ប្រធាន​​​អង្គភាព​​​ ACU បដិសេធ​​​ថា​​​មិន​​​បាន​​​ជ្រៀត​​​ជ្រែក​​​​​​ការ​​​សើុប​​​អង្កេត​​ករណី​​​ធ្វើ​​​ឃាត​​​​

កាល​ពីម្សិល មិញ លោក ឱម យិុនទៀង ប្រធាន​​​អង្គភាព​​​ប្រឆាំង​​​អំពើ​​​ពុក​​​រលួយ (ACU) ​​​បាន​​​បដិសេធ​​​ការ​​​អះ​​​អាង​​​នៅ​​​ក្នុង​​​តុលាការ​​​កាល​​​ពីសប្តាហ៍​​​មុនដែល​​​​​​ថា លោក​​​ធ្វើ​​​ហួស​​​ពី​​​សមត្ថ​​​កិច្ច​​​​របស់​​​ខ្លួន​ ​​​ដោយ​​​បញ្ជា​​​ឲ្យ​​​អង្គរក្ស​​​របស់​​​លោក​​​​​​អាំង មាលតី ប្រធាន​​​​​​សាលា​​​ដំបូង​​​​​​​​​រាជ​​​ធានី​​​​​​ភ្នំពេញ​​​ដែល​​​​​​ត្រូវ​​​បានដកចេញ​​​​ពី​​​តំណែង​​​​​​​​​ ចុះ​​​ទៅ​​​ឆែក​​​ឆេរ​ផ្ទះ​​​របស់​​​ឪពុក​​​ម្តាយ​​​ជន​​​ជាប់​សង្ស័យ​​​ពី​​​បទ​​​មនុស្ស​​​ឃាត​​​ម្នាក់​​​។

លោក ពេជ្រ ព្រហ្មមុនី អតីត​​​អង្គរក្ស​​​របស់​​​ លោក អាំង​​​ មាលតី ធ្វើ​​​ការ​​​អះ​​​អាង​​​ដូច្នេះ​​​អំឡុង​​​ការ​​​បើក​​​សវនាការ​​​ជំនុំ​​​ជម្រះ​​​​​​​ក្តី​​​របស់​​​លោក​​​​​​ពីបទ​​​ជ្រៀត​​​ជ្រែក​​​ដោយ​​​ខុស​​​ច្បាប់​​​ក្នុង​​​ការ​​​បំពេញ​​​មុខ​​​ងារ​​​សាធារណៈ​​​​​​នៅ​​​សាលា​​​ដំបូង​​​រាជ​​​ធានី​​​កាល​​​ពី​​​ថ្ងៃ​​​សុក្រ​​​។ លោក​​​ត្រូវ បាន​​​ចាប់​​​​​​ខ្លួន​​​កាល​​​ពី​​​ខែ​​​កុម្ភៈ​​​ មិនយូរ​​​ប៉ុន្មាន​​​បន្ទាប់ពី​​​លោក អាំង​​​ មាលតី ត្រូវ​​​បាន​​​ដក​​​ចេញ​​​ ពី​​​តំណែង​​​ចំពេល​​​មាន​​​ការ​​​ចោទ​​​ប្រកាន់​​​ថា មន្ត្រី​​​តុលាការ​​​បាន​​​ទទួល​​​សំណូក​​​រាប់​​​លាន​​​ដុល្លារ​​​ដើម្បី​​​ដោះ​​​លែង​​​ឪពុក​​​ម្តាយ​​​លោក  ថោង សារ៉ាត់​​​ អតីត​​​មន្ត្រី​​​នៅ​​​ក្រសួង​​​ការពារ​​​ជាតិ​​​ដែល​​​ត្រូវ​​​បាន​​​ចោទ​​​ប្រកាន់​​​ពីបទ​​​ធ្វើ​​​ឃាត​​​លោកឧកញ៉ា អឹុង ម៉េងជឺ ។

កាល​​​ពី​​​ថ្ងៃ​​​សុក្រ​​​ ឧត្តម​​​សេនីយ៍ត្រី ពេជ្រ ព្រហ្ម​​មុនី បាន​​​លើក​​​ឡើង​​​នៅ​​​ក្នុង​​​តុលាការ​​​ថា ទាំង​​​លោក អាំង​​​ មាលតី និង​​​លោក​​​ ឱម យិុន ទៀង សុទ្ធ​​​តែ​​​បាន​​​ណែនាំ​​​ឲ្យ​លោក​​​​ទៅ​​​ចូល​​​រួម​​​នៅ​​​ក្នុង​​​ការ​​​ឆែក​​​ឆេ​​​វីឡា​​​របស់​​​ឪពុក​​​ម្តាយ​​​លោក​​​ ថោង សារ៉ាត់ ក្នុង​​​រាជធានីភ្នំពេញ​​​​​​កាល ​​​ពីខែ​​​ធ្នូ​​​ដោយ​​​សង្ឃឹម​​​ថា នឹង​​​អាច​​​រក​​​បាន​​​តម្រុយ​​​ ខ្លះ​​​ៗ​​​ពាក់​​​ព័ន្ធ​​​នឹង​​​ជនជាប់​​​​សង្ស័យ​​​ពី​​​បទមនុស្ស​​​ឃាត​​​ដែលពេលនោះ​​​កំពុង​​​រត់​​​គេច​​​ខ្លួន​​​។

ឧត្តម​​​សេនីយ៍​​​ត្រី​រូបនេះ​ មានប្រសាសន៍​​​ ថា “នៅពេល​​​នោះ​​​ ខ្ញុំ​​​បាន​​​សួរ​​​លោក​​​ទេស​​​រដ្ឋ​​​មន្ត្រី​​​ ឱម យិុន​​​ទៀង ថា​​​តើ​​​ខ្ញុំ​​​គួរ​​​តែ​​​ទៅ​​​ចូល​​​រួម​​​ក្នុង​​​ការ​​​ឆែក​​​ឆេរ​​​ដែរ​​​ ឬ​​​អត់​​​។ គាត់​​​បាន​​​បញ្ជា​​​ខ្ញុំ​​​ឲ្យ​​​ទៅ​​​ឆែក​​​ឆេរ​​​”។

នៅ​​​ពេល​​​ទាក់​​​ទង​​​កាល​​​ពីម្សិលមិញ  ប្រធាន​​​អង្គភាព​​​ប្រឆាំង​​​អំពើ​​​ពុក​​​រលួយ​​​រូប​​​នេះ​​​បាន​​​បដិសេធ​​​ថា លោក​​​មិន​​​បាន​​​ចេញ​​​បទបញ្ជា​​​​បែប​​​នេះ​​​ទេ។

លោកបាន​​​មាន​​​ប្រសាសន៍​​​ថា ”គាត់​​​ចេះ​​​តែ​​​និយាយ​​​​​​ តើ​​​អ្នក​​​ឯង​​​ជឿ​​​គាត់​​​ដែរ​​​?”។

ប្រធាន​​​អង្គភាព​​​ប្រឆាំង​​​អំពើ​​​ពុក​​​រលួយ​​​រូប​​​េនះ​​​ក៏​​​បាន​​​ច្រាន​​​ចោល​​​ការ​​​ដែល​​​ថា ឧត្តម​​​សេនីយ៍ត្រី ពេជ្រ​​​ ព្រហ្ម​មុនី បាន​​​ធ្វើ​​​ការ​​​ចោទ​​​​​​ ប្រកាន់​​​លើ​​​រូបលោក​​​ក្នុង​​​តុលាការ​​​ផង​​​ដែរ​​​។

លោក​​​បាន​​​ប្រាប់​​​អ្នក​​​ព័ត៌មាន​​​ថា “ខ្ញុំ​​​មិន​​​ជឿ​​​អ្នក​​​ឯង​​​ថា គាត់​​​និយាយ​​​ដូច​​​ហ្នឹង​​​ទេ​​​។ អ្នក​​​បាន​ចូល​​​ស្តាប់​​​សវនាការ​​​ តែ​អ្នក​​​មិ​​​ន​​​មាន​​​សិទ្ធិ​​​យក​​​អ្វី​​​ក្នុង​​​សវនាការ​​​មក​​​និយាយ​​​ទេ​​​”។

អំឡុង​​​​ពេល​បើក​​​សវនាការ​​​ជំនុំ​​​ជម្រះ​​​ ឧត្តម​​​សេនីយ៍​​​ត្រី ពេជ្រ ព្រហ្ម​មុនី បាន​​​លើក​​​ឡើង​​​ថា លោក អាំង​​​ មាលតី​​​ បាន​​​ណែនាំ​​​​​​លោក​​​​​​ ឲ្យទៅ​​​ឆែក​​​ឆេ​​​ផ្ទះនោះ ហើយ​​​​​​ឲ្យ​​​ធ្វើជា​​​ស្និទ្ធ​​​ស្នាល​នឹង​​​​ប្រពន្ធ​​​​របស់​លោក ថោង​​​ សារ៉ាត់ ​​​ក្នុង​​​គោល​​​បំណង​​​ទទួល​​​បាន​​​ព័ត៌​​​មាន​​​ដែល​​​​​​អាច​​​ឈាន​​​ទៅរក​​​ការ​​​ចាប់​​​ខ្លួន​​​ជន​​​សង្ស័យ​​​។

លោក អាំង​​​ មាលតី ត្រូវ​​​បាន​​​ចាប់​​​ខ្លួន​​​​​​កាល​​​ពី​​​ខែ​​​មុន ហើយ​​​ត្រូវ​​​បាន​​​ចោទ​​​ប្រកាន់​​​ពីបទ​​​​​​​​​កិ​​​ប​​​កេង​​​ពាក់ព័ន្ធ​នឹងការ​រឹ​​​បអូស​​​យក​​​រថយន្ត​​​ស៊េរីទំនើប​​​មួយ​​​​​​គ្រឿង​​​ពី​​​អ្នក​​​ចែក​​​ចាយ​​​​​​គ្រឿង​ញឿន​ម្នាក់​​​ទៅ​​​ឲ្យ​​​កូន​​​ប្រុស​​​របស់​​​ខ្លួន​​​។ កាល​​​ពី​​​ម្សិលមិញ មេធាវី​​​របស់​​​លោក​​​បាន​​​បដិសេធ​​​មិន​​​ធ្វើ​​​អត្ថាធិប្បាយ​​​លើ​​​សក្ខីកម្ម​​​របស់​​​​​​ឧត្តម​​​សេនីយ៍ត្រី ពេជ្រ ព្រហ្ម​មុនី ឡើយ​​​​ដោយ​​​គ្មាន​​​ការ​​​អនុញ្ញាត​​​ពី​​​កូន​​​ក្តី​​​របស់​​​លោក​​​៕​​​ ស៊ុយឈាង​​​