លោកស្រី រ៉ូណា ស្មីត អ្នកធ្វើរបាយការណ៍ពិសេសថ្មីរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសកម្ពុជា កាលពីថ្ងៃអង្គារបានថ្លែងនៅក្រុមប្រឹក្សាសិទ្ធិមនុស្សអង្គការសហប្រជាជាតិ (HRC) ក្នុងទីក្រុងហ្សឺណែវជាលើកដំបូង ដោយបានប្រាប់អង្គការនេះថា លោកស្រីមានផែនការផ្តោតលើមនុស្សដែលទន់ខ្សោយក្នុងប្រទេសនេះ។
ការបង្ហាញមុខរបស់លោកស្រី ស្មីត នៅក្រុមប្រឹក្សាសិទ្ធិមនុស្សមិនដល់មួយសប្តាហ៍ផងបន្ទាប់ពីលោកស្រីបានបញ្ចប់ដំណើរទស្សនកិច្ចរយៈពេលប្រាំបួនថ្ងៃនៅកម្ពុជា ជាដំណើរទស្សនកិច្ចលើកដំបូងរបស់លោកស្រី ចាប់តាំងពីទទួលបានការតែងតាំងជាអ្នកស្នងតំណែងបន្តពីលោក សុរិយា ស៊ូបេឌី កាលពីខែមីនា ដែលក្នុងដំណើរទស្សនកិច្ចនោះលោកស្រីបានជួបជាមួយមន្ត្រីរដ្ឋាភិបាល អ្នកនយោបាយបក្សប្រឆាំង និងអ្នកការពារសិទ្ធិមនុស្ស។
លោកស្រី ស្មីត បានមានប្រសាសន៍ថា “បន្ថែមពីលើការពិនិត្យនិងផ្អែកលើកិច្ចការរបស់បុព្វាធិការីរបស់ខ្ញុំ ខ្ញុំជឿថា ការរួមចំណែករបស់ខ្ញុំអាចត្រូវផ្តោតលើស្ថានការណ៍របស់ក្រុមមនុស្សទន់ខ្សោយ។ ឧទាហរណ៍ ជនរងគ្រោះពីការរើសអើងពូជសាសន៍ និងការរើសអើងក្រុមជនជាតិដើមភាគតិច ជនអន្តោគ្រាម ស្ត្រី កុមារ និងជនពិការ”។
លោកស្រី ស្មីត បានមានប្រសាសន៍ថា ការផ្តល់កម្មសិទ្ធិដីធ្លី និងកិច្ចប្រឹងប្រែងផ្សេងទៀត ដើម្បីដោះស្រាយបញ្ហាសិទ្ធិដីធ្លី បាន “ចាប់ផ្តើមឃើញកម្រិតនៃជោគជ័យ”។
លោកស្រីបានបន្ថែមថា “ទោះជាយ៉ាងនេះក្តី កិច្ចការជាច្រើនត្រូវដោះស្រាយទៀត ជាពិសេស ចំពោះសហគមន៍ទន់ខ្សោយ ដូចជាជនជាតិដើមភាគតិចជាដើម”។
លោកស្រី ស្មីត ក៏បានចាប់អារម្មណ៍ចំពោះកង្វល់ដែលបានលើកឡើងដោយអង្គការក្រៅរដ្ឋាភិបាលក្នុងស្រុកនិងអន្តរជាតិ ដែលថាសេរីភាពនៃការជួបជុំគ្នា សមាគម និងការសម្តែងមតិ កំពុងត្រូវរឹតបន្តឹង នៅពេលដែលប្រទេសនេះជិតដល់ការបោះឆ្នោតឃុំសង្កាត់នៅ២០១៧ និងការបោះឆ្នោតជាតិនៅឆ្នាំ២០១៨។
អ្នកធ្វើរបាយការណ៍ពិសេសរូបនេះបាននិយាយថា “នេះជាបញ្ហាកង្វល់ ដោយហេតុថា លទ្ធភាពនៃមនុស្សទាំងអស់ទទួលបានសំណង និងរួមចំណែកដល់ការស្វែងរកដំណោះស្រាយដីធ្លី ការងារ និងជម្លោះផ្សេងទៀត ជាញឹកញាប់ផ្អែកលើលទ្ធភាពរបស់ពួកគេក្នុងការប្រើសេរីភាពបែបនេះដោយសន្តិវិធី”។
ក្នុងការឆ្លើយតបទៅនឹងការថ្លែងរបស់លោកស្រី ស្មីត តំណាងអចិន្ត្រៃយ៍របស់ប្រទេសកម្ពុជាប្រចាំការិយាល័យអង្គការសហប្រជាជាតិនៅក្រុងហ្សឺណែវ លោក នៃ សំអុល បានប្រាប់ក្រុមប្រឹក្សាសិទ្ធិមនុស្សថា រដ្ឋាភិបាលកម្ពុជាបានប្តេជ្ញាពង្រឹងនីតិរដ្ឋ និងបានរីកចម្រើនក្នុងការដោះស្រាយជម្លោះដីធ្លី។
លោក សំអុល បានមានប្រសាសន៍ថា “គ្មានការបណ្តេញចេញទាំងបង្ខំទេក្នុងគោលនយោបាយកម្ពុជា”។ លោកបានបន្ថែមថា រដ្ឋាភិបាលកម្ពុជា “ទទួលស្គាល់ជាបណ្តោះអាសន្ននូវសិទ្ធិរបស់ប្រជាពលរដ្ឋចំពោះការកាន់កាប់ដីធ្លីដោយខុសច្បាប់រហូតដល់ពួកគាត់ស្វែងរកកន្លែងស្នាក់នៅដោយស្របច្បាប់បាន”៕ មានិត