នគរបាលក្នុងមូលដ្ឋានបាននិយាយថា មនុស្សបីនាក់បានស្លាប់ និងប្រាំនាក់ទៀតបានរងរបួសធ្ងន់នៅពេលដែលរថយន្តដឹកទំនិញមួយគ្រឿងបានបុករថយន្តទេសចរណ៍នៅតាមបណ្ដោយផ្លូវជាតិលេខ៣ ក្នុងស្រុកកណ្ដាលស្ទឹង ខេត្តកណ្ដាល កាលពីថ្ងៃសុក្រ។
លោក វ៉ែន សុវិន ស្នងការរងខេត្តបានមានប្រសាសន៍ថា គ្រោះថ្នាក់នេះបានកើតឡើងនៅពេលរសៀល នៅពេលនោះរថយន្តទេសចរណ៍មួយគ្រឿងដឹកអ្នកដំណើរប្រាំបីនាក់ និងមាន់មួយចំនួនមកពីខេត្តតាកែវទៅក្រុងភ្នំពេញ ត្រូវបានបុកដោយរថយន្តដឹកទំនិញដែលធ្វើដំណើរក្នុងទិសផ្ទុយគ្នា។
លោក សុវិន បានមានប្រសាសន៍ថា “នៅម៉ោងប្រហែល១រសៀល រថយន្តដឹកទំនិញបានបុករថយន្តទេសចរណ៍ ហើយអ្នកដំណើរបីនាក់បានស្លាប់ភ្លាមនៅក្នុងរថយន្តតែម្ដង”។
លោកបានបន្ថែមទៀតថា អ្នកដំណើរប្រាំនាក់ផ្សេងទៀតបានរងរបួស ហើយត្រូវបានបញ្ជូនទៅព្យាបាលនៅមន្ទីរពេទ្យព្រះកុសុមៈ ក្នុងក្រុងភ្នំពេញ។
លោក សុវិន បានឲ្យដឹងទៀតថា អ្នកបើករថយន្តធុនធំបានរត់គេចខ្លួនភ្លាមក្រោយពីការបុកនោះ ហើយនគរបាលកំពុងតាមស្វែងរកចាប់ខ្លួនគាត់។ លោកបានមានប្រសាសន៍ឲ្យដឹងទៀតថា “យើងសន្និដ្ឋានថា ជនសង្ស័យ [អ្នកបើករថយន្តធុនធំ] ងងុយដេក ហើយបានរេចង្កូតចូលផ្លូវម្ខាងទៀត និងបានបុករថយន្តទេសចរណ៍។ ទោះជាយ៉ាងនេះក្ដី តុលាការមិនទាន់បានចេញដីកាចាប់ខ្លួនអ្នកបើកបរនោះទេ យើងនឹងស្វែងរកចាប់ខ្លួនគាត់”៕ និត