លោក សម រង្ស៊ី មេដឹកនាំបក្សប្រឆាំង បានបដិសេធកាលពីថ្ងៃពុធថា លោកគ្មានគម្រោងជួបជាមួយសម្តេចក្រុមព្រះ នរោត្តម រណឫទិ្ធ ដើម្បីពិភាក្សាអំពីការចូលរួមគណបក្សសង្គ្រោះជាតិជាមួយគណបក្សហ៊្វុនស៊ិនប៉ិចតទល់នឹងគណបក្សប្រជាជនកម្ពុជា មុនការបោះឆ្នោតជាតិឆ្នាំ២០១៨ទេ។
វិទ្យុអាស៊ីសេរីរាយការណ៍សប្តាហ៍នេះថា មេដឹកនាំនៃបក្សទាំងពីរនឹងជួបគ្នានៅខែនេះ ដើម្បីពិភាក្សាគ្នាអំពីការចូលរួមគ្នា។
ក្នុងការបង្ហោះតាមហ្វេសប៊ុក លោក រង្ស៊ី ដែលតំណាងសម្តេចក្រុមព្រះនៅអ៊ឺរ៉ុបនាទសវត្សរ៍ឆ្នាំ១៩៨០ ប៉ុន្តែបានបែកបាក់គ្នាជាមួយព្រះអង្គ បានមានប្រសាសន៍ថា មិនមានគម្រោងបែបនេះទេ។
លោក រង្ស៊ី បានសរសេរថា “ពាក្យចចាមអារ៉ាមថា CNRP គិតជួបជាមួយ FUNCINPEC នោះ មិនពិតទេ! គណបក្សសង្គ្រោះជាតិ ជាក្តីសង្ឃឹមតែមួយគត់សម្រាប់ប្រជារាស្ត្រខ្មែរ។ យើងមិនទៅចំណាយពេលក្នុងរឿងឥតប្រយោជន៍ទេ”។
ទាក់ទងតាមទូរស័ព្ទនៅអ៊ឺរ៉ុប ប្រពន្ធលោក រង្ស៊ី គឺលោកស្រី ជូឡុង សូមួរ៉ា បានមានប្រសាសន៍ថា ប្តីរបស់លោកស្រីមិនមានពាក្យអ្វីត្រូវនិយាយបន្ថែមទេ។
លោក រង្ស៊ី បានធ្វើជារដ្ឋមន្ត្រីក្រសួងហិរញ្ញវត្ថុរបស់សម្តេចក្រុមព្រះពីឆ្នាំ១៩៩៣ដល់ឆ្នាំ១៩៩៤ មុននឹងលោកត្រូវបានគេបណ្តេញចេញពីសភា។
បន្ទាប់ពីបង្កើតគណបក្សផ្ទាល់ខ្លួន លោក រង្ស៊ី បានចងសម្ពន្ធភាពជាមួយសម្តេចក្រុមព្រះដើម្បីតទល់នឹងគណបក្សប្រជាជនកម្ពុជាក្នុងការបោះឆ្នោតនាឆ្នាំ១៩៩៨ និងឆ្នាំ២០០៣ ប៉ុន្តែទីបញ្ចប់ សម្តេចក្រុមព្រះបានចូលរួមជាមួយគណបក្សប្រជាជនកម្ពុជាក្នុងរដ្ឋាភិបាលទាំងពីរលើក៕