31 C
Phnom Penh

តុលាការ​បើក​សវនាការ​​លើ​សំណុំរឿង​​ឆ​បោក​ប្រាក់​​២,៥លាន​ដុល្លារ​​រឿង​ដីសម្បទាន​នៅ​មណ្ឌលគិរី

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ សាលា​ដំបូង​រាជធានី​ភ្នំពេញ​បាន​​បើក​​សវនាការ​ជំនុំជម្រះ​រឿងក្ដី​ម្ចាស់​​ក្រុមហ៊ុន​កសិឧស្សាហកម្មមួយ​​ដែល​​ចោទ​អ្នក​​​រត់​ការ​​​ឯកសារ​​​ម្នាក់​​​ថា​បាន​​ឆបោក​​​លោក​​​យក​​ប្រាក់​​​អស់​២,៥លាន​ដុល្លារ​ បន្ទាប់​​ពី​ខក​ខាន​មិន​បាន​រត់ឯកសារ​​ដែល​អនុញ្ញាត​ឲ្យ​គាត់​អភិវឌ្ឍ​ដី​សម្ប​ទាន​​មួយ​កន្លែង​ក្នុង​ខេត្ត​មណ្ឌល​គិរី។

លោក អៀប ប៉ៃ ម្ចាស់​ក្រុម​ហ៊ុន​​កសិកម្ម​​ខ្មែរ​អង្គរ បាន​ថ្លែង​ថា ​លោក​បាន​បង់​ប្រាក់​មួយ​ចំនួន​​ដល់​ក្រុម​ហ៊ុន សួន មាន​សម្បត្តិ ចាប់​តាំង​ពី​ឆ្នាំ​២០១១​មក ជា​ថ្នូរ​នឹង​ការ​ជួយ​លោក​​​ឲ្យ​ទទួល​បាន​ដី​សម្បទាន​​​ទំហំ​៩.១៦០​ហិកតា​ ដើម្បី​​ធ្វើ​​ជា​ចម្ការ​កៅស៊ូ។ លោក​បាន​បង់​​ប្រាក់​​សរុប​២,៥លាន​ដុល្លារ​​សម្រាប់​ដី​នោះ។

ទោះ​យ៉ាង​ណា លោក សួន មាន ជា​អ្នក​រត់​ការ​ឯកសារ​ដែល​មិន​បាន​បង្ហាញ​ខ្លួន​ក្នុង​តុលា​ការ​​​ត្រូវ​បាន​ចោទ​ប្រកាន់ពីបទ​ឆបោក​​កាលពី​ខែ​មីនា ឆ្នាំ​២០១៤ បន្ទាប់ពី​លោក អៀប ប៉ៃ អះ​អាង​ថា ​លោក​មិន​អាច​អភិវឌ្ឍ​​ដី​​នេះ​បាន​ទេ ព្រោះ​លោក សួន មាន មិន​បាន​​ដាក់​​ជូន​ឯកសារ​ពាក់ព័ន្ធ​ជួស​មុខ​ឲ្យ​លោក​​ឡើយ​។

លោក អៀប ប៉ៃ បាន​និយាយថា​បើ​ទោះ​ជា​​ដី​សម្បទាន​នេះត្រូវ​បាន​ផ្តល់ឲ្យ​​ក៏​ដោយ ក៏​​លោក​ សួន មាន​ មិន​បាន​ដាក់​ជូន​​ឯកសារ​​ទៅ​រដ្ឋាភិបាល​​ដែល​នឹង​អនុញ្ញាត​ឲ្យលោក​​ចាប់​ផ្ដើម​រាន​ដី​​ និង​ដាំ​ដើម​កៅស៊ូ​ដែរ ​ក្នុង​នោះ​​រួម​មាន​​ទាំង​ឯកសារ​​វាយ​តម្លៃ​​ផល​ប៉ះពាល់​បរិស្ថាន​​ និង​ព័ត៌មាន​​​​ចុះ​បញ្ជី​ដីធ្លី​ផង​ដែរ​។

​លោក អៀប ប៉ៃ បាន​ថ្លែង​ថា “​ខ្ញុំ​បាន​​ចាញ់​​បោកគេ​ ពីព្រោះ​ឯកសារ​ទាំង​អស់​​មិន​ត្រូវ​បាន​​​រត់​ការ​ពេញ​លេញ​ឡើយ”។ លោក​បាន​​បន្ថែម​ថា លោក​​បាន​ទាម​ទារ​​ឲ្យ​ចុង​ចោទ​រូប​នេះ​សង​​ប្រាក់​​ដល់​លោក​វិញ​​គ្រប់​ចំនួន​​២,៥​លាន​ដុល្លារ ដែល​លោក​បាន​បង់​ទៅ​ឲ្យ​ក្រុម​ហ៊ុន​នេះ និង​បូកបន្ថែម​ប្រាក់​សំណង​ចំនួន​១,២​លាន​ដុល្លារ​ទៀត”។

លោក ឡេង​ លីហួរ មេធាវី​តំណាង​​លោក សួន មាន បាន​បដិសេធ​ការ​ចោទ​ប្រកាន់​នេះ ហើយ​បាន​​អះអាង​ថា កូន​ក្ដី​របស់​លោក​មិន​អាច​ដាក់​ជូន​ឯកសារ​ដែល​នៅ​សេស​សល់​បាន​​​ទេ ពីព្រោះ​ក្រសួង​បរិស្ថាន​​បាន​ដក​ហូត​​យក​ដី​សម្បទាន​នេះ​វិញ​កាលពី​ខែ​តុលា​ឆ្នាំមុន។

លោក លីហួរ ​ថ្លែង​ថា “​ហេតុផល​ដែល​កូន​​ក្ដី​​របស់​ខ្ញុំ​មិន​បាន​បំពេញ​ភារកិច្ច​របស់​ខ្លួន ព្រោះ​​​នេះ​ជា​​តម្រូវ​ការ​របស់​រដ្ឋា​ភិបាល​។ ​​រដ្ឋាភិបាល​បាន​ដក​យក​ដី​​សម្ប​ទាន​​​នេះ​វិញ​ដើម្បី​យក​ទៅ​ចែក​ជូន​ប្រជា​ពលរដ្ឋ”។

លោក​បាន​ថ្លែង​ថា ”​រដ្ឋាភិបាល​បាន​ដក​ហូត​ដី​វិញ​ពី​ក្រុម​ហ៊ុន​ជាង​២០​ឯណោះ​…។ បញ្ហាទាំង​អស់​នេះ​បង្ហាញ​ឲ្យ​ឃើញ​ថា វា​មិនមែន​ជា​កំហុស​របស់​​កូនក្ដី​ខ្ញុំ​ទេ ប៉ុន្តែ​វា​ជា​កំហុស​របស់​ក្រុម​ហ៊ុន​កសិកម្ម​ខ្មែរ​អង្គរ ​ដែល​បាន​រំលោភ​គោល​ការណ៍ណែនាំ​​របស់​រដ្ឋាភិបាល”៕ សារុន​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស