មន្ត្រីនគរបាលម្នាក់បាននិយាយកាលពីម្សិលមិញថា បុរសពីរនាក់ត្រូវបានចាប់ខ្លួនក្នុងខេត្តបាត់ដំបង កាលពីយប់ថ្ងៃអង្គារ បន្ទាប ់ ពីមនុស្សប្រាំនាក់រងរបួស ក្នុងនោះពីរនាក់រងរបួសធ្ងន់ នៅពេលមានការវាយតប់គ្នាក្នុងវត្តអារាមអំឡុងពិធីបុណ្យកាន់បិណ្ឌ។
លោក ស៊ា ធី អធិការនគរបាលស្រុករកាគិរី មានប្រសាសន៍ថា ការវាយតប់គ្នានៅវត្តព្រែកជីក ក្នុងឃុំព្រែកជីក បានកើតឡើងអំឡុងពេលមានការផឹកស៊ីស្រវឹងជោកជាំមួយនាពេលល្ងាចនៅវត្តនេះ ហើយវាកើតឡើងរវាងមនុស្សប្រហែល៦នាក់ និងមនុស្សមួយក្រុមផ្សេងទៀតមានគ្នាប្រាំបីនាក់ប្រដាប់ដោយកាំបិតមកពីស្រុកគាស់ក្រឡជាប់គ្នានោះ។
លោក ធី បានថ្លែងថា ”ជម្លោះនេះចាប់ផ្ដើមឡើងដោយការទាស់ទែងពាក្យសម្ដី ហើយបន្ទាប់មកឈានដល់ការប្រើដំបង និងគប់ដុំថ្មដាក់គ្នា និងមានការប្រើកូនកាំបិតទៀតផង”។
លោកបានបន្ថែមថា មនុស្សពីរនាក់រងរបួសក្បាលធ្ងន់ធ្ងរ ហើយកំពុងសម្រាកព្យាបាលនៅគ្លីនិកឯកជន ចំណែកមនុស្សបីនាក់ទៀតដែលរងរបួសស្រាល ហើយដេកព្យាបាល នៅផ្ទះនោះ បានធូរស្រាលហើយ។
អធិការនគរបាលរូបនេះបានថ្លែងថា បុរសពីរនាក់មកពីក្រុមនៅស្រុកគាស់ក្រឡ ត្រូវបានចាប់ខ្លួនបន្ទាប់ពីការវាយតប់គ្នា ហើយកំពុងឃុំខ្លួននៅប៉ុស្តិ៍នគរបាលនៅឡើយ។ លោកបានបដិសេធមិនប្រាប់ឈ្មោះ បុរសទាំងពីរនាក់នេះទេ៕ សារុន