លោក សម រង្ស៊ី មេដឹកនាំគណបក្សប្រឆាំងបានសន្យាជាមួយអ្នកគាំទ្រនៅក្នុងខេត្តកំពង់ចាម កាលពីថ្ងៃសៅរ៍ថា ប្រសិនបើគណបក្សរបស់លោកកាន់អំណាច មន្ត្រីរាជការ និងទាហានអាចប្រាកដថា ពួកគាត់នឹងនៅតែបម្រើការងាររបស់ខ្លួនដដែល ហើយនឹងទទួលបានការដំឡើងប្រាក់បេៀវត្សរ៍ទៀតផង។
ថ្លែងទៅកាន់អ្នកគាំទ្ររាប់រយនាក់នៅក្នុងស្រុកស្រីសន្ធរ លោក សម រង្ស៊ី មានប្រសាសន៍ថា មន្ត្រីរាជការដែលបម្រើការងារនៅក្រោមគណបក្សប្រជាជនកម្ពុជាកាន់អំណាច មិនចាំបាច់បារម្ភអំពីការបាត់បង់តំណែងរបស់ខ្លួននៅក្រោមរដ្ឋាភិបាលរបស់គណបក្សសង្គ្រោះជាតិឡើយ។
មេដឹកនាំគណបក្សប្រឆាំងរូបនេះបានមានប្រសាសន៍ថា ”ខ្ញុំសូមអំពាវនាវដល់អ្នកទាំងអស់ដែលមិនទាន់ច្បាស់ និងមិនទាន់សម្រេចចិត្តថា សូមបងប្អូនជឿទុកចិត្តលើគណបក្សសង្គ្រោះជាតិ”។
លោក សម រង្ស៊ី បានថ្លែងថា “ខ្ញុំសូមអំពាវនាវដល់មន្ត្រីរាជការ នគរបាល ទាហាន កងទ័ព ប៉េអឹម ដែលបម្រើ និងការពារប្រទេសជាតិ សូមកុំបារម្ភអីនៅពេលគណបក្សសង្គ្រោះជាតិដឹកនាំប្រទេស”។
លោកបានបន្ថែមថា ”គណបក្សសង្គ្រោះជាតិនឹងរក្សាតំណែងជូនបងប្អូនទាំងអស់គ្នា ហើយនឹងមិនដកតំណែង ឬបណ្តេញបងប្អូនចេញឡើយ។ ផ្ទុយទៅវិញ គណបក្សសង្គ្រោះជាតិនឹងដំឡើងប្រាក់ខែជូនបងប្អូនដែលខិតខំការពារជាតិ”។
ការដំឡើងប្រាក់ខែអប្បបរមាដល់មន្ត្រីរាជការរហូតដល់២៥០ដុល្លារគឺជាកម្មវិធីនយោបាយមួយក្នុងចំណោមកម្មវិធីនយោបាយសំខាន់ៗក្នុងពេលធ្វើយុទ្ធនាការរបស់គណបក្សសង្គ្រោះជាតិនៅមុនការបោះឆ្នោតជាតិឆ្នាំ២០១៣ ហើយរដ្ឋាភិបាលគណបក្សប្រជាជនកម្ពុជាតាំងពីពេលនោះមកបានចាប់ផ្ដើមអនុវត្តកម្មវិធីដំឡើងប្រាក់បៀវត្សរ៍ដល់មន្ត្រីរាជការរបស់ខ្លួន រួមមានគ្រូបង្រៀន និងទាហានជាដើម។
ការសន្យារបស់លោក សម រង្ស៊ី ថានឹងមិនដកតំណែងបច្ចុប្បន្នរបស់មន្ត្រីរាជការនេះ ធ្វើឡើងបន្ទាប់ពីមន្ត្រីគណបក្សសង្គ្រោះជាតិបានធ្វើសន្និសីទមួយកាលពីថ្ងៃសុក្រ ដើម្បីសម្រេចអំពីដំណើរការរបស់គណបក្សនៅមុនការបោះឆ្នោតឃុំ-សង្កាត់នៅឆ្នាំ២០១៧ និងការបោះឆ្នោតជាតិឆ្នាំ២០១៨។
លោកនាយករដ្ឋមន្ត្រី ហ៊ុន សែន ក៏បានប្រើប្រាស់វោហារសាស្ត្ររបស់ខ្លួនសំដៅដល់គណបក្សប្រឆាំងផងដែរ ដែលការរំលោភ “ក្រមប្រតិបត្តិ”រវាងគណបក្សប្រជាជនកម្ពុជា និងគណបក្សសង្គ្រោះជាតិកាលពីខែមុន ដោយការព្រមានអំពីសង្គ្រាមម្តងទៀតប្រសិនបើគណបក្សប្រឆាំងកាន់អំណាច។
អំឡុងសន្និសីទកាលពីថ្ងៃសុក្រ លោក កឹម សុខា អនុប្រធានគណបក្សប្រឆាំងបានមានប្រសាសន៍ថា គណបក្សសង្គ្រោះជាតិនៅតែលើកឡើងអំពីចំណុចខ្សោយរបស់គណបក្សប្រជាជនកម្ពុជាដើម្បីប្រឆាំងនឹងគណបក្សកាន់អំណាច។
លោក កឹម សុខា បានថ្លែងទៅកាន់មន្ត្រីដែលមានវត្តមានជាង១០០នាក់ថា “សូមមើល ពីចំណុចខ្លាំង និងចំណុចខ្សោយរបស់គូប្រជែង ហើយឆ្លើយតបចំពោះចំណុចទាំងនោះ”។
ដោយលើកឡើងពីបញ្ហាទាំងឡាយ រួមមានតុលាការពុករលួយ សិទ្ធិដីធ្លី ភាពក្រីក្រ ភាពអត់ការងារធ្វើរបស់យុវជន សិទ្ធិមនុស្ស ការអប់រំ និងការគាំពារសុខភាព លោកបានមានប្រសាសន៍ថា “យើងត្រូវជ្រើសរើសបញ្ហាដែលកំពុងប្រឈមសម្រាប់ប្រទេសជាតិ និងប្រជាជនកម្ពុជា ដែលរដ្ឋាភិបាលសព្វថ្ងៃនេះមិនអាចដោះស្រាយបាន”។
ជាការឆ្លើយតបចំពោះការរិះគន់នេះ លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជាបានផ្ញើសារតាមប្រព័ន្ធអុីនធឺណិតទៅកាន់អ្នកកាសែតកាលពីថ្ងៃសៅរ៍ ដោយនិយាយការពារគណបក្សកាន់អំណាច។
សារនេះមានខ្លឹមសារថា ”គណបក្សនេះទប់ស្កាត់ការញុះញង់សង្គម និងការផ្លាស់ប្ដូរដែលបែងចែកសង្គម និងអាចបង្កការបំផ្លាញធ្ងន់ធ្ងរដល់សន្តិភាពរបស់ប្រទេសជាតិ និងប្រជាជន។ យើងប្រកាន់ខ្ជាប់រដ្ឋអធិបតេយ្យ និងគោលការណ៍នីតិរដ្ឋ”។
លោក សួស យ៉ារ៉ា បានលើកឡើងពីសមិទ្ធផលជាប្រវត្តិសាស្ត្ររបស់គណបក្សប្រជាជនកម្ពុជាក្នុងការនាំមកនូវសុខសន្តិភាពដល់ប្រទេសជាតិ ហើយលោកបានលើកឡើងអំពីសុន្ទរកថារបស់លោក ហ៊ុន សែន ទៅកាន់អង្គការសហប្រជាជាតិកាលពីខែមុន ដែលក្នុងនោះលោកបានលើកឡើងអំពីកំណើនសេដ្ឋកិច្ច៧ភាគរយ។
លោក សួស យ៉ារ៉ា បានសរសេរថា “ទាំងអស់នេះបង្ហាញឲ្យឃើញថា រាល់ការចោទប្រកាន់ និងការរិះគន់បែបអវិជ្ជមានគឺជាការបំផ្លើស ដើម្បីបំភាន់ប្រជាពលរដ្ឋ។ គណបក្សប្រជាជនកម្ពុជាមិនយកចិត្តទុកដាក់នឹងសកម្មភាពដដែលៗដូចនេះឡើយ ហើយនឹងបន្តរក្សាភាពប្រសើរជាងរបស់ខ្លួន”៕ សារុន