ក្រសួងបរិស្ថានបានលុបចោលកិច្ចសន្យាចំនួនប្រាំពីរក្នុងចំណោមគម្រោងឥណទានកាបោនប្រាំបី ដែលខ្លួនបានយល់ព្រមនៅរវាងឆ្នាំ២០១១និងឆ្នាំ២០១៣ ប៉ះពាល់ដល់កិច្ចប្រឹងប្រែងដើម្បីកែប្រែព្រៃការពារទៅជាចំណូលដែលអាចមានសម្រាប់ប្រជាជននៅមូលដ្ឋាន។
ក្នុងសេចក្តីប្រកាសព័ត៌មានមួយចេញដោយក្រសួងនេះកាលពីថ្ងៃសុក្របានឲ្យដឹងថា ក្រុមហ៊ុនមួយនឹងទទួលបានការអនុញ្ញាតឲ្យបន្តការសិក្សាពីសមិទ្ធិលទ្ធផលរបស់ខ្លួន រីឯកិច្ចសន្យាជាមួយក្រុមហ៊ុនចំនួន៧ផ្សេងទៀតត្រូវបានលុបចោល។
លោក ស៊្រុន ដារិទ្ធ នាយរងខុទ្ទកាល័យក្រសួងបរិស្ថាន បាននិយាយថា គម្រោងដែលស្ថិតក្នុងដំណាក់កាលសិក្សាទាំងអស់ ត្រូវបានលុបចោល ពីព្រោះក្រុមហ៊ុនទាំងនោះមិនបានខិតខំឲ្យគ្រប់គ្រាន់ដើម្បីចាប់ផ្តើមកាបោនពាណិជ្ជកិច្ច។
លោកបាននិយាយថា “យើងបានសម្រេចលុបចោលគម្រោង៧ ពីព្រោះពួកគេបានដាក់ពាក្យជាមួយក្រសួងបរិស្ថានដោយសុំវិនិយោគក្នុងគម្រោងទាំងនោះ ប៉ុន្តែយើងបានមើលឃើញថា ពួកគេមិនមានបំណងពិតប្រាកដធ្វើទេ”។
លោក ដារិទ្ធ បាននិយាយថា លោកមិនស្គាល់ឈ្មោះក្រុមហ៊ុនដែលកិច្ចសន្យារបស់ពួកគេត្រូវលុបចោលនោះទេ ប៉ុន្តែ ក្រុមហ៊ុនមួយដែលបើកនៅខេត្តកោះកុង និងពោធិ៍សាត់ ត្រូវបានផ្តល់ឱកាសថែមទៀតឲ្យដាក់ផែនការទៅរដ្ឋាភិបាល។
ក្រសួងបរិស្ថាន និង ក្រសួងកសិកម្មជាផ្នែកមួយនៃកិច្ចប្រឹងប្រែងដែលគាំទ្រដោយអង្គការសហប្រជាជាតិ ដើម្បីឲ្យប្រទេសកម្ពុជាចូលរួមក្នុងគម្រោងពាណិជ្ជកម្មកាបោនផ្អែកលើព្រៃឈើ ដែលក្រុមហ៊ុនមានមនសិការបរិស្ថាននៅក្រៅប្រទេស ទូទាត់ការបញ្ចេញកាបោនរបស់ពួកគេ ដោយបង់ប្រាក់ឲ្យប្រទេសកំពុងអភិវឌ្ឍន៍ ដើម្បីរក្សាទុកដើមឈើស្រូបកាបោនឲ្យគង់វង្ស។
ជាទ្រឹស្តី ប្រាក់ចំណូលនឹងត្រូវចែករវាងរដ្ឋាភិបាលនិងសហគមន៍មូលដ្ឋាន ដែលជួយការពារព្រៃទាំងនោះ ប៉ុន្តែប្រទេសកម្ពុជាពិបាកនឹងធ្វើឲ្យគម្រោងនោះចាប់ផ្តើមដោយជោគជ័យ។
កម្មវិធីមួយនៅខេត្តឧត្តរមានជ័យដែលគេរំពឹងថានឹងក្លាយជាគម្រោងពាណិជ្ជកម្មកាបោនសកម្មដំបូងនៅប្រទេសកម្ពុជា បានរអាក់រអួល ដោយមន្ត្រីមូលដ្ឋានខ្លះនិយាយកាលពីឆ្នាំមុនថា ការកាប់ឈើខុសច្បាប់ជាបន្តក្នុងតំបន់នោះបានធ្វើឲ្យខូចកិច្ចប្រឹងប្រែងការពារព្រៃ។
ទោះជាយ៉ាងនេះក្តី លោក ឈុន ដឺឡុច អនុប្រធានឥណទានកាបោនព្រៃឈើនិងការប្រែប្រួលបរិស្ថាននៅរដ្ឋបាលព្រៃឈើរបស់ក្រសួងកសិកម្ម បាននិយាយថា “គម្រោងបង្ហាញ” ឥណទានកាបោនចំនួនបី កំពុងដំណើរការនៅឡើយ។
លោកបាននិយាយថា “គម្រោងចំនួនបីមានដំណើរការល្អ ប៉ុន្តែទៅអនាគតវាយ៉ាងណានោះ យើងមិនដឹងទេ”៕និត