មន្ត្រីជាន់ខ្ពស់មួយរូបបាននិយាយថា លោកនាយករដ្ឋមន្ត្រី ហ៊ុន សែន បានជួបជាមួយប្រធានាធិបតីចិនលោក ស៊ី ជីន ពីង នៅក្រុងប៉េកាំងកាលពីថ្ងៃព្រហស្បតិ៍ ដើម្បីទទួលជំនួយឥតសំណងជាង១៥០លានដុល្លារ ដែលភាគច្រើននឹងចំណាយទៅលើសំណង់កីឡដ្ឋានដ៏ធំមួយក្នុងក្រុងភ្នំពេញ។
យោងតាមការបង្ហោះលើទំព័រហ្វេសប៊ុករបស់នាយករដ្ឋមន្ត្រីបានឲ្យដឹងថា លោក ហ៊ុន សែន បានទៅដល់ប្រទេសចិនកាលពីថ្ងៃច័ន្ទ ដើម្បីចូលរួមសន្និសីទស្ដីពីវិស័យការពារ ពាណិជ្ជកម្ម និងទេសចរណ៍ ហើយកាលពីថ្ងៃព្រហស្បតិ៍បានចូលរួមជាមួយលោក ស៊ី ជាអធិបតីក្នុងពិធីចុះហត្ថលេខាលើកិច្ចព្រមព្រៀងមួយចំនួនរវាងប្រទេសទាំងពីរ។
ការបង្ហោះនោះបានឲ្យដឹងថា នៅក្នុងព្រឹត្តិការណ៍នោះ ប្រទេសចិនបានសន្យានាំចូលអង្ករ១០០.០០០តោនពីប្រទេសកម្ពុជារាល់ឆ្នាំ ដោយចាប់ផ្ដើមនៅឆ្នាំ២០១៦ទៅ សាងសង់មន្ទីរពេទ្យមួយកន្លែងក្នុងខេត្តត្បូងឃ្មុំ និងផ្ដល់ឲ្យប្រទេសកម្ពុជា១.០០០លានយាន់ (ប្រហែល១៥៧លានដុល្លារ) ជាជំនួយឥតសំណង។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បាននិយាយកាលពីថ្ងៃសុក្រថា ជំនួយជិត១០០លានដុល្លារនឹងត្រូវប្រើក្នុងការចំណាយលើដំណាក់កាលទី២នៃសំណង់កីឡដ្ឋានជាតិមរតកតេជោ ក្នុងនោះមានទាំងកីឡដ្ឋានធំផង។
ដោយត្រូវទទួលរៀបចំស៊ីហ្គេមឆ្នាំ២០២៣ រដ្ឋាភិបាលបានចាប់ផ្ដើមការសាងសង់បរិវេណកីឡាដ៏ធំលើផ្ទៃដីទំហំ៨៥ហិកតានៅជ្រោយចង្វា ក្នុងក្រុងភ្នំពេញ កាលពីឆ្នាំ២០១៣ ក្នុងតម្លៃទឹកប្រាក់ប្រហែល៣៩លានដុល្លារ។
លោក ចំរើន បាននិយាយថា នៅពេលដែលក្រុមហ៊ុនមួយដែលជារបស់លោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា ត្រូវបានជ្រើសរើសឲ្យអនុវត្តដំណាក់កាលទី១នៃសំណង់ ដែលគេរំពឹងថានឹងបញ្ចប់នៅឆ្នាំ២០១៦នោះ ដំណាក់កាលទី២ដ៏មានមហិច្ឆតានឹងត្រូវអនុវត្តដោយក្រុមហ៊ុនសំណង់ចិន ដែលជ្រើសរើសដោយប្រទេសចិន។
លោកបាននិយាយថា “វាមិនត្រឹមតែជាកីឡដ្ឋានមួយប៉ុណ្ណោះទេ ប៉ុន្តែក៏ជាកន្លែងកម្សាន្តដ៏ជាទីចាប់អារម្មណ៍ផងដែរ ដោយមានប្រឡាយទឹកជុំវិញវាដូចអង្គរវត្តអ៊ីចឹង”។
ក្នុងព្រឹត្តិការណ៍ដោយឡែកមួយនៅភ្នំពេញកាលពីថ្ងៃសុក្រ ឯកអគ្គរដ្ឋទូតរបស់ប្រទេសចិនប្រចាំប្រទេសកម្ពុជាលោកស្រី ប៊ូ ជាំងគូ (Bu Jianguo) បានប្រគល់សម្ភារការិយាល័យដែលមានតម្លៃជាទឹកប្រាក់ប្រហែល១២៦.០០០ដុល្លារដល់ក្រសួងការបរទេសតាងនាមឲ្យរដ្ឋាភិបាលរបស់លោកស្រី។
ក្រោយពីការថ្លែងអំណរគុណលោកស្រី ប៊ូ ចំពោះអំណោយ ដែលក្នុងនោះមានកុំព្យូទ័រលើតុ និងកុំព្យូទ័រយួរដៃ ម៉ាស៊ីនព្រីនឡេស័រ និងម៉ាស៊ីនថតចម្លងផង លោក ហោ ណាំហុង បានលើកឡើងពីភាពពឹងផ្អែកផ្នែកហិរញ្ញវត្ថុរបស់ប្រទេសកម្ពុជាទៅលើប្រទេសចិន។
លោកបានមានប្រសាសន៍ថា “សេដ្ឋកិច្ចកម្ពុជាមិនអាចកាត់ផ្ដាច់ពីជំនួយរបស់ប្រជាជនចិន និងរដ្ឋាភិបាលចិនបានឡើយ”៕ និត