31 C
Phnom Penh

គណៈមេធាវី​កម្ពុជា​បដិសេធ​ការ​អះ​អាង​​ពី​ឥទ្ធិពល​នយោបាយ​

ដោយ ឌឹ ខេមបូឌា ដេលី

បទវិភាគ

​គណៈមេធាវី​កម្ពុជា​​បាន​ច្រាន​ចោល​​ការ​រិះគន់​យ៉ាង​​ខ្លាំង​​អំពី​ឯករាជភាព និង​ក្រម​សីល​​​ធម៌​របស់​ខ្លួន​ពី​សំណាក់​គណៈមេធាវី​អន្តរ​​​ជាតិ​​​​(IBA)ដែល​បាន​សួរ​អំពី​​​​សមាជិក​ភាព​​​របស់​កម្ពុជា​​​នៅ​ក្នុង​​ក្រុម​ពិភពលោក​នេះ​ដោយ​​​ហៅ​ការ​វាយ​តម្លៃនេះ​ថា ជា “ការ​ប្រមាថ” ​គ្មាន​មូលដ្ឋាន​ត្រឹម​ត្រូវ​។

បន្ទាប់ពី​​​់​​អ្នក​ជំនាញ​ផ្នែក​ច្បាប់​មួយ​ក្រុម ​បាន​​​មក​ធ្វើ​ទស្សនកិច្ច​នៅ​​ប្រទេស​កម្ពុជា​​​​ វិទ្យា​​​ស្ថាន​សិទ្ធិ​មនុស្ស​​របស់​ IBA នេះ​ កាលពី​សប្ដាហ៍​មុន បាន​ចេញ​សេចក្ដី​ ថ្លែង​ការណ៍​មួយ​ស្ដី​អំពី​ប្រព័ន្ធ​​យុត្តិធម៌​​ក្នុង​ប្រទេស​កម្ពុជា ដោយ​ចោទ​ប្រកាន់​គណៈ​​​មេធាវី​នេះ​ថា​បាន​គំាទ្រ​បេក្ខជន​​គ្មាន​​​លក្ខណៈ​​​សម្បត្តិ​​​គ្រប់​​​គ្រាន់​​​ដែល​មាន​ទំនាក់​ទំនង​​ជាមួយ​គណបក្ស​ប្រជា​​​ជន​កម្ពុជា សម្រាប់​​​ធ្វើ​ជា​​សមាជិកភាព​ ដោយ​​ធ្វើ​ឲ្យ​គណបក្ស​ប្រជា​​​ជន​កម្ពុជាមាន​ឥទ្ធិពល​​​លើ​​​ការ​បោះ​ឆ្នោត​​ជ្រើស​រើសថ្នាក់​ដឹកនាំ និង​​​ទទួល​សំណូក​ជា​ថ្នូរ​នឹងកន្លែង​ផ្សេង​ៗ​នៅ​ក្នុង​​​កម្មវិធី​​បណ្ដុះ​បណ្ដាល​នានា។ ក្នុង​ចំណោម​​​​អនុសាសន៍​របស់​របាយការណ៍​នេះ​​ គឺ​​​ពិនិត្យ​មើល​សមា​​​ជិក​ភាព​គណៈមេធាវី​នៃ​ព្រះរាជា​​​ណា​​​ចក្រ​កម្ពុជាក្នុង​IBA​​។

កាលពី​សប្ដាហ៍​មុន លោក ប៊ុន ហុន ប្រធាន​​​​​​​គណៈមេធាវី​កម្ពុជា​បាន​បដិសេធ​មិន​ធ្វើ​អត្ថាធិប្បាយអំពីរបាយការណ៍​នេះ​ ពីព្រោះ​ លោក​មិន​ទាន់​បាន​អាន​របាយការណ៍​នេះ​​​នៅ​ឡើយ​។ ទោះ​ជា​យ៉ាង​ណា កាលពី​ថ្ងៃ​​​សុក្រ ​​​គណៈមេធាវី​កម្ពុជា​បាន​វាយ​បក​វិញ​​​​នៅ​ក្នុង​សេចក្ដី​ថ្លែង​ការណ៍​មួយ​ដែល​បាន​ចុះ​ផ្សាយ​​​ក្នុង​គេហទំព័រ​របស់​ខ្លួន ដោយ​ច្រាន​ចោល​របាយការណ៍​នេះ​ថា ជា​​ការ​ងារ​របស់ “​ភ្ញៀវ​ទេសចរ” ​ដែល​​ទទួល​​បាន​ព័ត៌មាន​​មិន​គ្រប់​ជ្រុង​ជ្រោយ។

សេចក្ដី​ថ្លែង​ការណ៍​ដដែល​នេះ​លើក​ឡើង​ថា ​”​ក្រុម​ការ​ងារ​របស់​​វិទ្យាស្ថាន​នេះ​មិន​បាន​ប្រមូល​ព័ត៌មាន​​​ដើម្បី​ធ្វើ​សេចក្ដី​រាយ​​​ការណ៍ឲ្យ​​ស្រប​តាម​ស្ថាន​ភាព​ជាក់​ស្ដែង​ឡើយ ​​​ប៉ុន្តែ​គ្រាន់​តែ​បាន​មក​​​ធ្វើ​ទស្សនកិច្ច​ និង​ថត​ចម្លង​ព័ត៌មាន​ពី​ប្រព័ន្ធ​ផ្សព្វ​ផ្សាយ និង​របាយ​​​ការណ៍​ចាស់ៗ​តែ​ប៉ុណ្ណោះ។របាយការណ៍​នេះ​ធ្វើ​ឡើង​​ដោយ​មាន​ការ​សន្និដ្ឋាន​ទុក​ជាមុន​ដែល​វា​មិន​ត្រឹម​ត្រូវ និង​លម្អៀងយ៉ាង​ខ្លាំង​​ ហើយ​មាន​បំណង​​បំផ្លាញ​អ្នកមាន​វិជ្ជា​​​ជីវៈ​ផ្នែក​ច្បាប់ និង​បំពុល​បរិយាកាស​សង្គម​​​នៅ​​​​​ក្នុង​ប្រទេស​កម្ពុជា​”។

យោង​តាម​របាយ​ការណ៍​របស់​ IBA បាន​ឲ្យ​ដឹង​ថា ក្រុម​នេះ​​​បាន​ប្រមូល​ព័ត៌មាន​របស់​ខ្លួន​ពី​របាយកាណ៍​មុនៗ និង​ប្រព័ន្ធ​​ផ្សព្វ​ផ្សាយ​ក្នុង​ស្រុក ព្រមទាំង​បទ​សម្ភាសន៍​ផ្ទាល់​ជាមួយ​​មនុស្ស​​ជាង​៤០​នាក់​ រួមមាន​ ចៅក្រម មេធាវី និង​មន្ត្រី​នៅ​ក្រសួង​យុត្តិធម៌​ជាដើម​​។

សេចក្ដី​ថ្លែងការណ៍​របស់​គណៈមេធាវី​កម្ពុជា​មិន​បាន​លើក​ឡើង​ពី​ការ​ចោទ​ប្រកាន់​ពាក់​ព័ន្ធ​ការ​​សូក​បា៉ន់​​ទេ ប៉ុន្តែ​បដិសេធ​ការ​អះអាង​ដែល​ថា គណបក្ស​ប្រជាជន​កម្ពុជា​​​​ដែល​​​កំពុង​​​កាន់​​​អំណាច​​​មាន​​​ឥទ្ធិពល​​​លើ​​​​ការ​​បោះ​ឆ្នោត​​ជ្រើស​រើស​ថ្នាក់​ដឹកនាំ​នៅ​ក្នុង​គណៈមេធាវី​តាម​រយៈ​​​ការ​ហៅ​ទូរស័ព្ទ​លួច​លាក់ ហើយ​ចាត់​ទុក​​ការ​អះអាង​នេះ​ថា ជា​ “ការ​ប្រមាថ​ធ្ងន់​ធ្ងរ​​”។

សេចក្ដី​ថ្លែងការណ៍​​ដដែល​នេះ​បន្ត​ថា     “​គណៈមេធាវី​មាន​​ស្វយ័ត​ផ្នែក​រដ្ឋបាល និង​ហិរញ្ញវត្ថុ ដែល​ធ្វើ​ឲ្យ​ស្ថាប័ន​នេះ​ឯករាជ្យ​​​ដោយ​​​​​មាន​សិទ្ធិ​ពេញ​លេញ​ក្នុង​ការ​គ្រប់គ្រង​វិជ្ជាជីវៈ​នេះ​។ មេធាវី​គ្រប់​រូប​អាច​ឈរ​ឈ្មោះ​ជា​បេក្ខជន​​សម្រាប់​តួនាទី​ប្រធាន និង​សមាជិក​ក្រុម​ប្រឹក្សា​​​បាន​​​ដោយ​មិន​គិត​ដល់​​ជាតិ​សាសន៍ ឬ​និន្នាការ​នយោបាយ​ឡើយ​។ ការ​បោះ​ឆ្នោត​ជ្រើស​រើសប្រធាន និង​សមា​​​ជិក​ក្រុម​ប្រឹក្សា​​គណៈមេធាវី​គឺ​ធ្វើ​ឡើង​​​តាម​​​លក្ខណៈ​ប្រជាធិបតេយ្យ និង​តម្លាភាព​”។

ទោះ​ជា​យ៉ាង​ណា គណៈមេធាវី​កម្ពុជា​ទទួល​ស្គាល់​ថា មាន​កង្វះ​មូលនិធិ​សម្រាប់​ក្រុម​​​​អ្នក​ច្បាប់​​​សាធារណៈ​បង្ខំឲ្យ​ខ្លួន​រឹត​បន្តឹង​សេវាកម្ម​របស់​ខ្លួនដោយ​​​​ផ្តោតទៅ​​​​លើ​តែ​​​ករណី​ព្រហ្មទណ្ឌ​ប៉ុណ្ណោះ។

គណៈមេធាវី​​បញ្ចប់​សេចក្ដី​ថ្លែងការណ៍​របស់​ខ្លួន​ ដោយ​លើក​ឡើង​ថាខ្លួន​ “សោក​ស្ដាយ”​ចំពោះ​អនុសាសន៍​របស់​របាយការណ៍​នេះ​ដែល​ថា សមាជិក​​ភាព​របស់​ប្រទេស​កម្ពុជា​នៅក្នុង IBA គួរ​ត្រូវ​ពិនិត្យ​មើល ដែល​អាច​បណ្ដាល​ឲ្យ​មាន​ការ​ច្រាន​ចោល​។ IBA មិន​បាន​លើក​ឡើង​ថា តើ​​ខ្លួន​នឹង​អនុវត្ត​តាម​អនុសាសន៍​នេះ​ឬ​យ៉ាង​ណា​នោះ​ ហើយ​មិន​បាន​ឆ្លើយ​តប​ភ្លាមៗ​ចំពោះ​សំណើ​សុំ​​អត្ថាធិ​​​ប្បាយ​ឡើយ៕ សារុន​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស