នគរបាលនិយាយថា សពបុរសអឺរ៉ុបម្នាក់ដែលមានស្លាកស្នាមវាយដំ ត្រូវបានប្រទះឃើញក្នុងវ៉ាលិសមានកង់រុញអណ្ដែតទឹកព្រែកក្បែរព្រំដែនវៀតណាម ក្នុងខេត្តកែបកាលពីម្សិលមិញ ប៉ុន្តែរកបានព័ត៌មានលម្អិតតិចតួចប៉ុណ្ណោះពាក់ព័ន្ធអត្តសញ្ញាណជនរងគ្រោះ។
យោងតាមលោក អុីង សំអុល ស្នងការខេត្តនេះបានឲ្យដឹងថា សាកសពបុរសវ័យកណ្ដាលដែលមានសភាពហើមស្អុយនេះ ត្រូវបានអ្នកនេសាទបង្គាប្រទះឃើញនៅក្នុងស្រុកដំណាក់ចង្អើរ ដែលដំបូងឡើយបានប្រទះឃើញវ៉ាលិសរុំស្កុតព័ទ្ធជុំវិញជាច្រើនជាន់ បន្ទាប់មកក៏ឃើញក្បាលមនុស្សលេចចេញមកក្រៅ។ ”បន្ទាប់ពីយើងពិនិត្យសាកសពរួច យើងសន្និដ្ឋានថា សពនេះជាជនជាតិអឺរ៉ុប”។ លោកបន្ថែមថា សាកសពនេះស្លៀកខោខ្លី និងពាក់អាវយឺតពណ៌ខៀវ។
លោកមានប្រសាសន៍បន្តថា អ្នកនេសាទបានប្តឹងទៅនគរបាលមូលដ្ឋាន ហើយនគរបាលមូលដ្ឋានក៏បានហៅនគរបាលខេត្តឲ្យមកពិនិត្យសាកសពបុរសរងគ្រោះដែលលោកបានប៉ាន់ស្មានថាមានអាយុប្រហែល៤៥ឆ្នាំ។
លោក ម៉ី លីន មេឃុំអង្កោល ដែលត្រូវប្រជាពលរដ្ឋទូរស័ព្ទហៅឲ្យចុះទៅកន្លែងកើតហេតុ មានប្រសាសន៍ថា អ្នកនេសាទបានឃើញវ៉ាលិសអណ្ដែតទឹកព្រែក ហើយពីរនាក់ក្នុងចំណោមពួកគេចង់ស្រង់វាឡើង។
លោកបានមានប្រសាសន៍ទៀតថា “មនុស្សពីរនាក់បានហែលទឹកដើម្បីទាញវ៉ាលិសនោះចូលខាង ដោយមិនដឹងថាមានអ្វីនៅខាងក្នុងទេ។ បន្ទាប់មក ពេលពួកគេក្រឡាប់វាឡើង ក៏ប្រទះឃើញក្បាលសាកសពលេចចេញមកក្រៅ។ បន្ទាប់មកទៀត ពួកគេក៏បានទាញវ៉ាលិសឡើងច្រាំង។ បុរសរងគ្រោះត្រូវគេវាយចំថ្គាម ថ្គាមបានបាក់ ហើយថ្ងាសរងរបួសធ្ងន់ធ្ងរ។ ខ្ញុំគិតថា បុរសរងគ្រោះត្រូវគេកាប់នឹងពូថៅ ឬវាយនឹងដែកជ្រុង។ ផ្នែកផ្សេងទៀតនៃរាងកាយសាកសពមិនអីទេ គឺរបួសតែក្បាលប៉ុណ្ណោះ”។
លោក ស៊ុំ សុផាត នាយប៉ុស្តិ៍នគរបាលឃុំបានមានប្រសាសន៍ថា ដៃបុរសរងគ្រោះក៏រងរបួសដែរ ហើយនគរបាលនៅកន្លែងកើតហេតុបានសន្និដ្ឋានថា វាជាករណីមនុស្សឃាតគិតទុកជាមុន។
លោកបានធ្វើការគូសបញ្ជាក់ថា ”ជនរងគ្រោះត្រូវគេវាយចំថ្ងាស [មានរបួស] រយះប្រវែងប្រហែល៦សង់ទីម៉ែត្រ។ ថ្គាមខាងឆ្វេងបាក់ កំភូនដៃឆ្វេងក៏រងរបួសដែរ ហាក់ដូចជាជនរងគ្រោះបានលើកដៃរងដើម្បីការពារខ្លួន នៅពេលត្រូវជនល្មើសវាយ។ នគរបាលរបស់យើងបានសន្និដ្ឋានថា ជនល្មើសបានរៀបគម្រោងគិតទុកជាមុនដើម្បីសម្លាប់ជនរងគ្រោះជាយូរមកហើយ ពីព្រោះយើងបានពិនិត្យសាកសព ហើយឃើញត្រចៀករបស់ជនរងគ្រោះមានឆ្នុកជ័រនៅក្នុងនោះ ដើម្បីទប់កុំឲ្យឈាមហូរចេញតាមត្រចៀក។ ប្រសិនបើជនល្មើសគ្មានគម្រោងជាយូរមកហើយទេ ពួកគេមិនអាចប្រើប្រាស់ [ឆ្នុក] បែបនេះបានទេ”។
លោកស្នងការខេត្ត អុីង សំអុល បានមានប្រសាសន៍ថា បុរសរងគ្រោះមានកម្ពស់ប្រហែល១,៨៥ម៉ែត្រ និងមានទម្ងន់ប្រហែល៨៥គីឡូក្រាម ប៉ុន្តែគ្មានឯកសារជាប់ខ្លួនទេ។ លោកបានលើកឡើងថា ”គាត់ត្រូវគេសម្លាប់នៅកន្លែងផ្សេង ហើយបន្ទាប់មកសាកសពត្រូវគេយកទៅទម្លាក់ចោលនៅទីនោះ។ ជើង និងដៃរបស់សាកសពត្រូវបានកាច់បត់ចូលក្នុងវ៉ាលិស ហើយបន្ទាប់មកសពក៏ត្រូវគេទម្លាក់ចូលព្រែកនោះដែលស្ថិតនៅក្នុងឃុំអង្កោល។ យើងសន្និដ្ឋានថា ជនរងគ្រោះត្រូវគេសម្លាប់លើសពីពីរថ្ងៃ ពីព្រោះសាកសពមានសភាពស្អុយរលួយ។ ពេលនេះយើងកំពុងស៊ើបអង្កេតដើម្បីស្វែងរកជនល្មើស”។
ស្នងការខេត្តរូបនេះបានលើកឡើងទៀតថា លោកបានទាក់ទងទៅនគរបាលក្នុងខេត្តព្រះសីហនុ និងខេត្តកំពត រួចហើយ ប៉ុុន្តែពួកគេនិយាយថា ខ្លួនមិនដឹងថាមានជនបរទេសណាដែលរស់នៅក្នុងតំបន់របស់ខ្លួនរយៈពេលយូរ មានភិនភាគដូចគ្នានឹងភិនភាគបុរសរងគ្រោះទេ។
លោកមានប្រសាសន៍បន្តថា សាកសពត្រូវបានបញ្ចុះនៅជិតទីបញ្ជាការដ្ឋាននគរបាលស្រុក ប៉ុន្តែថា សាកសពអាចនឹងត្រូវគាស់យកទៅកន្លែងផ្សេង ប្រសិនបើមានមិត្តភក្ដិ ឬគ្រួសារមកបញ្ជាក់អះអាង៕ សុខុម