កាលពីថ្ងៃសុក្រ អាជ្ញាធរខេត្តស្ទឹងត្រែងបានចាប់ខ្លួនមនុស្ស១២នាក់ ដែលដឹកជញ្ជូនឈើមានតម្លៃខ្ពស់រាប់សិបដុំចុះតាមបណ្តោយ ទន្លេសេសាន ប៉ុន្តែមានគម្រោងដោះលែងពួកគេវិញបន្ទាប់ពីពួកគេបង់ប្រាក់ពិន័យ។
លោក ពុយ វ៉ៃ នាយការិយាល័យនគរបាលស្រាវជ្រាវយុត្តិធម៌នៃកងរាជអាវុធហត្ថខេត្តនេះបានលើកឡើងកាលពីម្សិលមិញថា លោកនិងមន្ត្រីរបស់លោកបានឃើញទូកចំនួនបួនគ្រឿងអូសក្បូនឈើគុណភាពអន់ចុះតាមបណ្ដោយទន្លេកាលពីយប់ថ្ងៃសុក្រ ហើយបានចុះទៅពិនិត្យក្បូនឈើទាំងនោះដើម្បីចង់ដឹងថា តើពួកគេមានបង្កប់ឈើដែលមានតម្លៃខ្ពស់នៅពីក្រោមក្បូនឈើទាំងនោះឬក៏អត់។
លោកលើកឡើងថា ក្រុមមន្ត្រីរបស់លោកបានរកឃើញឈើប្រហែល៨០ដុំចងភ្ជាប់នៅក្រោមក្បូនឈើគុណភាពអន់ទាំងនោះ។
លោកបានមានប្រសាសន៍ថា “យើងបានឃាត់ទូក ហើយទូរស័ព្ទហៅរដ្ឋបាលព្រៃឈើឲ្យធ្វើចំណាត់ការលើការដឹកជញ្ជូនឈើខុសច្បាប់នេះ ហើយពួកគេបានចាប់ខ្លួនមនុស្ស១២នាក់”។
លោក លី គន ប្រធានផ្នែករដ្ឋបាលព្រៃឈើសង្កាត់ស្ទឹងត្រែង បានលើកឡើងថា ឈើដែលអ្នកបើកទូកកំពុងដឹកជញ្ជូនគឺឈើធ្នង់ដែលជាប្រភេទឈើប្រណីត និងឈើស្រឡៅ ដែលជាឈើប្រភេទលេខ១ ហើយក្នុងមួយដុំៗមានប្រវែងប្រហែល២ម៉ែត្រ។
លោកបានលើកឡើងទៀតថា មន្ត្រីរបស់លោកចាប់បុរសទាំង១២នាក់នេះពីបទដឹកឈើដោយគ្មានការអនុញ្ញាត ហើយឥឡូវ នេះកំពុងយកឈើទាំងនេះទៅទុកនៅឯខណ្ឌរដ្ឋបាលព្រៃឈើ។
លោកបានមានប្រសាសន៍ថា “យើងបានដឹកឈើទៅទុកនៅខណ្ឌរដ្ឋបាលព្រៃឈើ [ស្ទឹងត្រែង] អស់មួយឡានរួចហើយ ហើយយើងកំពុងតែប្រមូលឈើដែលនៅសល់មកទុកលើច្រាំងដើម្បីដាក់លើរថយន្តដែរ”។
ទោះជាយ៉ាងណា លោក លី គន បានលើកឡើងថា បុរសដែលត្រូវបានឃាត់ខ្លួនទាំងនេះនឹងត្រូវដោះលែងវិញប្រសិនបើពួកគេបង់ប្រាក់ពិន័យ។
លោកបានមានប្រសាសន៍ថា ”យើងនឹងមិនបញ្ជូនអ្នកទាំង១២នាក់នេះទៅតុលាការឡើយ ព្រោះពួកគេប្រព្រឹត្តត្រឹមតែបទល្មើសស្រាលប៉ុណ្ណោះ។ ប៉ុន្តែយើងតម្រូវឲ្យពួកគេបង់ប្រាក់ពិន័យតាមច្បាប់ព្រៃឈើ។ ក្នុងករណី អ្នកទាំងនោះបដិសេធមិនបង់ប្រាក់ពិន័យ អ៊ីចឹងយើងនឹងបញ្ជូនពួកគេទៅតុលាការ”។
លោកលើកឡើងទៀតថា ខណ្ឌរដ្ឋបាលព្រៃឈើកំពុងតែសាកសួរបុរសទាំងនេះដើម្បីរកឲ្យឃើញថា តើនរណាដែលពួកគេកំពុងជញ្ជូនឈើទាំងនេះយកទៅឲ្យ។ ច្បាប់ព្រៃឈើចែងថា អ្នកណាដែលត្រូវបានរកឃើញថា ដឹកជញ្ជូនឈើដោយគ្មានការអនុញ្ញាតនឹងត្រូវពិន័យលើសពីពីរទៅបីដងនៃតម្លៃឈើ។ ឈើប្រភេទធ្នង់១ម៉ែត្រគូបអាចមានតម្លៃរាប់រយដុល្លារ។
លោក លី គន បានលើកឡើងទៀតថា លោកនៅមិនទាន់ដឹងពីតម្លៃសរុបនៃឈើទាំងនេះនៅឡើយទេ ព្រោះមិនទាន់មានការវាស់វែង។
មានសេចក្ដីរាយការណ៍នៃកាប់ឈើ និងការដឹកជញ្ជូនឈើខុសច្បាប់យ៉ាងច្រើននៅក្នុងខេត្តស្ទឹងត្រែង ចាប់តាំងពីមានការចាប់ផ្ដើមកាប់រានព្រៃធ្វើជាអាងស្តុកទឹកសម្រាប់គម្រោងទំនប់វារីអគ្គិសនីសេសានក្រោម២ ក្នុងខេត្តនេះកាលពីឆ្នាំ២០១៣មក។ កាលពីឆ្នាំមុនតំណាងរាស្ត្រមកពីគណបក្សប្រជាជនកម្ពុជាកំពុងកាន់អំណាចបានចោទប្រកាន់អ្នកដែលកាប់រានព្រៃនៅតំបន់នេះថា បានកាប់ឈើហួសពីព្រំប្រទល់ ហើយថា មន្ត្រីមូលដ្ឋានមិនអាចដោះស្រាយបញ្ហានេះបានឡើយ។
លោក ឡូយ សូផាត អតីតអភិបាលខេត្តនេះបានប្រាប់រដ្ឋសភាអំឡុងពេលនោះថា “យើងបង្ក្រាបលើពលរដ្ឋ ប៉ុន្តែឈ្មួញធំៗរួចខ្លួន”៕ ស៊ុយឈាង