គណៈកម្មាធិការជាតិរៀបចំការបោះឆ្នោត (គជប) កាលពីថ្ងៃអង្គារបានបញ្ចេញឲ្យដឹងសេចក្តីលម្អិតថែមទៀតអំពីគម្រោងសាកល្បងរបស់ខ្លួន ដើម្បីសាកល្បងការចុះបញ្ជីអ្នកបោះឆ្នោតតាមប្រព័ន្ធកុំព្យូទ័រតាមខេត្តនីមួយៗ ដែលចាប់ផ្តើមនៅថ្ងៃទី១ខែវិច្ឆិកា មុនការចុះបញ្ជីឈ្មោះទូទាំងប្រទេសនៅឆ្នាំក្រោយ។
យោងតាមសេចក្តីប្រកាសព័ត៌មានពីគជប ដោយយកឃុំសង្កាត់មួយពី២៤ខេត្តរាជធានីនីមួយៗ និងភាពចម្រុះនៃឃុំសង្កាត់ដើម្បីឲ្យលទ្ធផលអាចតំណាងបាន បានឲ្យដឹងថា ប្រជាពលរដ្ឋប្រហែល៣២.៥០០នាក់នឹងត្រូវចុះឈ្មោះមិនផ្លូវការក្នុងការសាកល្បងរយៈពេលពីរសប្តាហ៍។
សេចក្តីប្រកាសព័ត៌មានបានឲ្យដឹងថា ការិយាល័យចុះឈ្មោះអ្នកបោះឆ្នោតនឹងរៀបចំក្នុង៤១ភូមិ។ លោក គុយ ប៊ុនរឿន អនុប្រធានគជប បាននិយាយថា រយៈពេលចុះឈ្មោះសាកល្បង នឹងសាកប្រព័ន្ធថ្មី ដែលនឹងរៀបចំបញ្ជីអ្នកបោះឆ្នោតថ្មីនៅកម្ពុជា។
គណបក្សសង្គ្រោះជាតិបានតវ៉ាទាក់ទិននឹងភាពមិនប្រក្រតីជាច្រើនក្នុងបញ្ជីអ្នកបោះឆ្នោតដែលប្រើក្នុងការបោះឆ្នោតឆ្នាំ២០១៣ ក្នុងនោះមានឈ្មោះរាប់រយរាប់ពាន់ដែលបាត់ ឬចុះឈ្មោះលើសពីរម្តង។ ឥឡូវនេះ គជប កំពុងធ្វើបញ្ជីជាថ្មី ដោយប្រើទិន្នន័យជីវមាត្រ ដូចជារូបថតនិងស្នាមផ្តិតម្រាមដៃជាដើម។
លោក ប៊ុនរឿន បាននិយាយថា “គោលបំណងដំបូងគឺថា យើងចង់អនុវត្តនីតិវិធីរដ្ឋបាល និងចង់ដឹងថាតើ យន្តការរដ្ឋបាលនេះនឹងដើរដោយរលូនឬយ៉ាងណា នៅពេលប្រជាពលរដ្ឋមកចុះឈ្មោះ ទាក់ទិននឹងឯកសារ ការប្រមូលស្នាមផ្តិតម្រាមដៃ ។ល។”។
លោកបានបន្ថែមថា “គោលបំណងទី២ គឺចង់ដឹងថាតើសមត្ថភាពកិច្ចការចុះឈ្មោះដោយប្រើកុំព្យូទ័រល្អ ឬមិនល្អ ទាក់ទិននឹងការគ្រប់គ្រងទិន្នន័យ ការផ្ទៀងផ្ទាត់ឈ្មោះអ្នកបោះឆ្នោត និងការចេញឈ្មោះស្ទួន”។
“សំខាន់នោះ នឹងដឹងថាតើសមត្ថភាពនៃការគ្រប់គ្រងទិន្នន័យខ្លាំងល្មមអាចទប់ស្កាត់អ្នកខាងក្នុង ឬ អ្នកខាងក្រៅ ពីការបំផ្លាញទិន្នន័យចុះឈ្មោះអ្នកបោះឆ្នោតបានឬទេ”។
លោក ប៊ុនរឿន បាននិយាយថា អ្នកដែលបានចុះឈ្មោះក្នុងគម្រោងសាកល្បងនេះ នៅតែត្រូវមកចុះឈ្មោះជាផ្លូវការនៅឆ្នាំក្រោយដដែល។
ពលរដ្ឋកម្ពុជាជាច្រើនមិនមានអត្តសញ្ញាណប័ណ្ណដែលមានសុពលភាព ដែលត្រូវមានសម្រាប់ការចុះឈ្មោះ ប៉ុន្តែលោកបាននិយាយថា ក្រសួងមហាផ្ទៃនាពេលថ្មីៗនេះបានចេញសេចក្តីសម្រេចមួយ ដែលនឹងអនុញ្ញាតឲ្យពលរដ្ឋប្រើអត្តសញ្ញាណប័ណ្ណដែលផុតកំណត់ប្រើប្រាស់ ដើម្បីចុះឈ្មោះបោះឆ្នោត៕ និត