អង្គភាពប្រឆាំងអំពើពុករលួយបាននិយាយក្នុងរបាយការណ៍មួយដែលទទួលបានកាលពីថ្ងៃអង្គារថា អង្គភាពប្រឆាំងអំពើពុករលួយមិនអាចរកឃើញភ័ស្តុតាងដែលបញ្ជាក់លើការអះអាងដែលថា មន្ត្រីក្រសួងសុខាភិបាលម្នាក់បានទារសំណូក ទើបអនុញ្ញាតឲ្យរថយន្តឆ្លងកាត់ប៉ុស្តិ៍ព្រំដែនអន្តរជាតិបាវិតក្នុងខេត្តស្វាយរៀង។
ចុះកាលបរិច្ឆេទថ្ងៃទី៩ខែតុលា និងបង្ហោះតាមវិបសាយរបស់អង្គភាពប្រឆាំងអំពើពុករលួយ សេចក្តីរាយការណ៍នេះនិយាយថា លោក ង៉ោ សុខា មន្ត្រីក្រសួងសុខាភិបាល បំពេញការងារនៅប៉ុស្តិ៍នោះដើម្បីពិនិត្យការដឹកសត្វចេញចូល បានទទួលរងការចោទប្រកាន់ថាបានទារសំណូកពីរថយន្តក្រុងទេសចរណ៍ និងរថយន្ត កុងតឺន័រ ដែលឆ្លងកាត់ប៉ុស្តិ៍ត្រួតពិនិត្យនេះ។
យោងតាមការចោទប្រកាន់ផ្ញើមកឲ្យអង្គភាពប្រឆាំងអំពើពុករលួយឲ្យដឹងថា លោក សុខា បានទារប្រាក់សរុប២០០ដុល្លារពីរថយន្តទេសចរណ៍ប្រហែល៦០គ្រឿង ដែលបើកកាត់រាល់ថ្ងៃ ៩០ដុល្លារក្នុងចំនួនទេសចរ២.០០០នាក់ដែលឆ្លងកាត់រាល់ថ្ងៃ និង២២០ដុល្លារក្នុងរថយន្តធំ១០០គ្រឿងដែលឆ្លងកាត់មួយថ្ងៃៗ។
របាយការណ៍បន្ថែមថា អង្គភាពប្រឆាំងអំពើពុករលួយមិនបានរកឃើញភ័ស្តុតាងដើម្បីបញ្ជាក់ថាការអះអាងនោះពិតទេ។
លោក ឃុន សំបូរ ប្រធានផ្នែកស៊ើបអង្កេតនៃអង្គភាពប្រឆាំងអំពើពុករលួយបាននិយាយថា អង្គភាពប្រឆាំងអំពើពុករលួយបានរៀបចំការស៊ើបអង្កេតបន្ថែមលើលោក សុខា ប្រសិនបើអ្នកដែលប្តឹង នាំមកនូវភ័ស្តុតាងថ្មី។
លោក សំបូរ បាននិយាយថា “យើងបានបង្ហោះរបាយការណ៍បណ្តឹងតាមវិបសាយអង្គភាពប្រឆាំងអំពើពុករលួយដើម្បីផ្តល់ចម្លើយទៅអ្នកប្តឹងថា យើងមិនអាចរកឃើញកំហុសរបស់លោក សុខា ទេ ប៉ុន្តែប្រសិនបើអ្នកទាំងនោះមិនយល់ស្របជាមួយនឹងការពន្យល់របស់យើង ពួកគេអាចប្តឹងមួយលើកទៀត ប្រសិនបើពួកគេមានភ័ស្តុតាងបន្ថែម”។
លោកបាននិយាយថា “យើងបានទៅតំបន់នោះ និងស៊ើបអង្កេតករណីនេះ ប៉ុន្តែយើងមិនអាចរកឃើញកំហុសរបស់លោក ង៉ោ សុខា ដូចការចោទប្រកាន់ពីអ្នកប្តឹងទេ”។
លោកបានបន្ថែមថា ” អង្គភាពប្រឆាំងអំពើពុករលួយដែលឲ្យចម្លើយ ថាយើងមិនអាចរកឃើញកំហុសលោក សុខា មិនមានន័យថា យើងបដិសេធថាមនុស្សនេះមិនបានប្រព្រឹត្តបទល្មើសនោះទេ។ ប៉ុន្តែយើងមិនទាន់បានរកឃើញកំហុសនៅឡើយ”។
លោក ម៉ៅ ភិនភិរុណ នាយប៉ុស្តិ៍សង្កាត់បាវិត បាននិយាយថា លោកជឿថា លោក សុខា និងមន្ត្រីដែលធ្វើការក្រោមគាត់នៅប៉ុស្តិ៍បាវិត តាមពិត មកពីអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ហើយមិនមែននៅក្រសួងសុខាភិបាលទេ។
ទោះជាយ៉ាងនេះក្តី លោក កែម សារិន ប្រធាននាយកដ្ឋានរដ្ឋបាលនៅអគ្គនាយកដ្ឋានអន្តោប្រវេសន៍ក្រសួងមហាផ្ទៃ បានបដិសេធការអះអាងទាំងនោះ ហើយបាននិយាយថា ក្រុមដែលមានឈ្មោះក្នុងបណ្តឹងទៅអង្គភាពប្រឆាំងអំពើពុករលួយនោះគឺមកពីក្រសួងសុខាភិបាល។
ឧត្តមសេនីយ៍ទោ សារិន បាននិយាយថា លោកបានឮពាក្យចចាមអារា៉មយូរមកហើយអំពីមន្ត្រីក្រសួងសុខាភិបាល ដែលជំរិតទារប្រាក់ពីអ្នកឆ្លងដែន។
លោកបាននិយាយថា “ខ្ញុំក៏ធ្លាប់ឮដែរអំពីរឿងអាស្រូវទាក់ទិននឹងក្រុមអ្នកដែលជំរិតទារប្រាក់ពីអ្នករកស៊ី ពីព្រោះពួកគេតម្រូវឲ្យអ្នកទាំងនោះបង់ប្រាក់បន្ថែមដើម្បីឆ្លងព្រំដែន”។
លោក លី សុវណ្ណ អ្នកនាំពាក្យក្រសួងសុខាភិបាល មិនអាចទាក់ទងបានទេ។
ក្នុងពេលប៉ុន្មានខែថ្មីៗនេះ វិបសាយរបស់អង្គភាពប្រឆាំងអំពើពុករលួយបានធ្វើបច្ចុប្បន្នភាពជារឿយៗ ជាមួយនឹងលិខិតដែលប្រាប់រឿងពុករលួយរបស់មន្ត្រីរដ្ឋាភិបាល ដែលជាធម្មតាអមដោយការឆ្លើយតបពីក្រុមមន្ត្រីដែលបដិសេធការអះអាងទាំងនោះ។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានពន្យល់ថា ដោយធ្វើឲ្យការអះអាងនានាដឹងឮជាសាធារណៈ អង្គភាពនេះសង្ឃឹមថា នឹងទទួលបានភ័ស្តុតាងថែមទៀត ដើម្បីកសាងករណីដែលមិនទាន់ច្បាស់លាស់៕ និត