30 C
Phnom Penh

លោក ហ៊ុន សែន អះ​អាង​ថា លោក​ជាអ្នកគាំទ្រកម្មវិធី “Cambodian Idol”

ដោយ ឌឹ ខេមបូឌា ដេលី

បទវិភាគ

មាន​អ្នក​ចម្រៀង​តែ​មួយ​រូប​ប៉ុណ្ណោះ​នៅ​ក្នុង​កម្មវិធី “Cambodian Idol” អាច​ឈ្នះ​​រង្វាន់​​ដែល​មាន​ទឹក​ប្រាក់​ចំនួន​២៥.០០០​ដុល្លារ​របស់​កម្មវិធី​ទូរទស្សន៍​នេះ ប៉ុន្តែ​បេក្ខជន​ទាំង​អស់​​​សប្បាយរីករាយ​​ពី​ការ​ដែល​ពួកគេ​ទទួល​បាន​អ្នក​គាំទ្រ​​ស្មោះ​ស្ម័គ្រ​​មួយ​ចំនួន​​​​​​ជា​​​ពិសេស​​​​​ ពី​ថ្នាក់​ដឹកនាំ​កំពូល​ក្នុង​ឆាក​នយោបាយ​​ក្នុង​ប្រទេស​ផង​ដែរ។

នៅ​ក្នុង​សុន្ទរកថា​នៅ​វិទ្យាស្ថាន​ជាតិ​អប់រំ​ក្នុង​រាជធានី​ភ្នំពេញ កាលពី​ម្សិលមិញ លោក​នាយក​រដ្ឋមន្ត្រី ហ៊ុន សែន បាន​​លើក​ឡើង​​ពី​ការ​ស្រឡាញ់​របស់​លោក​​​​ចំពោះ​​កម្មវិធី​ទូរ​ទស្សន៍​នេះ​​​ដោយ​ថ្លែង​ថា លោក​តែង​តែ​មើល​កម្ម​វិធី​នេះ ហើយ​បោះ​ឆ្នោតគាំទ្រ​​រាល់​សប្ដាហ៍​តាម​ទូរស័ព្ទ​ដៃ​របស់​លោក​ មិន​ថា​លោក​នៅ​កន្លែង​ណា​នោះ​ឡើយ​។

លោក​នាយក​រដ្ឋមន្ត្រី​បាន​មាន​ប្រសាសន៍​​​ថា “​កាលពី​ពីរ​បី​សប្ដាហ៍​មុន ខ្ញុំ​បាន​បោះ​ឆ្នោត​​​គាំទ្រ​​ពី​បុរី​ញូវយ៉កមក​ ហើយ​សប្ដាហ៍​កន្លង​ទៅ​នេះ​​ខ្ញុំ​ក៏​បាន​បោះ​ឆ្នោត​គាំទ្រ​ពី​ម៉ាកាវ​ផង​ដែរ… ​នៅ​ពេល​ខ្ញុំ​បញ្ចប់​កិច្ច​ប្រជុំ​នៅ​ម៉ោង​​៩​យប់ វា​ត្រូវ​នឹង​ម៉ោង​​៨​យប់​នៅ​ប្រទេស​កម្ពុជា ​​​ខ្ញុំ​បាន​មើល ព្រាប សុវត្ថិ ផ្ដល់​យោបល់​​ដល់​បេក្ខជន​ ហាជី”។ ​

ព្រាប សុវត្ថិ គឺ​ជា​​​កំពូល​តារាចម្រៀង​មួយ​រូប​នៅ​ក្នុង​ប្រទេស​កម្ពុជា ចំណែក​ ម៉ៅ ហាជី គឺ​ជា​អ្នក​ចម្រៀង​មួយ​រូប​​ក្នុង​ចំណោម​បេក្ខជន​បួន​រូប​​ដែល​នៅ​​បន្ត​ក្នុង​កម្មវិធី​នេះ​។

លោក ហ៊ុន​ សែន មិន​បាន​បញ្ជាក់​ថាតើ​លោក​គាំទ្រ​បេក្ខជន​រូប​ណា​នោះ​ឡើយ ដោយ​លើក​ឡើង​ថា បេក្ខជន​​​ទាំង​១២​រូប​​ “សុទ្ធតែ​ខ្លាំង​​ ហើយ​អាច​ច្រៀង​ចម្រៀង​​​បាន​​​​គ្រប់​ប្រភេទ​”។

លោក សុខ ឥសាន ​អ្នក​នាំពាក្យ​​​​គណបក្ស​ប្រជាជន​កម្ពុជា​​​បាន​មាន​ប្រសាសន៍​ថា លោក​មិនអាច​ផ្ដល់​ព័ត៌មាន​អំពី​បញ្ហា​នេះ​បាន​ទេ។​​​”វា​ជា​ការ​បោះ​ឆ្នោត​សម្ងាត់​ ហើយ​សម្ដេច​​មិន​បាន​ប្រាប់​ខ្ញុំ​​ថា សម្ដេច​បោះ​ឆ្នោត​​គាំទ្រ​​បេក្ខជន​រូប​ណា​ឡើយ​”។

បន្ទាប់ពី​​សុន្ទរកថា​របស់​លោក​នាយក​រដ្ឋ​​​មន្ត្រី​បន្តិច​មក លោក អេង ឆៃអ៊ាង ​សមាជិក​សភា​គណបក្ស​សង្គ្រោះ​ជាតិ​បាន​​​​​ប្រើ​ទំព័រ​ហ្វេសប៊ុក​របស់​លោក​​​សរសេរ​ថា ​បើ​ទោះ​​លោក​​ជា​អ្នក​គាំទ្រ​កម្មវិធី​នេះ​ក៏​ដោយ ក៏​លោក​មាន​ការ​បារម្ភ​​អំពី​ “ភាព​មិន​ប្រក្រតី” ​នៅ​ក្នុង​នីតិវិធី​នៃ​ការ​បោះ​ឆ្នោត​ ដែល​បាន​បណ្ដាល​​ឲ្យ​ អ៊ាម វន្នី ​ដែល​មិន​ត្រឹម​តែ​ជា​អ្នក​និពន្ធ​បទចម្រៀង​​​ដ៏​មាន​ទេព​កោសល្យ​មួយ​រូប​ប៉ុណ្ណោះ​ទេ ប៉ុន្តែ​ថែម​ទាំង​​​ជា​អ្នក​ចម្រៀង​មាន​ទឹក​ដម​ផង​ដែរនោះ​​ ត្រូវ​បាន​ជម្រុះ​ចេញ​កាលពី​យប់ថ្ងៃ​អាទិត្យ​​។

អ្នក​នយោបាយ​​បក្ស​ប្រឆាំង​រូប​នេះ​បាន​សរសេរ​ថា​ “​កាលពី​៣​សប្ដាហ៍​មុន ខ្ញុំ​បាន​កត់​សម្គាល់​ឃើញ​ថា មាន​ភាព​មិន​ប្រក្រតី​​ក្នុង​ការ​ជម្រុះ​បេក្ខជន​”។

​លោក​បាន​បន្ត​ថា ​”​បេក្ខជន​រូប​ណា​ដែល​​​គណៈកម្មការ​​​​រិះគន់​​ចំណុច​ខ្វះខាត​​បន្តិច​បន្តួច​ ​ដល់ពេល​ប្រកាស​លទ្ធផល​ បេក្ខជន​នោះ​​​ត្រូវ​ធ្លាក់ ដែល​ធ្វើ​ឲ្យ​​អ្នក​ទស្សនា​មិន​អស់​ចិត្ត​​ ព្រោះ​ពិន្ទុដែល​អ្នក​ទស្សនា​ដាក់ឲ្យ​បេក្ខជន​មួយរូបៗ​ មិន​ត្រូវ​បាន​បង្ហាញ​​ជា​សាធារណៈ​”។

ឆ្លើយ​តប​ទៅ​នឹង​​មតិ​រិះគន់​នេះ លោក អឹុង ​សុខលី ​អ្នក​​​ដឹកនាំ​​ផលិត​កម្មវិធី​​ “Cambodian Idol” ​បាន​មាន​ប្រសាសន៍​ថា ដំណើរ​ការ​បោះ​ឆ្នោត​​​គាំទ្រ​កម្មវិធី​នេះ​​ “​មាន​​តម្លាភាព” ហើយ​​ធ្វើ​​ទៅ​តាម​ “កម្មវិធី​​​ និង​ផែន​ការ​ច្បាស់​លាស់​”។

លោក​បាន​បន្ថែម​ថា “​កម្មវិធី​របស់​យើង គឺ​ជ្រើស​រើស​ Idol សម្រាប់​ប្រជាជន​កម្ពុជា ដូច្នេះ​​យើង​​អនុញ្ញាត​ឲ្យ​សាធារណជន​​ជ្រើស​​​រើស​​ Idol របស់​ខ្លួន​។ ប៉ុន្តែ​យើង​ស្វាគមន៍​​អ្នក​រិះគន់​ទាំង​អស់​​”៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស