៀត​ថា “យើង​បាន​ចាប់​ខ្លួន​ស្ត្រី​រូប​នេះ ពីព្រោះ​គាត់​បាន​ចេញ​សែក​ក្លែងក្លាយ​ឲ្យ​អ្នក​ប្តឹង​ពីរ​នាក់”។ លោក​បាន​បន្ថែម​ថា អ្នក​ស្រី សោភ័ណ ជា​ភរិយា​របស់​លោក សៅ វ៉ាន្នី ឧត្តមសេនីយ៍​ត្រី ក្នុង​កងពល​តូច​៧០​របស់​កង​យោធពល​ខេមរភូមិន្ទ។

លោក ពឿន បាន​ប្រាប់​ឈ្មោះ​អ្នក​ប្តឹង គឺ អ៊ុក វ៉ន និង ទូច ផានិត ជា​តំណាង​នៃ​គ្រួសារ​រងគ្រោះ។

លោក​បាន​និយាយ​ថា “ស្ត្រី​រូប​នេះ​បាន​ទិញ​ដី​ពី​អ្នក​ភូមិ ហើយ​គាត់​បាន​ចេញ​សែក​ដែល​មាន​តម្លៃ​៥០.០០០​ដុល្លារ​ទៅ​ឲ្យ​ដើម​បណ្តឹង​ទាំង​ពីរ​នាក់ ប៉ុន្តែ នៅ​ពេល​ពួកគេ​យក​សែក​នោះ​ទៅ​បើក​ប្រាក់​ពី​ធនាគារ ធនាគារ​ប្រាប់​ពួកគាត់​ថា សែក​ហ្នឹង​អត់​មាន​ប្រាក់​ទេ”។

លោក វ៉ន និង លោក ផានិត​ មិន​អាច​ទាក់ទង​បាន​ទេ។

ក៏ប៉ុន្តែ លោក ភូ សេង មេឃុំ​បារ៉ាយ​ បាន​និយាយ​ថា អ្នក​ទាំង​ពីរ​តំណាង​ឲ្យ​ទាំង​គ្រួសារ​ទាំងអស់​នោះ ទាំង​ក្រុមហ៊ុន អុឹម ប៊ុនថន ដែល​ឥឡូវ​នេះ​គ្រប់​គ្រង​ដី​នោះ​ចាប់​តាំង​ពី​មាន​កិច្ច​ព្រមព្រៀង​ដែល​អ្នកស្រី សោភ័ណ បាន​ព្យាយាម​សម្រប​សម្រួល​ បាន​បរាជ័យ​ទៅ​ហើយ​នោះ។

លោក​ សេង បាន​និយាយ​ថា “ក្រុមហ៊ុន​ឥឡូវ​កំពុង​កាន់កាប់​ដី​ទាំង​អស់ ពីព្រោះ​ ម៉ែន សោភ័ណ មិន​ទាន់​បាន​បង់​ប្រាក់​ឲ្យ​ក្រុមហ៊ុន​នេះ​វិញ”។ លោក​បាន​បន្ថែម​ថា ពីមុន ក្រុមហ៊ុន​បាន​ប្រគល់​ប្រាក់​កក់​ថ្លៃដី​នោះ។

លោក​បាន​និយាយ​ទៀត​ថា “ប្រសិន​បើ​អ្នកភូមិ​ចង់បាន​ដី​នោះ​វិញ ពួកគេ​ត្រូវ​ប្រគល់​ប្រាក់កក់​ឲ្យ​ក្រុមហ៊ុន អឹុម ប៊ុនថន វិញ”។

លោក ហេង ចាន់បូរិន ចៅក្រម​ស៊ើប​អង្កេត​នៅ​តុលាការ​ខេត្ត បាន​និយាយ​ថា អ្នកស្រី សោភ័យ ត្រូវ​បាន​ដោះលែង​កាលពី​ថ្ងៃអាទិត្យ រង់ចាំ​ការ​ជំនុំ​ជម្រះ ហើយ​ហាម​ប្រាម​ជា​បណ្តោះ​អាសន្ន​មិន​ឲ្យ​ធ្វើ​ដំណើរ​ចេញពី​ប្រទេស​ទេ។

លោក​ចៅក្រម​បាន​និយាយ​ថា “ខ្ញុំ​បាន​ដោះលែង​ស្ត្រី​រូប​នេះ​ឲ្យ​នៅ​ក្រៅ​ឃុំ​នា​រសៀល​នេះ ប៉ុន្តែ យើង​បាន​តម្រូវ​ឲ្យ​គាត់​កក់​ប្រាក់​សុំ​នៅ​ក្រៅ​ឃុំ​ចំនួន​៥០.០០០​ដុល្លារ”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស