លោក ហោ ណាំហុង រដ្ឋមន្ត្រីក្រសួងការ បរទេសបានស្នើឲ្យឧបនាយករដ្ឋមន្ត្រីឡាវធ្វើការសិក្សាបន្ថែមទៀតលើគម្រោងទំនប់វារីអគ្គិសនីដនសាហុង មុនការសាងសង់ចាប់ផ្តើម អំឡុងកិច្ចប្រជុំជាមួយប្រេសិតរូបនេះនៅក្នុងរាជធានីភ្នំពេញកាលពីម្សិលមិញ។
គម្រោងទំនប់វារីអគ្គិសនីកម្លាំង២៥៦មេហ្គាវ៉ាត់ ដែលគ្រោងសាងសង់កាត់ទន្លេមេគង្គត្រឹមតែចម្ងាយ២គីឡូម៉ែត្រពីព្រំដែនកម្ពុជានោះ គឺជាប្រភពនៃភាពតានតឹងជា យូរមកហើយរវាងប្រទេសឡាវ និងប្រទេស ជិតខាង ដែលព្រួយបារម្ភខ្លាចក្រែងគម្រោងនេះ ធ្វើឲ្យប៉ះពាល់យ៉ាងខ្លាំងដល់បរិស្ថាន។ ក្នុងពេលថ្មីៗនេះ សភាឡាវបានអនុម័តកិច្ចព្រមព្រៀងសម្បទានមួយដោយបើកផ្លូវឲ្យគម្រោងនេះអាចចាប់ផ្តើមបាន ដែលទំនងជានៅដំណាច់ឆ្នាំនេះ។
នៅក្នុងសេចក្តីថ្លែងការណ៍មួយចេញកាលពីខែមុន អង្គការមិនមែនរដ្ឋាភិបាលនៅកម្ពុជាជាង៤០ បានសំដែង “ការខកចិត្តយ៉ាងខ្លាំង” ចំពោះសេចក្តីសម្រេចនេះ ដោយ លើកឡើងថា ប្រទេសឡាវនៅមិនទាន់វាយតម្លៃពីផលប៉ះពាល់ដែលអាចកកើតមាននៅកម្ពុជា ថៃ និងវៀតណាមឲ្យបានត្រឹមត្រូវនៅឡើយទេ ។
លោក ហោ ណាំហុង បានប្រាប់អ្នកយកព័ត៌មានកាលពីម្សិលមិញ បន្ទាប់ពីលោកជួបប្រជុំជាមួយលោក ស៊ុមសាវ៉ាត លេងសាវ៉ាដ នៅក្រសួងការបរទេសថា “ពេលមុន កម្ពុជាក៏ដូចជាប្រទេសដែលនៅក្រោមទន្លេមេគង្គផ្សេងទៀតដែរ មានក្តីព្រួយបារម្ភអំពីការសាងសង់ទំនប់វារីអគ្គិសនីដនសាហុង និងផលប៉ះពាល់របស់វាលើបរិស្ថាន ចរន្តទឹកហូរ និងការបម្លាស់ទីរបស់ត្រី”។
លោកបានបន្ថែមថា លោក ស៊ុមសាវ៉ាត លេងសាវ៉ាដ បានប្រាប់លោកថា ការសិក្សាដោយប្រទេសឡាវបង្ហាញថា ទំនប់វារីអគ្គិ សនីនេះគ្មានផលប៉ះពាល់អវិជ្ជមានណាមួយឡើយ។ ” ប្រទេសឡាវតែងតែនិយាយថា ការសាងសង់ទំនប់វារីអគ្គិសនីនេះគឺស្ថិតនៅក្នុងអធិបតេយ្យភាពរបស់ឡាវ ហេតុដូច្នេះខ្ញុំស្នើសុំឲ្យមានការសិក្សាបន្ថែមរហូតដល់ពេលចាប់ផ្តើមសាងសង់នៅដំណាច់ឆ្នាំ២០១៥នេះ”។
រដ្ឋមន្ត្រីក្រសួងការបរទេសរូបនេះបានបន្ថែមទៀតថា លោកបានសង្កត់ធ្ងន់ចំពោះប្រេសិតរូបនេះ អំពីសារៈសំខាន់នៃទន្លេមេគង្គសម្រាប់ពលរដ្ឋខ្មែរដោយគូសបញ្ជាក់ពីការតភ្ជាប់របស់ទន្លេនេះទៅនឹងទន្លេសាប និងបរិមាណត្រីនៅកម្ពុជា។
លោក តឹក វណ្ណារ៉ា នាយកប្រតិបត្តិវេទិកា នៃអង្គការមិនមែនរដ្ឋាភិបាលបានលើកឡើងថា ការសាងសង់ទំនប់វារីអគ្គិសនីដនសាហុងនេះត្រូវតែផ្អាក រហូតទាល់តែមានការសិក្សាឲ្យបានហ្មត់ចត់ជាមុនសិន។”ប្រទេស ឡាវធ្វើការវាយតម្លៃពីផលប៉ះពាល់បរិស្ថានតែនៅក្នុងតំបន់ជុំវិញទំនប់វារីអគ្គិសនីដនសាហុងតែប៉ុណ្ណោះ។ ពួកគេមិនបានធ្វើការសិក្សាឆ្លងព្រំដែនដែលរួមបញ្ចូលការផ្តល់មតិ យោបល់ពីកម្ពុជា វៀតណាម និងថៃឡើយ។
លោកបានបន្ថែមថា ”យើងចង់សួររដ្ឋមន្ត្រីឡាវថា តើឡាវនឹងដោះស្រាយបញ្ហារបស់ពលរដ្ឋខ្មែរចំនួន៦លានទៅ៧លាននាក់ដែលនឹងរងផលប៉ះពាល់ដោយសារទំនប់នេះដោយរបៀបណា?”៕ ស៊ុយឈាង