បុរសបីនាក់ត្រូវបានចាប់ខ្លួននៅក្នុងខេត្តកំពង់ស្ពឺកាលពីថ្ងៃពុធពីបទជាប់ពាក់ព័ន្ធការសម្លាប់លោក លី សេងលីម ជាម្ចាស់ចម្ការដែលជនសង្ស័យទាំងនេះបានធ្វើការ។ ទោះយ៉ាងណា នគរបាលមិនទាន់រកឃើញមូលហេតុនៃការសម្លាប់នេះនៅឡើយទេ។
លោក ប៊ុត ប៊ុនធឿន អធិការនគរបាលស្រុកឱរ៉ាល់បានមានប្រសាសន៍ថា អ្នកភូមិបានប្រទះឃើញសាកសពលោក លី សេងលីម អាយុ៦៣ឆ្នាំប្រឡាក់សុទ្ធតែឈាមនៅក្នុងចម្ការមួយទំហំ១០ហិកតា ចម្ងាយប្រហែល១០ម៉ែត្រពីផ្ទះរបស់គាត់ស្ថិតក្នុងឃុំរស្មីសាមគ្គី ទីដែលគាត់ដាំល្ង សណ្ដែក និងពោត។
លោកបានថ្លែងថា “នៅម៉ោងប្រហែល៧ព្រឹកថ្ងៃម្សិលមិញ អ្នកភូមិបានប្រទះឃើញសាកសពជនរងគ្រោះរូបនេះនៅចម្ការពោតរបស់គាត់…ហើយក៏បានរាយការណ៍ទៅនគរបាលមូលដ្ឋាន”។
លោក ប៊ុនធឿន បានថ្លែងថា ដោយសារសាកសពឡើងរឹងទៅហើយនៅពេលត្រូវបានរកឃើញនោះ ក្រុមស៊ើបអង្កេតជឿថា លោក លី សេងលីម បានស្លាប់តាំងពីយប់ថ្ងៃអង្គារមកម្លេ៉ះ។ លោកបានបន្ថែមថា ជនរងគ្រោះត្រូវវាយនឹងវត្ថុរឹងជាច្រើនដងត្រង់ខ្នង ហើយត្រូវជនដៃដល់អារកទៀត។
លោក អៀម ចន្ថា អធិការរងនគរបាលស្រុកបានប្រាប់អត្តសញ្ញាណជនសង្ស័យទាំងនោះថា ឈ្មោះ ស្វាយ ជា អាយុ៥៦ឆ្នាំ សាក់ ចាន់ អាយុ៣៥ឆ្នាំ និង ទៀង ចិត្រ អាយុ៣០ឆ្នាំ ហើយលោកបានលើកឡើងថា ពួកគេត្រូវបានចាប់ខ្លួននៅចន្លោះម៉ោង៤និង៥ល្ងាចថ្ងៃពុធ។
លោក ចន្ថា បានថ្លែងថា ជនសង្ស័យទាំងនេះបានប្រាប់នគរបាលថា លោក លី សេងលីម បានផឹកស៊ីជាមួយកម្មករបីនាក់នៅរោងចាំចម្ការកាលពីល្ងាចថ្ងៃអង្គារ ហើយបានចាកចេញទៅមុនដោយមិនបានត្រឡប់មកផ្ទះវិញឡើយ។
លោកបានថ្លែងថា “ខ្ញុំសង្ស័យថា ករណីនេះពាក់ព័ន្ធការសងសឹក” ដោយបន្ថែមថា កម្មករទាំងនេះប្រហែលជាខឹងនឹងការដែលចៅហ្វាយរបស់ខ្លួនមិនបើកលុយឲ្យពួកគេខ្លះមុនសម្រាប់ពិធីបុណ្យភ្ជុំបិណ្ឌដែលបានបញ្ចប់កាលពីថ្ងៃអង្គារ។
លោក អាន យុទ្ធហុង អធិការរងនគរបាលស្រុកមួយរូបទៀតដែលបានដឹកនាំការស៊ើបអង្កេតដល់កន្លែងកើតហេតុបានមានប្រសាសន៍ថា បច្ចុប្បន្នជនសង្ស័យទាំងនេះត្រូវបានឃុំខ្លួននៅអធិការដ្ឋាននគរបាលស្រុកដើម្បីធ្វើការសាកសួរ។
លោកបានថ្លែងថា “គ្មានជនណាម្នាក់បានសារភាពនៅឡើយទេ ដូច្នេះយើងកំពុងសាកសួរពួកគេនៅឡើយ។ ខ្ញុំមិនដឹងថាតើអំពើមនុស្សឃាតនេះពាក់ព័ន្ធការសងសឹក ឬអំពើប្លន់ឡើយ។ យើងកំពុងធ្វើការស៊ើបអង្កេតនៅឡើយ”។
លោក យុទ្ធហុង បានថ្លែងថា ទូរស័ព្ទដៃពីរគ្រឿងរបស់លោក លី សេងលីម បានបាត់ បន្ទាប់ពីសម្លាប់រួច ប៉ុន្តែថា ជនរងគ្រោះនៅមាននាឡិកាពណ៌មាសក្លែងក្លាយមួយគ្រឿងទៀតពាក់ជាប់កដៃឆ្វេងនៅឡើយនៅពេលអ្នកភូមិបានប្រទះឃើញសាកសព។
លោកបានថ្លែងថា ក្រុមគ្រួសារជនរងគ្រោះ និងអ្នកជិតខាងបានប្រាប់នគរបាលថា កាលពីពេលថ្មីៗនេះ គាត់បានចោទបុរសឈ្មោះ ជា ជាជនសង្ស័យម្នាក់ក្នុងចំណោមជនសង្ស័យទាំងបីនាក់ថា មិនបានយាមនៅខ្ទមចាំចម្ការនេះឲ្យត្រឹមត្រូវឡើយ ដោយបណ្ដាលឲ្យមានជម្លោះកើតឡើងរវាងអ្នកទាំងពីរ។
លោកបានបន្ថែមថា “យើងមានការលំបាកក្នុងការស៊ើបអង្កេតករណីនេះណាស់ ពីព្រោះមិនមានវត្ថុតាងបន្សល់ទុកនៅកន្លែងកើតហេតុឡើយ”៕ សារុន