នគរបាលកម្ពុជាបាននិយាយកាលពីម្សិលមិញថា ជនប្រព្រឹត្តបទល្មើសផ្លូវភេទដែលនគរបាលអង់គ្លេសតាមចាប់ខ្លួន ក្រោយពេលរត់គេចពីប្រទេសអង់គ្លេសកាលពីឆ្នាំ២០១០ បន្ទាប់ពីអនុវត្តទោសជាប់ពន្ធនាគារ៣ឆ្នាំពីបទថតរូបភាពអាសអាភាសកុមារនោះ ត្រូវបានចាប់ខ្លួននៅផ្ទះជួលរបស់គាត់ស្ថិតក្នុងរាជធានីភ្នំពេញកាលពីព្រឹកថ្ងៃសៅរ៍ ហើយកំពុងប្រឈមការនិរទេសខ្លួន។
លោក អ៊ុក ហៃសិលា ប្រធានផ្នែកស៊ើបអង្កេតនៅនាយកដ្ឋានអន្តោប្រវេសន៍ក្រសួង មហាផ្ទៃ បានមានប្រសាសន៍ថា ផូល អែតវើដ ប្រេសធីច (Paul Edward Prestidge) អាយុ៣៥ឆ្នាំ ត្រូវបានចាប់ខ្លួននៅម៉ោង១១ព្រឹក ក្នុងសង្កាត់ក្រាំងធ្នង់ ខណ្ឌពោធិ៍សែនជ័យ។
យោងតាមឧត្ដមសេនីយ៍ទោ ហៃសិលា បានឲ្យដឹងថា ជនរួមភេទជាមួយកុមារជាប់ទោសរូបនេះដែលកំពុងឃុំខ្លួននៅនាយកដ្ឋានអន្តោប្រវេសន៍ បានមកកាន់ប្រទេសកម្ពុជាកាលពីខែកក្កដា ឆ្នាំ២០១៤ ហើយបានធ្វើជាគ្រូបង្រៀនភាសាអង់គ្លេស និងគណិតវិទ្យា ហើយថ្មីៗនេះភាគច្រើនបង្រៀន នៅសាលាអន្តរជាតិក្ដីសង្ឃឹម។
លោកបានថ្លែងថា “យើងបានចាប់ខ្លួនជននេះផ្អែកតាមសំណើរបស់ស្ថានទូតអង់គ្លេសទាក់ទិននឹងការរួមភេទជាមួយក្មេងប្រុសជាច្រើននាក់។ គាត់គឺជាជនល្មើសដែលបានគេចខ្លួនពីប្រទេសអង់គ្លេស”។
ឧត្ដមសេនីយ៍ទោ ហៃសិលា បានមានប្រសាសន៍បន្តថា ស្ថានទូតអង់គ្លេសបានជូនដំណឹងមកនគរបាលអន្តោប្រវេសន៍កាលពីខែកញ្ញាថា ប្រេសធីច ដែលបានរំលោភលក្ខខណ្ឌនៃការដោះលែងពីពន្ធនាគារនោះស្ថិត ក្នុងប្រទេសកម្ពុជា ប៉ុន្តែថា នគរបាលមិនអាចរកគាត់ឃើញឡើយរហូតដល់សប្ដាហ៍មុន។
លោកបានថ្លែងថា “វាជាហានិភ័យចំពោះកុមារកម្ពុជា ប្រសិនបើយើងអនុញ្ញាតឲ្យជននេះនៅក្នុងប្រទេសកម្ពុជា។ ឥឡូវនេះយើង កំពុងធ្វើលិខិតស្នើទៅ[លោក ស ខេង រដ្ឋមន្ត្រីក្រសួងមហាផ្ទៃ] ឲ្យនិរទេសជននេះ”។
លោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញបានមានប្រសាសន៍ថា នគរបាលរកមិនឃើញភ័ស្តុតាងណាមួយដែលបង្ហាញថា ប្រេសធីច បានប្រព្រឹត្តបទល្មើសលើកុមារនៅក្នុងប្រទេសកម្ពុជាឡើយ។
យោងតាមសេចក្តីរាយការណ៍របស់ទីភ្នាក់ងារសារព័ត៌មាន BBC បានឲ្យដឹងថា កាលពីឆ្នាំ២០០៧ ប្រេសធីច ត្រូវបានផ្ដន្ទាទោសឲ្យជាប់ពន្ធនាគារ៣ឆ្នាំ បន្ទាប់ពីត្រូវបានរកឃើញពិរុទ្ធភាពពីបទថតរូប និងមានរូបអាសអាភាសក្មេងប្រុសអាយុ៩ឆ្នាំដល់១០ឆ្នាំជាច្រើននាក់ នៅក្នុងក្រុមកាយឫទ្ធិរបស់គាត់ ខណៈដែលគាត់ជាប្រធានក្រុមកាយ ឫទ្ធិក្នុងទីក្រុងភ្លីម៉ាស (Plymouth) ប្រទេសអង់គ្លេស។
យោងតាមសេចក្តីរាយការណ៍របស់ទីភ្នាក់ងារសារព័ត៌មាន BBC ដដែលនេះបានឲ្យដឹងទៀតថា អំឡុងសវនាការជំនុំជម្រះ តុលាការ Exeter Crown ត្រូវបានប្រាប់ថា ជននេះបានជំរុញឲ្យក្មេងប្រុសជាច្រើននាក់ដោះសម្លៀកបំពាក់របស់ពួកគេចេញទាំងអស់ តាមរយៈការបង្កើតហ្គេមមួយឈ្មោះថា “Sahara” ដែលក្នុងនោះគាត់បានធ្វើឲ្យពួកគេហាក់ដូចជានៅក្នុងវាលខ្សាច់អ៊ីចឹង។
យោងតាមសេចក្ដីរាយការណ៍នេះបានឲ្យដឹងថា ឈ្មោះរបស់គាត់ត្រូវបានបន្ថែមចូលទៅក្នុងបញ្ជីជនប្រព្រឹត្តបទល្មើសផ្លូវភេទ អង់គ្លេសអស់មួយជីវិត ហើយជននេះត្រូវបានហាមឃាត់មិនឲ្យធ្វើការជាមួយកុមារ ឬមាន ទំនាក់ទំនងណាមួយជាមួយកុមារឡើយ។
យោងតាមគេហទំព័ររបស់អង្គការ Crimestoppers U.K. ជាអង្គការមិនមែនរដ្ឋាភិបាលដែលធ្វើការជាមួយនគរបាល ប្រេសធីច ស្ថិតក្នុងបញ្ជីដែលនគរបាលតាមចាប់ខ្លួនបំផុតនៅក្នុងតំបន់ Devon និង Cornwall ពីព្រោះ ជននេះមិនបានត្រឡប់ទៅអង់គ្លេសវិញទេ ពីវិសម្សកាលទៅកាន់ប្រទេសអេស្បា៉ញកាលពីឆ្នាំ២០១០ ដោយរំលោភលក្ខខណ្ឌនៃការដោះលែងរបស់គាត់៕ សារុន (រាយការណ៍បន្ថែមដោយ Peter Ford)