យោងតាមវិបសាយប៉ូលិសកាលពីថ្ងៃពុធឲ្យដឹងថា កម្លាំងនគរបាលចំនួន២០០នាក់ កំពុងទទួលបានការហ្វឹកហាត់ជាមួយកងពលតូចទ័ពពិសេសឆត្រយោង៩១១ ដើម្បីក្លាយជាកម្លាំងអន្តរាគមន៍ពិសេស។
សេចក្តីរាយការណ៍ព័ត៌មានបានដកស្រង់សម្តីអ្នកនាំពាក្យនគរបាលជាតិ លោក គៀត ចន្ទថារិទ្ធ ដោយនិយាយថា “ការហាត់រៀនជំនាញក្នុងជួរកម្លាំងនគរបាល គឺធ្វើឡើងដើម្បីកាត់បន្ថយការបង្ហូរឈាមនៅពេលចុះប្រតិបត្តិការ”។
សេចក្តីរាយការណ៍ព័ត៌មានបាននិយាយថា មន្ត្រីនគរបាលណាដែលចូលរួមការហ្វឹកហាត់ទៀងទាត់កាលពីពីរខែកន្លងមកនេះ បានទទួលការហ្វឹកហាត់បាញ់ស៊ីប និងហាត់ប្រើបច្ចេកទេសអាវុធថ្មើរជើង។
យោងតាមសេចក្តីរាយការណ៍ព័ត៌មានឲ្យដឹងថា កម្លាំងអន្តរាគមន៍ពិសេស នឹងត្រូវប្រើដើម្បីទប់ស្កាត់”សភាពការណ៍អាក្រក់របស់ពួកអមិត្ត និងពួកមាននិន្នាការប្រឆាំងធ្វើសកម្មភាព”។
កងពលតូចទ័ពពិសេសឆត្រយោង៩១១ បានក្លាយជាគោលដៅរិះគន់ពីសំណាក់ក្រុមសិទ្ធិមនុស្ស។
កាលពីខែមករា ឆ្នាំមុន កម្លាំងកងពលតូចទ័ពពិសេស បានចូលរួមក្នុងការបង្ក្រាបដោយបង្ហូរឈាមទៅលើបាតុកម្មកម្មកររោងចក្រក្នុងក្រុងភ្នំពេញ។
លោក ប្រេដ អាដាម នាយកអង្គការឃ្លាំមើលសិទ្ធិមនុស្សផ្នែកអាស៊ី បាននិយាយនៅពេលនោះថា “ប្រាកដណាស់ថា កងពលតូច៩១១…បានរំលោភសិទ្ធិមនុស្សយ៉ាងធ្ងន់ នៅពេលពួកគេបានបំបែកការតវ៉ារបស់កម្មកររោងចក្រ”៕