មន្ត្រីបូ៉លិស និងសមាជិកបក្សបាននិយាយថា ដោយមានកំហឹងព្រោះតែគ្មានការចែកអំណោយពីសំណាក់គណបក្សសង្គ្រោះជាតិ អ្នកភូមិប្រហែល១៥នាក់ក្នុងខេត្តឧត្តរមានជ័យ បានដុតស្លាកសញ្ញាគណបក្សប្រឆាំងពេលតវ៉ាកាលពីព្រឹកថ្ងៃសុក្រ។
ការតវ៉ាបានដឹកនាំដោយលោក កែម កុសល ជាអតីតសកម្មជនគណបក្សសង្គ្រោះជាតិ ដែលបានដឹកនាំសមាជិកបក្សចំនួន៥៦៤នាក់ក្នុងខេត្តឧត្តរមានជ័យចុះចូលនឹងគណបក្សប្រជាជនកម្ពុជាកាន់អំណាចកាលពីខែសីហា។ នាពេលថ្មីៗនេះ លោក កុសលបានដឹកនាំការតវ៉ាប្រឆាំងនឹងលោក សម រង្ស៊ី ប្រធានគណបក្សសង្គ្រោះជាតិ ក្នុងពេលដែលលោកធ្វើទស្សនកិច្ចមកខេត្តនេះកាលពីសប្តាហ៍មុន។
ក្នុងការតវ៉ាប្រឆាំងនឹងគណបក្សប្រឆាំងនៅថ្ងៃសុក្រនេះ សមាជិកគណបក្សប្រជាជនកម្ពុជាថ្មីថ្មោងរូបនេះ បានដឹកនាំអ្នកភូមិប្រហែល១៥នាក់តវ៉ាក្នុងក្រុងសំរោង ដោយប្រមូលផ្តុំគ្នានៅលើដីអ្នកភូមិម្នាក់ឈ្មោះ ជុំ យ៉ាន់ អាយុ៦៣ឆ្នាំ ដែលមានស្លាកសញ្ញាគណបក្សសង្គ្រោះជាតិបោះនៅទីនោះអស់រយៈពេល៥ឆ្នាំមកហើយ។
យោងតាមវីដេអូឃ្លីបបង្ហោះនៅលើវិបសាយ Fresh News ឲ្យដឹងថា បន្ទាប់ពីអ្នកស្រី យ៉ាន់ និងលោក កុសលរិះគន់គណបក្សប្រឆាំងថាមិនបានផ្តល់ប្រាក់កាស ឬអំណោយដល់អ្នកភូមិនោះ អ្នកភូមិដែលបានមកជួបជុំគ្នាក៏បាននាំគ្នារុញស្លាកសញ្ញាផ្តួល បន្ទាប់មកកេះដែកកេះដុតឆេះទ្រលោម ហើយក៏នាំគ្នាឈរមើលតែម្តង។
លោក សូ សាន អធិការក្រុងសំរោង បាននិយាយថា “នៅម៉ោងប្រហែល១០ព្រឹកថ្ងៃសុក្រ អ្នកភូមិបានរុញផ្តួលស្លាកសញ្ញាគណបក្សសង្គ្រោះជាតិ ហើយក៏ដុតចោលតែម្តង ដោយចោទគណបក្សសង្គ្រោះជាតិថាមិនគោរពពួកគេ ឬមិនផ្តល់អំណោយអស់រយៈពេល៥ឆ្នាំមកហើយ”។
លោក សាន បាននិយាយថា លោក និងមន្ត្រីនគរបាលលោក មិនបានចូលទៅការពារកន្លែងតវ៉ាទេ ពីព្រោះមិនចង់ឲ្យមានការចោទប្រកាន់ថា ប៉ូលិសចូលរួមក្នុងរឿងនោះ។ អធិការក្រុងរូបនេះ បាននិយាយថា លោកមិនច្បាស់ថាតើអ្នកតវ៉ាបានប្រព្រឹត្តល្មើសឬយ៉ាងណាទេ។
អធិការក្រុងរូបនេះបាននិយាយថា “យើងមិនអាចទទួលបណ្តឹងបានទេ ពីព្រោះនេះជារឿងស៊ីវិល ដូច្នេះគេ [គណបក្សសង្គ្រោះជាតិ]ត្រូវប្តឹងទៅតុលាការផ្ទាល់។ ខ្ញុំមិនដឹងថាតើមានច្បាប់ផ្តន្ទាទោសអ្នកដុតឬយ៉ាងណាទេ”។
ទោះជាយ៉ាងនេះក្តី លោក គិញ វណ្ណៈ ប្រធានប្រតិបត្តិស្តីទីនៃគណកម្មការគណបក្សសង្គ្រោះជាតិប្រចាំខេត្តឧត្តរមានជ័យ បាននិយាយថា គណបក្សនឹងដាក់ពាក្យប្តឹងទៅប៉ូលិស។ លោក វណ្ណៈ បាននិយាយថា លោកជឿថា គំនិតដុតស្លាកសញ្ញាមិនមែនចេញពីអ្នកភូមិទេ ប៉ុន្តែញុះញង់ដោយ”គណបក្សខ្លះ”។
លោក វណ្ណៈ បាននិយាយថា “ប្រសិនបើអ្នកភូមិមិនសប្បាយចិត្ត ឬមិនចង់ទុកស្លាកសញ្ញានៅពីមុខផ្ទះរបស់គេ គេអាចសុំឲ្យយើងរើចេញបាន”។
លោក កុសល អតីតសកម្មជន បាននិយាយថា អ្នកស្រី យ៉ាន់ បានទាក់ទងរូបលោក ព្រោះមានគំនិតដុតស្លាកសញ្ញា ចំណែកឯអ្នកតវ៉ាក៏ខឹងដែរ ព្រោះថាគណបក្សសង្គ្រោះជាតិមិនដែលបានផ្តល់អ្វីដល់ពួកគេសោះ។
លោក កុសល បាននិយាយថា “គាត់គ្មានជំនឿលើគណបក្សសង្គ្រោះជាតិទៀតទេ។ គាត់គាំទ្រពួកគេ ប៉ុន្តែគេមិនដែលឲ្យអ្វីដល់គាត់សោះ។ ប្រសិនបើមិនដុតចោលទេ សម រង្ស៊ី ឬគណបក្សសង្គ្រោះជាតិនឹងបន្តកុហកអ្នកភូមិរហូត”។
ក្នុងវីដេអូ Fresh News គេឃើញអ្នកស្រី យ៉ាន់ ប្រាប់អ្នកសួរសំណួរថា “តាំងពីខ្ញុំដាក់ស្លាកគណបក្សសង្គ្រោះជាតិចំនួន៥ឆ្នាំហើយ ខ្ញុំមិនដែលទទួលអំណោយបន្តិចសោះ សូម្បីតែចាស់ជរាប៉ុណ្ណេះ ក៏មិនដែលបាន។ ខ្ញុំគិតដល់អនាគតចៅៗខ្ញុំដែលនៅក្រោយ។ បានជាខ្ញុំកើតទុក្ខមិនសុខចិត្ត ឲ្យដកស្លាកសញ្ញាចេញ”៕ រើន