35 C
Phnom Penh

ជនសង្ស័យដែលវាយលោកមេឃុំ កំពុងរត់គេចខ្លួន ហើយម្នាក់ទៀត ត្រូវបានចោទប្រកាន់

ដោយ ឌឹ ខេមបូឌា ដេលី

បទវិភាគ

នគរ​បាល​ខេត្ត​ស្វាយ​រៀង​បាន​និយាយ​កាល​ពី​ម្សិល​មិញ​ថា ពួកគេ​កំពុង​ស្វែង​រកបុរស​ម្នាក់​​ក្នុង​ចំណោម​ពីរនាក់​ដែល​ជាប់​សង្ស័យ​ក្នុង​ការ​វាយ​ប្រហារ​ដ៏ហិង្សា​មួយ​​លើ​​លោក​មេឃុំ​វ័យ​ចំណាស់​ម្នាក់​​ ដែល​កើត​ចេញពី​​​ជម្លោះ​​ដោយ​ការ​ផឹកស៊ី​​ស្រវឹង​​កាលពី​ថ្ងៃ​សៅរ៍។​​​

​លោក ពិន អាន ​​អធិការ​នគរ​បាលស្រុក​​ស្វាយជ្រុំ បាន​មាន​ប្រសាសន៍​ថា ​រស់ ចាន់ដន ​ត្រូវ​​ជា​ចៅ​របស់​លោក ហែម វ៉ែន អាយុ​៧១​ឆ្នាំ ជា​មេឃុំ​តាសួសបាន​ផឹក​ស៊ី​នៅ​ផ្ទះមិត្ត​ភក្ដិ​ម្នាក់​កាលពី​យប់​ថ្ងៃ​សៅរ៍ ស្រាប់​តែ​ពេល​នោះ​បាន​​​ទាស់​ពាក្យ​សម្ដី​គ្នា​​ជាមួយ​ភ្ញៀវ​ពីរ​នាក់​ទៀត​ឈ្មោះ អុិន ម៉េន អាយុ​២២​ឆ្នាំ និង​ អុិន ម៉ន អាយុ​២៥​ឆ្នាំ ជា​បង​ប្អូន​បង្កើត។

​អធិការ​នគរ​បាល​រូប​នេះ​បាន​ថ្លែង​ថា លោក​មិន​ដឹង​ថាមូល​ហេតុ​អ្វី​បណ្ដាល​​ឲ្យ​មាន​ជម្លោះ​​​នេះ ដែល​បណ្ដាល​ឲ្យ​​ អុិន ម៉េន យក​ដំបង​ឫស្សី​វាយទៅលើ​ ចាន់ដន ​នោះ​ទេ ​ហើយ​​បន្ទាប់​មក​បង​ប្អូន​បង្កើត​ទាំង​ពីរ​នាក់​នេះ​បាន​ជិះ​ម៉ូតូ​ទៅ​ផ្ទះ​បាត់​។

​​លោក​បាន​ថ្លែង​ថា “បន្ទាប់​មក ​ចាន់​ដន បាន​​ទូរស័ព្ទ​ទៅ​ម្ដាយ​របស់​ខ្លួន​ប្រាប់​អំពី​ការ​វាយ​ប្រហារ​​នេះ ហើយ​បន្ទាប់​មក​​ម្ដាយ​របស់​ខ្លួន​បាន​ទូរស័ព្ទ​ទៅ​ឪពុក​របស់​អ្នកស្រី​ គឺ​លោក​មេ​ឃុំ​រូប​នេះ ដោយ​ប្រាប់​គាត់​ថា ចៅ​​ប្រុស​​របស់​គាត់​​​ត្រូវ​គេវាយ​”។

លោក​បាន​បន្ថែម​ថា “​ពេល​នោះ លោក ហែម វ៉ែន ​បាន​ទូរស័ព្ទ​ទៅ​នគរ​បាល​ឃុំ​​ ​សុំ​​ឲ្យ​ពួក​គេ​នាំ​​ អុិន ម៉េន និង​ អុិន ម៉ន ទៅ​ប៉ុស្តិ៍​នគរ​បាល​។ ប៉ុន្តែ​នគរ​បាល​​​ជាប់​រវល់​ល្បាត​ ដូច្នេះ​​មេ​ឃុំ​រូប​នេះ​បាន​សុំ​​ឲ្យ​ ឡូវ វីរៈ ត្រូវ​ជា​ប្អូន​ថ្លៃ​របស់​ខ្លួន​​ទៅ​ផ្ទះ​​របស់​ អុិន ម៉ន និង​ អុិន ម៉េន
ជា​មួយ​គាត់​”។

​អធិការ​នគរ​បាល​រូប​នេះ​បាន​ថ្លែង​ថា នៅ​ពេល​​ពួកគាត់​ទាំង​ពីរ​មក​ដល់​ផ្ទះ​របស់​​​​បង​ប្អូន​ប្រុស​​បង្កើត​​នោះ ​លោក​ វីរៈ ​បាន​ដាល់​ អុិន ម៉េន ​បណ្ដាល​ឲ្យ អុិន ម៉ន យកដំបង​ឫស្សី​វាយ​ទៅ​លើ​លោក​ វីរៈ និង​លោក វ៉ែន តែម្តង​។

លោក ពិន អាន បាន​មាន​ប្រសាសន៍​ថា ​មេឃុំ​រូប​នេះ​រង​របួស​ស្រាំ​​លលាដ៍​ក្បាល និង​បាក់​ថ្គាម ​ហើយ​ត្រូវ​បាន​បញ្ជូន​ទៅ​ព្យាបាល​នៅ​ប្រទេស​វៀតណាម​​។ លោក​បាន​ថ្លែង​ថា ​អុិន ម៉េន ត្រូវ​បាន​ចាប់​ខ្លួន​នៅ​យប់​នោះ ប៉ុន្តែ អុិន ម៉ន បាន​រត់​គេច​ខ្លួន​។

លោក ប៉ែន មុនី ​នាយ​រង​​ការិយាល័យនគរបាល​ព្រហ្មទណ្ឌ​​​ខេត្ត​បាន​មាន​ប្រសាសន៍​ថា ​​​អុិន ម៉េន ត្រូវ​បាន​បញ្ជូន​ទៅ​​​សាលា​ដំបូង​ខេត្ត​​កាល​ពី​ថ្ងៃ​អាទិត្យ។

លោក​បានថ្លែងថា “​តុលាការ​​បាន​ចោទ​ប្រកាន់ អុិន ម៉េន ពីបទ​ប្រើ​អំពើ​ហិង្សា​ដោយ​ចេតនា​ដោយមាន​ស្ថានទម្ងន់ទោស​”។

​ក្រុម​មន្ត្រី​តុលាការ​មិន​អាច​ទាក់​ទង​​សុំ​ការ​បញ្ជាក់​ពី​ការ​ចោទ​ប្រកាន់​នេះ​បាន​​ទេ៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស