មន្ត្រីតុលាការនិងនគរបាលបាននិយាយកាលពីម្សិលមិញថា សាលាដំបូងខេត្តរតនគិរីកាលពីល្ងាចថ្ងៃអាទិត្យ បានចោទប្រកាន់ និងដោះលែងបងប្អូនប្រុសពីរនាក់ ដែលត្រូវបានចាប់ខ្លួនកាលពីថ្ងៃសុក្រ ពីបទចាប់ពង្រត់ក្មេងប្រុសប្រាំបួននាក់ពីវត្តពីរដាច់ដោយឡែកពីគ្នាក្នុងស្រុកកូនមុំ ។
បងប្អូនប្រុសទាំងពីរនាក់នេះឈ្មោះ ថៃភឹម អាយុ៦៣ឆ្នាំ និង ជិន គីម អាយុ៥៣ឆ្នាំ ត្រូវបានចោទប្រកាន់ពីបទនាំអនីតិជនដោយខុសច្បាប់ ដោយបានចាប់ពង្រត់កុមារប្រាំបួននាក់អាយុ៨ឆ្នាំដល់១៤ឆ្នាំ និងប៉ុនប៉ងនាំពួកគេទៅកាន់វត្តមួយក្នុងខេត្តក្រចេះ។
ក្មេងប្រុសមួយក្រុមមានគ្នាប្រាំនាក់ដំបូងត្រូវបានជនសង្ស័យដឹកទៅកាន់វត្តអូរឫស្សីស្ថិតក្នុងក្រុងក្រចេះកាលពីថ្ងៃព្រហស្បតិ៍។ បន្ទាប់ពីទទួលបានពាក្យបណ្តឹងពីការបាត់កូនពីឪពុកម្តាយរបស់ពួកគេមក នគរបាលបានឃាត់ខ្លួនអ្នករត់តាក់ស៊ីម្នាក់ក្នុងខេត្តរតនគិរីខណៈដែលអ្នកបើកបររូបនេះត្រៀមដឹកក្មេងប្រុសបួននាក់ទៀតទៅកាន់ក្រុងក្រចេះ។អ្នកបើកបររូបនេះ ត្រូវបានដោះលេងវិញ បន្ទាប់ពីនាំនគរបាលទៅរកឈ្មោះ ភឹម និង គីម។
លោក រ៉េន មុត អធិការរងនគរបាលស្រុកដែលបានដឹកនាំការសើុបអង្កេត ដែលឈាន ទៅដល់ការចាប់ខ្លួននេះ បានថ្លែងថា លោកខកចិត្តនឹងសេចក្តីសម្រេចរបស់តុលាការពីព្រោះបុរសទាំងពីរនាក់នេះសារភាពថា បាននាំក្មេងប្រុសទាំងនេះដោយមិនបានជូនដំណឹងដល់ក្រុមគ្រួសាររបស់ពួកគេទៅហើយ។
លោកបានថ្លែងថា “ជនសង្ស័យទាំងនេះត្រូវបានដោះលែងកាលពីយប់មិញ។ ចៅ ក្រមបានសុំឲ្យខ្ញុំស្ម័គ្រចិត្តជួយជូនបុរសទាំងនេះទៅផ្ទះរបស់ពួកគាត់វិញ។ ប៉ុន្តែ ខ្ញុំមិនអាចជួយពួកគាត់បានទេ។ ពួកគាត់គួរតែត្រឡប់ទៅវិញដោយខ្លួនឯង”។
លោក មុត បានថ្លែងថា បើទោះជានគរបាលមិនបានប្រមូលភ័ស្តុតាងគ្រប់គ្រាន់ដើម្បីគាំទ្រការចោទប្រកាន់ឲ្យបានធ្ងន់ធ្ងរជាងនេះក៏ដោយ ក៏បទឧក្រិដ្ឋពីការនាំអនីតិជនខុសច្បាប់ដែលមានទោសជាប់ពន្ធនាគារពីពីរឆ្នាំដល់ប្រាំឆ្នាំនោះនៅតែធ្ងន់ធ្ងរដដែលក្នុងការឃុំខ្លួនបុរសទាំងនេះ ខណៈពួកគេរង់ចាំការជំនុំជម្រះដែរ។
លោកបានថ្លែងថា “បើទោះជាយើងមិនមានភ័ស្តុតាងគ្រប់គ្រាន់ដើម្បីដាក់បន្ទុកលើពួកគេពីបទជួញដូរមនុស្សក៏ដោយ ក៏បុរសទាំងនេះបានចាប់ពង្រត់កុមារទាំងនេះដោយមិនបានជូនដំណឹងដល់អាជ្ញាធរ ឬឪពុកម្តាយរបស់ពួកគេដែរ”។
យោងតាមនគរបាលបានឲ្យដឹងថា បងប្អូនប្រុសទាំងេនះសារភាពថា បាននាំកុមារទាំងនេះទៅខេត្តក្រចេះមែន ប៉ុន្តែអះអាងថា ពួកគេមិនមានបំណងជួញដូរកុមារទាំងនេះឡើយ។ ផ្ទុយទៅវិញបងប្អូនប្រុសទាំងនេះនិយាយថា ពួកគេនាំក្មេងប្រុសទាំងេនះទៅកាន់វត្តដើម្បីឲ្យពួកគេរៀនសូត្រ និងបួសជាព្រះសង្ឃ។
លោក ម៉ម វណ្ណដា ព្រះរាជអាជ្ញារងអមសាលាដំបូងខេត្ត ដែលបានចោទប្រកាន់ជនសង្ស័យទាំងពីរនាក់នេះបណ្តោះអាសន្នកាលពីថ្ងៃអាទិត្យ បានអះអាងថា លោក សាន ប៊ុនធឿន ចៅក្រមសើុបសួរបានដោះលែងបងប្អូនប្រុសទាំងពីរនាក់នេះក្រោមការឃ្លាំមើលរបស់តុលាការកាលពីយប់ថ្ងៃនោះ។
លោក វណ្ណដា បានថ្លែងថា “ចៅក្រមបានកំណត់ពីភាពធ្ងន់ធ្ងរនៃបទឧក្រិដ្ឋ និងស្ថានភាពរបស់ជនសង្ស័យ ហើយទទួលខុសត្រូវចំពោះសេចក្តីសម្រេចរបស់លោក”។
លោកបានថ្លែងថា ចៅក្រម ប៊ុនធឿន បានបង្គាប់ឲ្យមានការសើុបអង្កេតបន្ថែមពីលទ្ធភាពដែលថា ជនសង្ស័យមានគម្រោងជួញដូរជនសង្ស័យទាំងនេះ។
ដោយពន្យល់ថា បុរសទាំងពីរនាក់នេះមិនទំនងជាចាកចេញពីប្រទេសនោះ លោកបានថ្លែងថា “ខ្ញុំគិតថា សេចក្តីសម្រេចរបស់ចៅក្រមសមហេតុផល ពីព្រោះជនសង្ស័យម្នាក់ឈ្មោះ ភឹម ពិការភ្នែក ហើយពួកគាត់ជាមនុស្សចាស់ និងមានទីលំនៅអចិន្ត្រៃយ៍”។
លោកបានថ្លែងថា លោក លាវ ស្រេង ព្រះរាជអាជ្ញាអមសាលាដំបូងខេត្តអាចប្តឹងទាស់សេចក្តីសម្រេចក្នុងការដោះលែងជនទាំងពីរនាក់នេះបាន។ចៅក្រម ប៊ុនធឿន មិនអាចទាក់ទងសុំអត្ថាធិប្បាយបានទេ។
លោកស្រី កែវ ដាវី ស្នងការរងនគរបាលខេត្តទទួលបន្ទុកប្រឆាំងការជួញដូរមនុស្សបានថ្លែងថា នគរបាលនឹងបន្តសើុបអង្កេតបងប្អូនប្រុសទាំងពីរនាក់នេះ។ លោកស្រីថ្លែងថា “ដំបូងយើងសើុបអង្កេតថា តើជនសង្ស័យទាំងនេះពិតជានាំកុមារទាំងេនះទៅរៀននៅវត្តមែន ឬមិនមែន”។
លោកស្រីបានបន្ថែមថា “ទី២យើងស្វែងរកភ័ស្តុតាងថា តើជនសង្ស័យទាំងនេះមានមេខ្លោងនៅពីក្រោយពួកគេក្នុងការនាំកុមារទាំងេនះទៅសុំទាន ឬយ៉ាងណា។ ហើយទី៣ យើងនឹងសើុបអង្កេតថា តើពួកគេបានចាប់ពង្រាត់កុមារទាំងនេះទៅធ្វើពេស្យាចារ ឬមិនមែន”។
លោក យឹម សិទ្ធី នាយប៉ុស្តិ៍ ឃុំតាអុង ទីដែលកុមារទាំងនេះរស់នៅបាននិយាយថា បងប្អូនប្រុសទាំងពីរនេះបានផ្លាស់ទីលំនៅពីខេត្តត្បូងឃ្មុំទៅខេត្តរតនគិរីក្នុងឆ្នាំ២០១៣ ហើយបានធ្វើជាគ្រូឱសថបុរាណក្នុងស្រុកលំផាត់ ដោយឈ្មោះ គីម ក៏មានចម្ការដំឡូងមីផងដែរ។
លោក សិទ្ធី បានថ្លែងថា លោកមិនយល់ថា តើហេតុអ្វីបានជាតុលាការដោះលែងជនសង្ស័យទាំងនេះ ក្រោយពីពួកគេសារភាពថា បានចាប់ពង្រាត់កុមារទាំងេនះហើយនោះ។
លោកបានថ្លែងថា “ខ្ញុំគិតថា ប្រសិនបើនគរបាលដោះលែងជនសង្ស័យណាម្នាក់ ប្រជាពលរដ្ឋនឹងស្តីបន្ទោស ហើយរិះគន់យើងមិនខាន។ប៉ុន្តែ បើតុលាការដោះលែងជនសង្ស័យវិញ វាជារឿងធម្មតា”។
លោក ឆាយ ធី អ្នកសម្របសម្រួលអង្គការ សិទ្ធិមនុស្សអាដហុកប្រចាំខេត្តនេះ ដែលបានសើុបអង្កេតករណីនេះ បានថ្លែងថា ការអះអាងរបស់ជនសង្ស័យដែលថា ពួកគេមាន បំណងជួួយក្មេងប្រុសមួយក្រុមនេះ ដែលរួមមានជនជាតិភាគតិចគ្រឹងបីនាក់ផងនោះមិនទំនងទាល់តែសោះ។
លោក ឆាយ ធី បានថ្លែងថា “ប្រសិនបើកុមារទាំងនោះចង់ទៅបួសមែននោះ ពួកគេគួរជូនដំណឹងដល់អាជ្ញាធរមូលដ្ឋាន ហើយសុំការអនុញ្ញាតពីឪពុកម្តាយរបស់ពួកគេជាមុនមិនខាន”។ លោកបានថ្លែងថា ”ប្រជាពលរដ្ឋដែលរស់នៅតំបន់ជនបទ ជាពិសេសក្រុមគ្រួសារជនជាតិភាគតិចដែលក្រីក្រ និងខ្វះការអប់រំ ងាយរងគ្រោះក្នុងការចាញ់បោកពីសំណាក់ជនខិលខូចណាស់”៕សារុន