36 C
Phnom Penh

ជនជាតិ​ភាគ​តិចរាប់​​​រយ​​​នាក់​​​ទាម​​​ទារ​​​​​ឲ្យ​​បណ្ដេញ​អភិបាល​ខេត្ត​មណ្ឌលគិរី

ដោយ ឌឹ ខេមបូឌា ដេលី

បទវិភាគ

អ្នក​ភូមិ​ជនជាតិ​ដើម​ភាគ​តិច​​ព្នង​​​មួយ​ក្រុម​​មានគ្នា​​ប្រមាណ​៩០០​នាក់​​​កំពុង​ទាម​​​ទារ​​​​​​ឲ្យ​មាន​ការ​​ដក​អភិបាល​ខេត្ត​មណ្ឌលគិរី​ពី​តំណែង​​ ដោយ​​លើក​ឡើង​នៅ​ក្នុង​ញត្តិ​ដែល​ដាក់​ជូន​រដ្ឋាភិបាល​កាល​ពី​ម្សិលមិញ​ថា អភិបាលខេត្ត​រូប​នេះ​មិន​គោរព​សិទ្ធិ​ជនជាតិ​ដើម​ភាគ​តិច​នៅ​​ក្នុង​ខេត្ត​នេះ។

​តំណាង​អ្នក​ភូមិ​​ចំនួន​ប្រាំនាក់​បាន​ធ្វើ​ដំណើរ​​​មក​រាជធានី​ភ្នំពេញ ដើម្បី​ដាក់​ញត្តិ​​ជូន​ក្រសួង​មហាផ្ទៃ​  ទីស្ដីការ​គណៈរដ្ឋមន្ត្រី និង​ការិយា​ល័យ​​​​ឧត្ដម​ស្នងការ​​អង្គការ​សហប្រជាជាតិ​​ទទួល​បន្ទុក​សិទ្ធិ​មនុស្ស​។

លោក​ គ្រឿង​ តុលា ​អាយុ​២៥​ឆ្នាំ​ ដែល​ជា​តំណាង​មួយ​រូប​ក្នុង​ចំណោម​អ្នក​ភូមិ​​​ទាំង​នេះ​បាន​លើក​ឡើង​ថា “​ញត្តិ​របស់​យើង​ទាម​ទារ​ឲ្យ​​​ប្រមុខ​រដ្ឋាភិបាល​​ដក​លោក​អភិបាល​ខេត្ត​ អេង ប៊ុនហៀង​ ​ពី​តំណែង​​ ព្រោះ​លោក​​​​គាប​​​សង្កត់​សិទ្ធិ​អ្នក​ភូមិ​ជនជាតិ​ដើម​ភាគ​តិច​ ដូច​ជា​មិន​អនុញ្ញាត​ឲ្យយើង​ហែក្បួន​​ដើម្បី​ប្រារព្ធ​​​​ទិវា​សិទ្ធិ​ជនជាតិ​ដើម​ភាគតិច​ជាដើម​​”។

លោក​​ គ្រឿង​ តុលា ​បាន​សំដៅ​លើ​ហេតុ​ការណ៍​មួយ​កាលពី​ខែ​សីហា ដែល​អ្នក​ភូមិ​ជន​​ជាតិ​ដើម​ភាគ​តិច​រាប់​រយ​នាក់​​ត្រូវ​អាជ្ញាធរ​​​រា​រាំង​​​មិន​ឲ្យ​ហែក្បួន​នៅ​ក្នុង​ក្រុង​សែនមនោ​រម្យ ដើម្បី​​ប្រារព្ធ​ទិវាជនជាតិ​ដើម​ភាគតិច​​​អន្តរ​ជាតិ​របស់​អង្គការ​សហប្រជាជាតិ​។

​តំណាង​អ្នកភូមិ​ម្នាក់​ទៀត​ឈ្មោះ ក្រាក់ ប៉ូច បាន​លើក​ឡើង​ថា ​អ្នក​ដាក់​ញត្តិ​គិត​ថា ការ​ធ្វើ​ដូច្នេះ​រំលោភ​​​សិទ្ធិ​​​សេរីភាព​បញ្ចេញ​មតិ​​​ និង​សិទ្ធិ​ជួបជុំគ្នា​ដែល​មាន​ចែង​នៅ​ក្នុង​រដ្ឋធម្មនុញ្ញ​។

ញត្តិ​ប្ដឹង​លោក​ អេង ប៊ុនហៀង​ ក៏​បាន​លើក​ឡើង​ផង​ដែរ​ថា ​ចាប់​តាំងពី​លោក​ឡើង​​​កាន់​​តំណែង​កាលពី​ឆ្នាំ​២០១៣​មក​ មាន​ការ​កើន​ឡើង​គួរ​ឲ្យ​កត់​សម្គាល់​​នៅ​ក្នុង​ការ​កាប់​ឈើ​ខុស​ច្បាប់​ និង​ការ​កាប់​រាន​​ព្រៃ​ដ៏​សំខាន់​របស់​​សហគមន៍​​​ជនជាតិ​ដើម​ភាគតិច​​ព្នង​។

លោក​ គ្រឿង​ តុលា បាន​​លើក​ឡើង​ទៀត​​​ថា ”​ចាប់​តាំង​ពី​អភិបាល​ខេត្ត​រូប​នេះ​ឡើង​កាន់​តំណែង​មក បទ​ល្មើស​ព្រៃឈើ​ ដូចជា​ការ​កាប់​ឈើ​​ខុស​ច្បាប់ និង​វិវាទ​ដីធ្លី​​រវាង​​អ្នក​ភូមិ​ជនជាតិ​ដើម​ភាគតិច និង​​​ក្រុម​ហ៊ុន​គ្រប់​គ្រង​ដី​សម្បទាន​សេដ្ឋកិច្ច និង​ដី​សម្បទាន​សង្គម​កិច្ច​មាន​ការ​កើន​ឡើង​”។

​នៅ​ពេល​ទាក់​ទង​សុំ​ការ​បំភ្លឺ​ លោក អេង ប៊ុនហៀង​ បាន​លើក​ឡើង​ថា លោក​ជាប់​​រវល់​​​ប្រជុំ​​ ហើយ​មិន​អាច​​ពិភាក្សា​អំពី​ញត្តិ​របស់​​អ្នក​​​ភូមិ​ដែល​ប្ដឹង​លោក​បាន​ឡើយ​។

លោក សុខ រដ្ឋា ​អ្នក​សម្រប​សម្រួល​នៅ​អង្គការ​​អាដ​ហុក​ប្រចាំ​ខេត្ត​នេះ​​បាន​បដិសេធ​​​មិន​ធ្វើ​អត្ថាធិប្បាយ​លើ​​ការ​បំពេញ​ការ​ងារ​​របស់​អភិបាល​ខេត្ត​រូប​នេះ​ឡើយ​ ប៉ុន្តែ​បាន​លើក​ឡើង​ថា ស្ថានភាព​​សម្រាប់​ក្រុម​ជន​ជាតិ​​​​​ដើម​ភាគតិច​នៅ​​ក្នុង​ខេត្ត​មណ្ឌល​គិរី​ ជាទូទៅ​មាន​ការ​លំបាក​។

លោក​បាន​មាន​ប្រសាសន៍​ថា ”​អ្នក​ភូមិ​​ជន​ជាតិ​ដើម​ភាគ​តិច​រង​ទុក្ខ​វេទនា​ម្ដង​ហើយ​ម្ដង​ទៀត​ ហើយ​ព្រៃឈើ​បាន​បាត់​បង់​​ រីឯ​ដីធ្លី​ដែល ​​​​ពួកគេ​​ធ្លាប់​​ធ្វើ​ស្រែចម្ការ​​ ក៏​បាត់​បង់​ដែរ​។ ​​​អ្នក​ភូមិជនជាតិ​ដើម​ភាគ​តិច​យល់​ដឹង​ច្រើន​ហើយ។ ពួកគាត់​មាន​ជំនាញ​ជាង​មន្ត្រី​ជំនាញ​ ទៅ​ទៀត​​​​បើ​និយាយ​ពី​ការ​​ការ​ពារ​​ព្រៃឈើ​។​​​ពួកគាត់​ឆ្អែតចិត្ត​​ណាស់​​​”៕ ស៊ុយឈាង​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស