លោក សុខ ឥសាន អ្នកនាំពាក្យគណបក្សប្រជាជនកម្ពុជា បានមានប្រសាសន៍កាលពីថ្ងៃពុធថា សភាជាតិនឹងបោះឆ្នោតលើច្បាប់វិសោធនកម្មដែលគ្រប់គ្រងការបោះឆ្នោតឃុំសង្កាត់នៅថ្ងៃទី២០ខែតុលា បើទោះជាគណបក្សប្រជាជនកម្ពុជាកំពុងកាន់អំណាច និងគណបក្សសង្គ្រោះជាតិ មិនបង្កើតបានការព្រមព្រៀងទាក់ទិននឹងផ្នែកជាច្រើននៃច្បាប់នេះ ដែលពួកគេមិនយល់ស្របគ្នាក៏ដោយ។
ថ្វីបើតំណាងរាស្ត្រ៦៨រូបរបស់គណបក្សប្រជាជនកម្ពុជាមានសំឡេងភាគច្រើនដាច់ខាតក្នុងសភា១២៣អាសនៈ ហើយអាចអនុម័តច្បាប់នេះតាមចិត្តប្រាថ្នាក៏ដោយ ក៏មន្ត្រីជាន់ខ្ពស់ខាងគណបក្សកាន់អំណាចនិងបក្សប្រឆាំង បាននិងកំពុងចរចាក្នុងក្តីសង្ឃឹមថានឹងសម្រេចបានច្បាប់ថ្មីមួយដែលអាចទទួលយកបានទាំងសងខាង។
លោក ឥសាន បានមានប្រសាសន៍ថា ទាំងពីរក្រុម ដែលដឹកនាំដោយលោក ស ខេង រដ្ឋមន្ត្រីក្រសួងមហាផ្ទៃ និងលោក សម រង្ស៊ី មេដឹកនាំគណបក្សប្រឆាំង គ្រោងនឹងជួបគ្នាជាថ្មីទៀតនៅថ្ងៃនេះ។ ប្រសិនបើគេមិនអាចសម្រេចការព្រមព្រៀង អ៊ីចឹង គណបក្សប្រជាជនកម្ពុជានឹងអនុម័តច្បាប់នេះ។
លោកបានមានប្រសាសន៍ថា “ក្នុងករណីមិនមានការព្រមព្រៀងក្នុងការចរចាខាងមុខនេះ ក្រុមការងារនឹងបញ្ជូនរឿងនេះទៅកិច្ចប្រជុំសភាពេញអង្គ ដែលគ្រោងធ្វើនៅថ្ងៃអង្គារទី២០ខែតុលា។នៅពេលកិច្ចការនេះត្រូវបញ្ជូនទៅអង្គប្រជុំសភាពេញអង្គ វាត្រូវការតែ៥០ភាគរយបូកមួយប៉ុណ្ណោះ”។
ច្បាប់បោះឆ្នោតឃុំសង្កាត់ត្រូវធ្វើបច្ចុប្បន្នភាពដោយសារការយោងជាច្រើនទៅនឹងច្បាប់បោះឆ្នោតជាតិ ដែលបានសរសេរជាថ្មីនៅដើមឆ្នាំនេះ ជាផ្នែកមួយនៃកិច្ចព្រមព្រៀងរបស់គណបក្សសង្គ្រោះជាតិ ដើម្បីបញ្ចប់ពហិការមិនចូលសភារយៈពេលជិតមួយឆ្នាំរបស់ខ្លួន។
គណបក្សទាំងពីរព្រមព្រៀងគ្នាលើភាគច្រើននៃច្បាប់នេះ ប៉ុន្តែខ្វែងគំនិតគ្នាជាខ្លាំងលើមាត្រាមួយចំនួន ដោយគណបក្សប្រឆាំងទាមទារឲ្យខដែលមានស្រាប់សម្រាប់យុទ្ធនាការបោះឆ្នោតឃុំសង្កាត់រយៈពេល១៥ថ្ងៃ ត្រូវទុកនៅដដែល។
គណបក្សប្រជាជនកម្ពុជាចង់បានយុទ្ធនាការមានរយៈពេល១០ថ្ងៃ ដោយលើកឡើងថា រយៈពេលយុទ្ធនាការបោះឆ្នោតថ្នាក់ជាតិបានកាត់បន្ថយដែរ។
លោក អេង ឆៃអ៊ាង តំណាងរាស្ត្រគណបក្សសង្គ្រោះជាតិ ដែលបានចូលរួមក្នុងការចរចារវាងលោក ខេង និងលោក រង្ស៊ី បានមានប្រសាសន៍ថា លោកមិនអាចអត្ថាធិប្បាយ ថាតើគណបក្សសង្គ្រោះជាតិនឹងបោះបង់ចោលការទាមទាររបស់ខ្លួនឬយ៉ាងណាទេ។
លោក ឆៃអ៊ាង បានមានប្រសាសន៍ថា “ខ្ញុំមិនដឹងទេ ដូច្នេះខ្ញុំមិនអាចប្រាប់បានទេ ដោយហេតុថាវាអាស្រ័យលើការចរចា”។ លោកបានបន្ថែមថា លោកជឿថា ការប្រជុំនៅថ្ងៃនេះនឹងផ្តោតជាសំខាន់លើការធ្វើវិសោធនកម្មវិធានផ្ទៃក្នុងរបស់សភាជាតិ៕និត